PONGORINAH 12 - BOWOT BOHUA

Ulunbawi honong naga

¹ Turus gihtan ang langit ang'co ijo helan, tutang luar biasa. Ihcobehti bawi ijo hapa mahtanondou kolou hahtiuoh, rahat tombok ang ngosan bulan. Ang kuhungoh dahpot ihco ahkur ijo tonawas tahkan duo balas potion.

² Ulunbawi rih uhun botohi, tutang kotului jari ohkotoh ahkan nganak, mahka io norahing poros humi.

³ Turus gihtan hino ang langit ang'co ijo helan. Anai ihcokungan naga bohandang ijo hajo samasino, ijo anaingina pihtu kuhung, tutang sopulu tanduk. Nyinong kuhungoh hapa ihco ahkur.

⁴ Umba ikuhoh io mohaer sepertolu tahkan potion-potion ang langit, tutang nyakahoh nokuh tana. Naga rih tombok hila boun ulunbawi ijo kani nganak rih, honong nohuang nolon anakoh, kolourih io nganak.

⁵ Turus ulunbawi rih nganak ihcobehti anak bahkas, ijo ahkan moretah paring uhtus umba sukah bosi. Tahpi anak rih, tonosuwit tahkan ulunbawi rih, turus tonomin nokuh Pohotala tutang noharep pododusai-Oh.

⁶ Mahka ulunbawi rih nokoru, ahkan padang balambah, nokuh unuk ijo jari tonahtap bain Pohotala bagioh. Ang unuk rih io ahkan tonojaga sokuhjan duo rahtus onom pulu ondou kotahiuoh.

⁷ Turus ang soruga nyolung kolahi, Mikhael umba molehkat-molehkatoh kolahi molawan naga rih. Tutang naga rih ka'a ijo dohop bain molehkat-molehkatoh, molawan Mikhael.

⁸ Tahpi naga rih tonokalahoh. Io tutang molehkat-molehkatoh eam tononga ijin hino mohcon ang soruga.

⁹ Naga ijo hajo dih dian nokuh luar! Iorih lohi oko orih, ijo bogare Sehtan ata'ai Roh Ja'at, ijo ngobalik sohopus kolunon. Io ndian nokuh kolunon hawui kokaro molehkatoh.

¹⁰ Turus ahku ngonih auh ijo muhing ang soruga nuhtui, ‘‘Uhuntuh ohkotoh Pohotala monyolamat ukup-Oh! Uhuntuh Pohotala ngorinah kowasai-Oh kolou Lahca! Uhuntuh Lahca Ponyolamat ijo tonobowot rih, ka'a ngorinah, kowasa-Oh! Tului ijo mondawa konduang-konduang ihto ang toharep Pohotala hondou tutang ngolomi, jari tonyoluka tahkan soruga.

¹¹ Konduang-konduang, ihto jari mongalah io umba dahan Anak Tobiri rih, tutang honong borihta morong tahkan Pohotala ijo iro mborihtaoh. Iro rela monyorah hasongoh nyiring mahtoi.

¹² Kotului rih, hondakoh soruga tutang paring ijo mohcon ang luwangoh bojori-jorih! Tahpi colahka tana tutang tasik, kotului Sehtan jari mosuluh ahkan'kam hawui bosingi ijo paham hajo, tului io ta'an ijo ohkotoh mohcon honjiot hino.’’

¹³ Aang ohkot naga rih borondong, ijo io jari ndian ahkan tana io nopara hodulu ulunbawi, ijo jari nganak anak bahkas rih.

¹⁴ Tahpi ulunbawi rih tononga duo ilat bulung rajawali ijo hajo, mangat io na'ang nokuh unukoh ang padang balambah, ang anan io ahkan tonojaga kotahin tolu setongah toun, tomokila tahkan tonyarang naga.

¹⁵ Mahka naga rih monopurus tahkan nyamaioh aro samasino danum nitu ulunbawi rih, ahkan ngohanyutoh.

¹⁶ Tahpi tana dohop ulunbawi rih, tana nguap nyamaioh tutang nolon danum ijo bolua tahkan nyaman naga rih.

¹⁷ Naga rih monjadi bosingi samasino umba ulunbawi rih, nyiring io tulak nyarang lihit ijo bohkon tahkan ulunbawi rih, yorih paring ulun ijo mone'et poretah-poretah Pohotala, tutang ijo nonga kosaksian tohou Yesus tutang Kowasa-Oh.

¹⁸ Turus naga rih tombok ang saran pantai.