YAKOBUS 5 - BOWOT BOHUA

Pongingat ahkan ulun-ulun tahtou

¹ Konduang-konduang, ulun-ulun tahtou! Ngonihohrih tingak-Ku. Kohandakrih ihkam nangih tutang nahtum tului ihkam ahkan ngarot koporos!

² Ponahtou'mu jari maram. Hahtin'mu jari tokuman gagat.

³ Bulau tutang perak'mu jari totuhtup tagar; tagaroh ahkan jadi saksi molawan ihkam, tutang ahkan kuman opah behtin'kam kolou baho. Ihkam ius nunyuk ponahtou ang jaman monitu laiu.

⁴ Ihkam eam bayar uhpah ulun-ulun, ijo bogawi ang umon'mu. Huntuh ngonih auh komonguh iro! Ulun-ulun ijo nipun bua umon'mu ngoriak nyawot dohop, tutang koriak iro jari johcok nokuh tolingan Pohotala, Tuhan Ijo Pahamkowasa.

⁵ Ihkam ius bolum molowi tutang nginyam kosanang ang kolunon tuh. Ihkam koloujahka rahat pomonyak arop, ahkan ondou ponyombalih.

⁶ Ihkam mohukum tutang munu ulun-ulun ijo eam bosala, tutang iro eam molawan ihkam.

Kosabaran tutang bodo'a

⁷ Bain orih, bosabarrih Konduang-konduang'ku, nyiring Tuhan lombut. Nohto rih koloukuwoh sabaroh ihcobehti Pongumo ngindoi, nyiring umoioh polombut buaoh ijo borega ahkaioh. Umba kosabar io ngindoi uhjan musim ngonyahtu tutang uhjan musim dolak.

⁸ Kohandakoh ka'a ihkam bosabar tutang hajo ahtoi, tului ondou polombut Tuhan jari doni.

⁹ Ara bokuhtuk tutang saling hotosalan, mangat ihkam eam kona hukum bain Pohotala. Ingat! Hakim ius doni, tohtap ahkan lombut.

¹⁰ Konduang-konduang, ingatrih dolang nabi ijo nuhtui ngosan aran Tuhan. Iro sabar tutang tabah ngarot. Jadi, omin iro monjadi sutu.

¹¹ Iro konohawot sanangmangat tului iro tabah. Ihkam ius ngonih tohou kosabar Ayub, tutang ihkam ta'an koloukuwoh Tuhan ang laiuoh momborehkat Io. Tului Tuhan paham kasihsayang tutang hinut ahtoi.

¹² Ijo pahtukoh samasino, iorih: Ara nulut pios demi langit, kanika demi tana, ata'ai demi inonka iou. Ngohawotrih iou, ‘‘Yo’’ amat konohuang'mu yo, tutang ‘‘Eam’’ amat konohuang'mu eam; mangat ihkam ara tonopahas hukum bain Pohotala.

¹³ Amat ang louk'kam anai ijo rahat susah, kopiosoh io bodo'a. Amat anai ijo jorih, handakrih io monyanyi monara Pohotala.

¹⁴ Amat anai ijo poros, hondakrih io na'ah ponotua-ponotua ukup. Tutang handakrih ponotua-ponotua ukup rih, bodo'a ahkan ulun ijo poros rih, tutang ngasakoh umba undus ang aran Tuhan.

¹⁵ Amat do'a iro tongojohcokoh honong koyakinan, Tuhan ahkan ngopios ulun ijo poros rih, tutang ngapun dusai-dusai, ijo jari tonguaioh.

¹⁶ Kotului orih, handakrih ihkam saling ngahku kosalan ihco umba ijo bohkon, honong saling bodo'a, mangat ihkam konopios. Do'a ulun ijo numbun konohuang Pohotala, tepun kowasa ijo hajo.

¹⁷ Elia, sama-sama kolunon kolou ihto. Io bodo'a honong tu'u-tu'u, mangat uhjan eam boduruh, mahka uhjan ka'a eam boduruh kotahin tolu sotengah toun.

¹⁸ Pongo-huli io bodo'a hino, turus langit monduruh uhjan, nyiring tana nonga buaoh hino.

¹⁹ Konduang-konduang'ku! Amat ang louk ihkam anai ihcobehti ijo eam monutut hino ajar tahkan Pohotala, turus ihcobehti ijo bohkon ngomin, ulun rih hoduli nokuh Pohotala,

²⁰ ingat auh ayat tuh: Ulun ijo ngomin ulun bodusa ngulos tahkan jalaioh ijo sala, ulun rih nyolamat homboruan ulun bodusa rih, tahkan popahtoi, tutang kotuluioh aro dusa tonapunoh. Horomat ihkai, Yakobus