1 KORINTUS 7 - BOWOT BOHUA

Karon-kisok tohou pongawin

¹ Huntuh ahku kani bopander tohou masalah ijo ihkam ngohawotoh a'ang surat'kam. Amat ihcobehti ulunbahkas eam kawin, orih pios.

² Tahpi mangat eam buah tihkos ahkan nguan hal-hal ijo eam pahtut, labih pios nyinong ulun-ulun bahkas anai oruhoh bongoi. Tutang nyinong ulunbawi anai bosaioh bongoi.

³ Bosai harus molalus kopahtutoh kolou bosai ngosan oruhoh, tutang oruhoh harus molalus kopahtutoh monjadi oruh toharep, bosoioh, nyino-nyinong behti molalus kopahtutoh toharep ijo bohkon.

⁴ Oruhoh eam bokowasa ngosan behtiu bongoioh, ijo bokowasa ngosan behtiuoh baya bosaioh. Kodorih ka'a bosaioh eam bokowasa ngosan behtiuoh bongoi, ijo bokowasa ngosan behtiuoh baya oruhoh.

⁵ Ararih ngojajong ihco umba ijo bohkon, socara bosai oruh. Tou ahkan pondehan ohkotoh, asar duo-duooh jari sotuju. Honong kodorih nyino-nyinong dahpot bodo'a, hawui eam hokoderoh. Tahpi pongohuli harusrih ihkam hoduli, saling hokodoni secara bosai oruh. Amat eam kolourih, noin ihkam tou numbun bujuk roh ja'at, tului ihkam eam ba'as nahan kojolik bolai.

⁶ Ahku nuhtui tuh eam monjadi poretah, tahpi monjadi tingak.

⁷ Kotu'uioh ahku labih jolik amat paring ulun monjadi kolou ahku. Tahpi nyinong behti ius norima pononga ijo khusus tahkan Pohotala. Ihcobehti tepun pononga tuh, ijo bohkon tepun pononga orih.

⁸ Ahkan ulun-ulun ijo jaha kawin tutang ahkan bawi-bawi ijo jari balu, jituh tingak tahkan ahku: Labih pios Konduang tehtep bolum bongon kolou ahku.

⁹ Tahpi amat Konduang eam duon monahan kojolikbolai, Konduang hondakoh kawin. Tului labih pios Konduang kawin tahkanumba kojolikbolai molambun.

¹⁰ Toharep iro ijo jari kawin jituh poretah: (Kotu'ui eam ahku, ijo nonga poretah orih rih Tuhan.) Ihcobehti bawi ijo jari kawin a'ai nohtah bosaioh.

¹¹ Tahpi amat io jari nohtahoh, io harus tohtap ara ngomosai, ata'ai buli umba bosaioh. Tutang ihcobehti bosai eam tou nulang oruhoh.

¹² Ahkan ijo dolang bohkon-bohkonoh tingak'ku iorih: – jituh tingak tahkan ahku bongok, eam tahkan Tuhan – amat ihcobehti ulun Kristen ngoruh ihcobehti bawi ijo eam porocaya umba Kristus, tutang oruhoh sotuju ahkan bolum hihco umba io, ulun kodorih eam tou nulang oruhoh rih.

¹³ Tutang amat ihcobehti bawin ulun Kristen, ngomosai ijo behti ulun ijo eam porocaya umba Kristus, tutang bosaioh sotuju nohuang hokombolum hihco umba io, mahka oruhoh rih eam tou nulang bosaioh rih.

¹⁴ Tului bosai ijo eam porocaya Kristus, mangat tou monjadi ukup ain Pohotala, tului pongawin iro umba oruhoh ijo jari monjadi ukup Pohotala. Kodorih ka'a oruhoh ijo eam porocaya mangat tou monjadi ukup ain Pohotala, kotului pongawin iro umba bosaioh ijo jari monjadi ukup ain Pohotala. Amat eam kodorih, anak-anak iro monjadi kolou anak-anak ulun kapir, podahal anak-anak orihrih tongohu kolou ukup ain Pohotala.

¹⁵ Tahpi amat ulun ijo eam porocaya rih nohtah oruhoh ata'ai bosaioh ijo Kristen, ara nahan io. A'ang hal tuh Konduangbawi ata'ai Konduangbahkas rih bebas, kobain Pohotala kani mangat Konduang bolum honong rukun.

¹⁶ Tului Konduang kolou oruh – ijo jari porocaya umba Tuhan – koloukuwoh Konduang tou kota'an honong pasti ijo Konduang eam duon nyolamat bosai'kam? Kodorih ka'a Konduang kolou bosai ijo Kristen, koloukuwohoh tou kota'an honong pasti ijo Konduang eam duon nyolamat oruh'kam?

Bolum iou koloukuwoh Konduang toniting bain Tuhan

¹⁷ Konohuangoh nyino-nyinong mohaga pombolumoh numbun toniting Tuhan, kolou ijo jari tonuhkas bain Pohotala ahkaioh, aang ohkot Pohotala na'ahoh ahkan porocaya umba Io. Orihrih poroturan ijo ahku majaroh ang nyino-nyinong ukup.

¹⁸ Pribasaoh, amat ihcobehti jari tonyunat ang kotihka io norima ta'ah Pohotala, mahka a'ai ulun orih rih ngurahjalan ngudapoh tanda-tanda sunat rih. Kodorih ka'a amat ihcobehti jaha tonyunat aang kotihka io norima ta'ah Pohotala, eam usah ulun orih rih nyawot tonyunat.

