Псаломтӕ 119 - Осетинская Библия. Отдельные книги Ветхого Завета

¹ Уӕлвонг Кувӕндонмӕ цӕуджыты зарӕг. Мӕ тыхсты сахат Дунедарӕгмӕ сдзынӕзтон, ӕмӕ мын Уый дзуапп радта.

² Ӕз загътон: «О Дунедарӕг, фӕлитой дзых, мӕнгард ӕвзагӕй мӕ бахиз».

³ Мӕнгард ӕвзаг, хорзӕй дӕм цы кӕсы?

⁴ Хӕстоны цыргъ фӕттӕ, ӕрцыты судзгӕ цӕхӕртӕ.

⁵ Додойаг у мӕ сӕр: Мешехы зӕххыл, Кедары цатыры астӕу, мӕ царды бонтӕ ӕрвитын!

⁶ Ӕз рагӕй цӕрын, сабыр цард ӕнӕуынон кӕмӕн у, уыдоны ’хсӕн.

⁷ Куыддӕр сын райдайын сабырдзинадыл дзурын — хӕстӕввонг свӕййынц уыдон.