1 KORINTUS 10 - BOWOT BOHUA

Pongingat tohou songiangdewa

¹ Konduang-konduang! Konduang kohondakoh, ingat inon ijo nyolung ahkan tahtu ajuh ihto, kotihka iro nutut Museh. Iro paring tonolindung bain bounondou, tutang solamat mihtah Tasik Bohandang.

² Ahkan monjadi murid-murid Museh iro paringoh ponompondus ang luwang bounondou tutang ang luwang tasik rih.

³ Iro paringoh kuman ukun rohani ijo sama,

⁴ tutang ngorih, korih Rohani ijo sama. Iro paringoh ngorih tahkan puruk bahtu rohani ijo homboh iro; puruk bahtu orihrih Kristus bongoi.

⁵ Oluka kodorih, Pohotala eam sanang toharep anaiaro tahkan louk iro, tutang orihrih kotuluioh aro otun-otun iro hokolahpah ang padang balambah.

⁶ Paringoh orih rih monjadi sutu ahkan ihto uhuntuh, mangat mopingat ihto, mangat ara jolik hal-hal ijo ja'at kolou iro.

⁷ Ka'a mangat ihto ara nyembah songiangdewa kolou ijo konuan bain 'cokabagi tahkan iro. Aang Surat Borasih tonyurat, ‘‘Mahka uhtus rih nopara kuman ngorih, tutang monari ahkan nyembah songiangdewa.’’

⁸ Ihto eam tou nguan hal-hal ijo kihal, kolou ijo konuan 'cokabagi tahkan iro. Kotului, duo pulu tolu kujan behti tahkan louk iro mahtoi ang ihco ondou tului nguan orih.

⁹ Ihto eam tou niko-nikos Tuhan, kolou ijo tonguan bain 'cokabagi tahkan iro lomoi, nyiring iro mahtoi tonunduk lohi tada.

¹⁰ Ihto eam tou ka'a bokuhtuk, kolou ijo tonguan bain 'cokobagi tahkan iro lomoi, nyiring iro ponunu bain Molehkat Pomunu.

¹¹ Paring hal rih nyolung ahkan iro mangat monjadi sutu bagi ulun-ulun bohkon. Tutang paring orih, tonyurat ka'a mangat monjadi pongingat ahkan ihto huntuh. Kotului ihto huntuh bolum aang ohkot lain jaman.

¹² Ulun ijo ngohu aropoh tombok ba'as, konohuangoh bua-buah; a'ai nyiring io bolukang.

¹³ Nyinong tihkos ijo Konduang nyuruoh, jorih tihkos ijo kobahutoh tonyuru ulun. Tahpi Pohotala bokehtep aang bowot-Oh. Io eam ahkan mohonou Konduang tonihkos molowi tahkan kosanggup ihkam. Aang ohkot Konduang nopahas bain tihkos, Io ahkan nonga jalan ahkan'kam, ahkan nyolung ba'as mangat Konduang dahpot botahan.

¹⁴ Bain kotului orihrih, Konduang-konduang ijo ahku ngasihoh, hondakoh ihkam monyingi monyembah songiangdewa.

¹⁵ Ahku nuhtui ahkan'kam, kolou ahkan ulun-ulun ijo horahti. Kohondakoh ihkam nimbangoh bongom auh'ku tuh.

¹⁶ Aang ohkot ihto ngorih anggur honong ngohawot torimakasih ahkan Pohotala, eamkah orihrih korinah, ijo ihto hihco umba Kristus a'ang popahtoi-Oh? Tutang a'ang ohkot ihto milat nulat ruhte ahkan ukun hombo-homboh, eamkah orih korinah ijo ihto, anai hihco umba behtin Kristus?

¹⁷ Bain kotuluioh tihkas anai ihco ruhte, tutang ihto paringoh kuman, tahkan ruhte ijo ihco rih ka'a, mahka ihto ijo aro tuh, monjadi ihco kobereng.

¹⁸ Cuba nohtoanioh ulun-ulun Yahudi. Iro ijo kuman ukun ijo tonyorah ang ngosan unuk ponyorahan porahpah, anai ulun-ulun ijo hihco umba unuk rih.

¹⁹ Inon konohuang'ku umba orih? Songiangdewa ata'ai ka ukun ijo tonyorah ahkan songiangdewa rih eam ngina rimai samasino.

²⁰ Inon ijo tonosorah ang unuk porahpah ahkan songiangdewa, eam tonyorah ahkan Pohotala, molekan ahkan roh-roh ja'at. Tutang ahku eam kani ihkam hihco umba roh ja'at rih.

²¹ Ihkam eam tou ngorih tahkan sakir anggur Tuhan, tutang homboh umba sakir anggur roh ja'at ka'a. Ihkam eam tou kuman ang meja Tuhan tutang kuman ang meja roh ja'at ka'a.

²² Ata'aikah ihto kani nguan Tuhan hiri ahtoi? Inonrih ihto labih ba'as tahkan Tuhan?

²³ Hion ulun, ‘‘Ihto tou nguan anginon bewe ijo ihto kani.’’ Tu'u! Tahpi eam paring ijo ihto kani rih boguna. ‘‘Ihto tou nguan inon iou ijo ihto kani.’’ – Tahpi eam paring ijo ihto kani orih rih, monombok pombolum ihto.

²⁴ Ara ihcobehti ka bousaha ahkan gunan aropoh bongoi. Nyinong ulun harus bousaha ahkan gunan ulun bohkon.

²⁵ Ihkam tou kuman inon bewe, tomodagang ang pasar usinohcin. Eam usah noliti, labih houn olu ka anai kobahat-kobahat a'ang nanyam ahtoi bua'kam.

²⁶ Kotului a'ang Surat Borasih tonyurat, ‘‘Tana tuh hawui paring usiouoh uras ain Tuhan.’’

²⁷ Amat ihkam tona'ah kuman bain ihcobehti ijo eam Kristen, tutang ihkam norima pona'ah rih, koman iou inon ijo tonyorungan ahkan'kam. Eam usah nohtoani tahkan umoh polombutoh ukun rih, mangat eam anai kobahat-kobahat ang luwang ahtoi bua'kam.

²⁸ Tahpi amat anai ijo nuhtui ahkan'kam, ‘‘Ukun tuh jari tonyorah ahkan songiangdewa,’’ a'ai kuman ukun rih, tului, gihtan kogunai ahkan ulun orih, tutang tului auh ahtoi bua.

²⁹ Konohuang'ku, bohkon auh ahtoi bua'kam, tahpi auh ahtoi bua ulun orih. Mihkoh anai ijo ngisok, ‘‘Ho, ombai komordehka'ku harus tonihkas bain auh ahtoi-bua ulun bohkon?

³⁰ Amat ahku kuman ukun honong botorimakasih ahkan Pohotala, ombai ulun harus nosalan ahku ngosan ukun rih, rahat ahku jari botorimakasih nitu Pohotala ngosan orih?’’

³¹ Inon ka ijo Konduang nguai – Konduang kumai ata'ai Konduang ngorihoh – nguan paringoh orihrih ahkan mohoromat Pohotala.

³² Bolumrih kolouorih kolou, nyiring Konduang eam kotuluioh ulun bohkon nguan dosa; inonkah iro ulun Yahudi ata'ai ulun bohkon Yahudi, ata'ai ka ukup Pohotala.

³³ Bolumrih kolou ahku. Ahku ngurahjalan ngojorih ahtoi paring ulun, a'ang kokaron angihco, earo konohuang-konohuang ijo kogunan arop bongon. Titun aik'ku anairih, mangat ahkan iro paringoh dahpot tonyolamat.