¹⁹ Tului nihtoi poroturan sunat, ata'ai eam nihtoioh koduo-duooh, sama-sama eam anai rimai ino-inon. Ijo mbahtang io rih numbun poretah-poretah Pohotala.

²⁰ Konohuangoh nyinong ulun tehtep bolum a'ang koada'an kolou kotihka io norima ta'ah Pohotala.

²¹ Amat aang ohkot Konduang tona'ah, Konduang anairih ihcobehti jihpon, eam usah Konduang susa-susah niruk hal rih. Tahpi amat noin Konduang duon kosapet ahkan jadi morodehka, nguna kosapet rih.

²² Tului ihcobehti jihpon jari porocaya umba Tuhan, anairih monjadi ulun ain Tuhan ijo morodehka. Tutang ihcobehti morodehka ijo jari porocaya umba Tuhan, anairih jihpon Kristus.

²³ Pohotala jari moli Konduang tutang lunas bayaroh. Tului orih, a'ai Konduang nyarah behti mangat monjadi jihpon kolunon.

²⁴ Jadi, Konduang-konduang koloukuwohka koada'an'kam aang ohkot tona'ah, kohondakoh Konduang tehtep bolum kolourih hihco umba Pohotala.

Tohou ulun-ulun ijo jaha kawin tutang balu-balu

²⁵ Huntuh tohou ulun-ulun ijo jaha kawin. Tohou hal orih ahku eam norima poretah ino-inon tahkan Tuhan. Olu kodorih ulun ijo tului norima pononganasi Tuhan pahtut tomorocaya, ahku kani nonga tingak iou.

²⁶ Mongingat karon kosusah ijo ahkan ngancam huntuh, ahku komo labih pios amat ulun tehtep nguan pombolumoh kolou koada'ai ijo huntuh.

²⁷ Amat Konduang jari ngoruh, a'ai ngurahjalan bolohkak tahkan oruh orih rih. Amat Konduang jaha ngoruh eam usah ngurah oruh.

²⁸ Tahpi amat Konduang kawin orih eam dosa. Kodorih ka'a amat ihcobehti dara kawin, eam rimaioh io bodusa. Tihkas, iro ijo kawin orih rih ahkan noharep aro kosusah. Tutang ahku jolik Konduang tokila tahkan kosusah-kosusah rih.

²⁹ Titunhuang'ku koloutuh, Konduang-konduang: Ihto eam anai aro ohkot hino. Nopara tahkan huntuh, nyinong ulun ijo jari ngoruh, hondakoh bolum koloujahka io eam ngoruh;

³⁰ ulun ijo nangih, bolum koloujahka io eam poros ahtoioh; ulun ijo ngota'o, koloujahka io eam jorih; ulun ijo jari moli koloujahka io eam ngina ino-inon;

³¹ tutang ulun ijo sohowu a'ang hal-hal kolunon, pahtut bolum koloujahka eam deroh bain hal-hal rih. Kobain eam tahi hino kolonon tuh, a'ang koada'ai ijo huntuh, ahkan dilap!

³² Ahku jolik mangat Konduang morodehka tahkan kosusah. Ulun ijo eam ngoruh, ahkan mbulat tirukoh aang hal-hal tohou Tuhan, kotului io jolik ngojorih Tuhan.

³³ Tahpi ulun ijo jari ngoruh ahkan aro niruk hal-hal kolunon tuh ngojorih ahtoi oruhoh;

³⁴ kojoriaioh karon-tirukoh tobagi-bagi. Ihcobehti bawi ijo eam ngomosai, ata'ai ihcobehti anakdara, ahkan aro niruk hal-hal tohou Tuhan, kotului io jolik mangat behtiu homoruaioh, monjadi ain Pohotala. Tahpi ihcobehti ulunbawi ijo jari ngomosai, io ngobulat tirukoh nitu hal-hal kolunon tuh, tului jolik io ngojorih ahtoi bosaioh.

³⁵ Ahku nyurat paringoh rih, ahkan kopios'kam bongom, eam hawui nohuang ngohana 'jotuh, ngohana 'jo-orih. Ijo ahku jolik baya mangat Konduang nguan ijo morong tutang pahtut, tutang mangat Konduang duon ngombulat tiruk'kam ahkan Tuhan.

³⁶ Amat ihcobehti komo eam molalus ijo kopahtutoh toharep kisokoh, amat io eam dahpot nahan kojolikbolaioh, tutang io komo perulu kawin umba dara orih rih. Nauhoh io nguan, inon ijo pokomooh pios; io eam bodusa, amat iro kawin.

³⁷ Tahpi amat ihcobehti jari nguan koputusan ang luwang ahtoioh ahkan eam kawin umba kisokoh, tutang tuhkas orih rih eam toropaksa, mahka ijo konuai orih rih pios, asar io ba'as nahan aropoh.

³⁸ Kolopuhtai, ulun ijo kawin pios gawiuoh, tutang ulun ijo eam kawin labih pios hino gawiuoh.

³⁹ Ihcobehti bawi ijo jari kawin lehket umba bosaioh, tihkas kotahin bosaioh bolum. Amat bosaioh jari mahtoi, ulunbawi orih rih morodehka kawin hino umba ulun ijo kojolikoh; asar pongawin orih, pongawin Kristen.

⁴⁰ Tahpi io ahkan labih utung amat eam kawin hino. Jorih auh tiruk'ku bongok, tahpi ahku komo ijo, 'jo konohawot'ku rih, lombut kobain kowasa Roh Pohotala.