LUKAS 17 - BOWOT BOHUA

Hal-hal ijo kotuluioh ulun nguan dusa

¹ Yesus nuhtui umba murid-murid-Oh, ‘‘Hal-hal ijo kotuluioh ulun nguan dusa musti ahkan anai. Tahpi colahkarih ulun ijo kotuluioh ulun nguan dusa!

² Labih pios amat buhtup bahtu konarut aang uhcatoh, turus io ngondian nokuh luwang tasik, tahkanumba baiuoh ihcobehti tahkan ulun-ulun ijo koik tuh napa dusa.

³ Tului orih rondo-rondong ih! Amat konduang'mu bodusa, ningak io. Amat io nyasal, ngapunrih io.

⁴ Amat io bodusa umba ihko, pihtu tikat ihcoondou tutang nyinong tikat lombut nokuh 'ko, tutang nuhtui, ‘Ahku nyawot apun’, apunrih io.’’

Tohou koporocaya

⁵ Rasul-rasul nuhtui umba Tuhan Yesus, ‘‘Tuhan, ngoba'as koporocaya ihkai.’’

⁶ Tuhan mutah, ‘‘Amat ihkam anaingina koporocaya kohajon luang sosawi, ihkam duon nuhtui umba pu'un musai tuh, ‘Bosohpit ihko tutang totanom ang tasik,’ musti pu'un tuh ahkan numbun poretah'mu.’’

Kopahtut 'cobehti pohalu

⁷ ‘‘Jahka ihcobehti tahkan ihkam anaingina pohalu ijo mombajak ang umo ata'ai nyokahtik tobiri. Amat pohalu rih buli, inon ijo io nuhtui umbaoh, ‘'Kan ohtoi jeleng kuman’?

⁸ Puna eam! Tombalikoh io ahkan nuhtui umba io, ‘Nahtap ukun ahkak'ku. Haparih pokahjan ijo borasih, tutang ngindoirih ahku pondehan ahku kuman tutang ngorih; uliorih ihko tou kuman.’

⁹ Pohalu rih eam usah tonara tului jari numbun poretah tuanoh, kowa?

¹⁰ Kolourih ka'a ihkam. Amat ihkam jari nguan paring ijo ponoretah ahkan'mu, tuhtuioh, ‘Ihkai tihkas pohalu ijo bahut; ihkai tihkas nguanoh kopahtut ihkai.’ ’’

Yesus ngopios sopulu behti

¹¹ A'ang ponyalai nokuh Yerusalem, Yesus nyuru tana holang Samaria tutang Galilea.

¹² Ohkot nyolong ihco lowu, Io tonokuh bain sopulu behti ijo boponyahkit belang ijo ngoli. Iro tombok tahkan mahcu

¹³ tutang ngombak, ‘‘Yesus! Tuan! Ngasirih ihkai!’’

¹⁴ Uhun Yesus nopahjah iro, Io nuhtui, ‘‘Tulak nokuh imam-imam, nyawot iro momoriksa behtin'kam.’’ Pondehan iro nyalan, nihou ponyahkit'ndo.

¹⁵ Kotihka ihcobehti tahkan iro borondong ijo io jari pios io hoduli honong bososurak monara Pohotala.

¹⁶ Turus ang tohimo Yesus, io suhkuntu'ut tutang ngohawot torimakasih umba Yesus. Ulun rih 'cobehti Samaria.

¹⁷ Pongohino Yesus nuhtui, ‘‘Eamkah sopulu behti ijo konopios? Ang umoh ijo sioi behti hino?

¹⁸ Ombai tihkas ulun luar tuh ijo huli ngohawot torimakasih ahkan Pohotala?’’

¹⁹ Turus Yesus nuhtui umba ulun rih, ‘‘Hihkat beweu, tutang hihkasrih. Tului ihko porocaya umba Ahku, ihko pios.’’

Ohkot Pohotala lombut ahkan moretah

²⁰ Pira-pira ulun Parisi ngisok umba Yesus, mira Pohotala lombut ahkan moretah. Yesus mutah, ‘‘Pomoretah Pohotala eam nopara umba tanda-tanda ijo duon tonohto ulun,

²¹ nyiring ulun duon nuhtui, ‘Kanohtoi nohto, tuh io!’ ata'ai ‘Ang anan io!’ Tului Pohotala jari nopara moretah ang tohun-tohun ihkam.’’

²² Uliumba rih Yesus nuhtui umba murid-murid-Oh, ‘‘Ahkan lombut ohkotoh ihkam jolik nohto ihco ondou, tahkan ondou-ondou Anak Ulun, tahpi ihkam eam duon nohtooh.

²³ Noin ulun nuhtui umba'kam, ‘Nohto, ang anan!’ ata'ai ‘Nohto, ang ohtoi!’ Tahpi ara ihkam soluka ngurah io.

²⁴ Sama kolou kilap mokilat ang langit, tutang ngoloang tahkan puting dahpot puting, kolourih ka'a noin polombut Anak Ulun aang ondou-Oh.

²⁵ Tahpi aang pahtukoh io harus aro ngarotporos tutang eam tonorima bain ulun-ulun jaman tuh.

²⁶ Aang ondou Anak Ulun tongorinah noin koada'anoh kolou jaman Noah lomoi.

²⁷ Ulun kuman ngorih tutang kawin; kolouorih hototurus johcok Noah nyolong koluwang bonamaoh tutang danum ba'ah lombut hawui molonyot ulun-ulun rih paring.

²⁸ Ka'a kolou ang jaman Lot. Ulun kuman ngorih, hoborahkang hopoli, ngumo-ngombulan tutang mangun lohpou.

²⁹ Tahpi kotihka Lot soluka tahkan Sodom, ang ondou orih, baho tutang sondawa mosuluh tahkan langit tutang morusak iro paring.

³⁰ Kolouorih rih koada'anoh noin aang ondou Anak Ulun tongorinah.

³¹ Aang ondou orih ulun ijo uhun anai ang diang sahpou lohpouoh, a'ai mosuluh ahkan ngomin karon-ramuioh ijo ang luwang lohpou. Kolourih ka'a ulun ijo rahat ang umo a'ai ka'a buli nokuh lohpouoh.

³² Ingat beweu, inon ijo nyolung umba oruh Lot!

³³ Ulun ijo bousaha nyolamat pombolumoh, ahkan nihou pombolumoh. Tahpi ulun ijo nihou pombolumoh ahkan monyolamat orih.

³⁴ Porocayarih iou: Aang ngolomi orih, duo behti rahat tiruh ang ihco ranjang, ihcobehti ahkan konomin tutang 'cobehti hino tonohtah.

³⁵ Duo behti bawi rahat muhca gandum, ihcobehti ahkan tongomin tutang ihcobehti hino tonohtah. [

³⁶ Duo behti rahat bogawi ang umo, ihcobehti ahkan konomin, tutang ihcobehti hino tonohtah.]’’

³⁷ Murid-murid Yesus ngisok, ‘‘Ang umoh orih ahkan nyolung, Tuhan?’’ Yesus mutah, ‘‘Ang umoh anai otunaang, ang anan anai bulung ijo kuman otunaang.’’