IBRANI 7 - BOWOT BOHUA

Imam Melkisedek

¹ Melkisedek tuh iorih lahca tahkan Salem tutang imam Pohotala Ijo Mahaisung. Ohkot Abraham buli tahkan hokolahi mongalahoh lahca-lahca, Melkisedek lombut noharang Abraham tutang mborehkatoh.

² Mahka Abraham nonga ahkan Melkisedek, sepersopulu tahkan karo inon ijo ngorabutoh. (Aran Melkisedek rimai ijo-pahtuk, ‘‘Lahca Koadilan’’; tutang tului io lahca tahkan Salem, mahka araioh rimai ka'a ‘‘Lahca Komangat’’.)

³ Tohou Melkisedek tuh eam anai kotorangan ang umoh ka, ijo io anai amai ata'ai inai ata'ai tahtu ajuh; eam anai ka'a kotorangan tohou konanakoh ata'aika popahtoioh. Io sama kolou Anak Pohotala; io rih anairih imam ijo kototahiu.

⁴ Jadi ihto nohto ang ohtoi, eaminon kohajoioh Melkisedek rih; io kolourih kohajoioh nyiring Abraham, amai tahtu ajuh uhtus ihto, nonga ahkaioh sepersopulu tahkan kokaro angihco ijo tongorabutoh tahkan kolahi orih.

⁵ Ang luwang hukum agama Yahudi, tonahtap ijo imam-imam uras tahkan lihit Lewi, pahtut ngomin sepersopulu tahkan pongulih ukup Israel, yorih konduang-konduang iro bongoi, oluka iro sama-sama lihit Abraham.

⁶ Melkisedek eam lihit Lewi, tahpi io norima ka'a sepersopulu tahkan kokaro ijo tongorabut Abraham, tutang mborehkatoh hino Abraham, ijo justru norima bowot-bowot tahkan Pohotala.

⁷ Puna eam tou tonolawan ijo ulun ijo tomorehkatoh, monjadi ulun ijo labih randah tahkanumba Io ijo mborehkatoh.

⁸ Imam-imam ijo norima topunan sepersopulu rih, anairih ulun ijo tou mahtoi. Tahpi numbun Surat Borasih, Melkisedek ijo norima pononga sepersopulu rih, io rih ulun ijo tohtap bolum.

⁹ Duon tonohawot, ijo Lewi – ijo lihitoh ijo nopunan sepersopulu kobagi, tahkan ukup Israel – mbayar ka'a bagian rih nguha Abraham, aang ohkot Abraham mbayaroh ahkan Melkisedek.

¹⁰ Oluka Lewi jaha konanak, tahpi tou tonohawot io ius anai ang luwang behtin Abraham tahtu ajuhoh, ang ohkot Melkisedek hosombang umba Abraham.

¹¹ Ang pinda okon imam-imam ulun Lewi, hukum agama Yahudi tononga ahkan ukup Israel. Tului imam-imam Lewi lomoi rih eam dahpot nguan rih hawui soporuna, inon ijo harus tonguan'ndo, mahka harus anai imam bohkon, yorih ijo kolou Imam Melkisedek, tutang eam tahkan barih Imam Aron hino!

¹² Nah, amat ponuot imam-imam boubah, hukum agama Yahudi ka boubah ka'a.

¹³ Ijo konohuang ang ohtoi iorih Tuhan ihto. Io tahkan lihit bohkon, tutang jaha pu'u ihcobehti ka tahkan suhku-Oh nguangawi kolou imam.

¹⁴ Paring ulun ta'an ijo Tuhan ihto ijo asar tahkan lihit Yahuda, tutang Museh eam pu'u ngohawot suhku rih, ang ohkot io nuhtui tohou imam-imam.

Ihcobehti imam bohkon kolou Melkisedek

¹⁵ Hal ijo tomander tuh monjadi labih jelas hino, honong lombutoh ihcobehti imam bohkon ijo kolou Melkisedek.

¹⁶ Io tonotuot monjadi imam, eam hogalang aturan-aturan ulun molekan hogalang pombolumoh ijo bokowasa tutang ijo eam anai laiuoh.

¹⁷ Kotului ang luwang Surat Borasih tonuhtui, ‘‘Ihko tuh anairih imam turus-jahamoh, kolou Imam Melkisedek.’’

¹⁸ Jadi, uhuntuh poroturan ijo soun jari tonyarooh, tului eam ba'as, tutang eam boguna.

¹⁹ Hukum agama Yahudi, eam dahpot nguan angihco ka menjadi soporuna. Orih kotuluioh ihto uhuntuh tononga ihco koharap ijo labih hinut; honong rih ihto duon ngondoni Pohotala.

²⁰ Mahihino, paringoh rih tonohomboh umba tulut tahkan Pohotala. Eam aro tulut kolourih, ang ohkot imam-imam ijo bohkon rih tonotuot.

²¹ Tahpi Yesus tonotuot monjadi imam hapa tulut, ohkot Pohotala nuhtui umba Io, ‘‘Tuhan ius bonulut tutang Io eam ahkan ngubah tirukahtoi-Oh. ‘Ihko anai rih imam turus-jahamoh.’ ’’

²² Umba tuh hino, Yesus monjadi jaminan ahkan angihco bowot ijo paling hinut.

²³ Anai hino ihco hal; imam-imam ijo bohkon rih, anai aro, tului iro nyino-nyinongoh mahtoi, nyiring eam dahpot hototurus nambit pangkatoh.

²⁴ Tahpi Yesus bolum turus-jahamoh, jadi pangkat-Oh numbun imam eam tokiri umba ulun bohkon.

²⁵ Bain kotului rih ahkan turus-jahamoh, Yesus dahpot nyolamat, ulun-ulun ijo lombut, nokuh Pohotala nguha Io, kotului Io bolum turus-jahamoh, ahkan monyapai sawot ahkan Pohotala, bagi ulun-ulun rih.

²⁶ Jadi, Yesus orihrih Imam Hajo ijo ihto poruluoh. Io Borasih; aang Io eam dahpot kosalan ata'ai dusa inonka. Io tongobohkon tahkan ulun-ulun ijo bodusa, tutang tongahtangrih nyiring nokuh unuk ijo labih diang tahkan kokaro langit.

²⁷ Io eam kolou imam-imam hajo ijo bohkon, ijo nyinong ondou harus monyorah pononga kotului dusa-dusan iro bongoi lomoi, punai tului dusa-dusan ukup. Yesus nyorah porahpah tihkas sino tikat ahkan turus-jahamoh, ohkot Io monyorah arop-Oh bongoi monjadi porahpah.

²⁸ Hukum agama Yahudi, potuot ulun ijo eam soporuna monjadi imam hajo. Tahpi pongohino tahkan aturan rih, Pohotala napa bowot honong tulut, ijo Io potuot kolou Imam Hajo, Anak ijo ius monjadi Ponyolamat ijo soporuna ahkan turus-jahamoh.