Павелонь сёрмац Колоссав 4 - Од Соткс Новый Завет на мордовском-мокша языке 2016

¹ Азорхт, тиендеда урентень мархта кода эряви и видеста. Вдь тинь содасать: тиньге ули менельса Азоронте.

² Апак лотксек озонкшнеда; озондомста уледа эрект и Шкайти сюконяйкс.

³ Озондода миньге инксонк: панжелезень Шкайсь тейнек кенкшнень Пара кулянь кандомати, сяс мес минь мяленьке азондомс Христость салавашинц колга, конань инкса мон и пякстафан.

⁴ Озондода тянксонга: катк мон панчса сонь смузенц тяфта, кода тейне эряви тянь тиемс.

⁵ Вятесть прянтень смузюста аф кемайхнень мархта, нолдасть тевс эрь цебярь пингть.

⁶ Улеза тинь корхтаманте лямбе и туза ломаттнень мяльс, кода салса почетф ярхцамбяльсь. Маштода эрть каршес максомс эрявикс вал.

Пара валонь пачфтемась

⁷ Монь колган семботь тейнть азондсы Тихик. Сон монь кельгома кемай ялгазе, кона сембоса кирдьсы эсь валонц и кона покоди монь мархтон Азорти.

⁸ Мон кучса сонь ширезонт азондомс минь тевоньконь колга и кемокстамс тинь седиентень.

⁹ Тихиконь мархта мон кучса Онисимонь, кона тинь ломанентень эзда. Сон минь кельгома кемай ялганьке и сембоса валонь кирди покодиеньке. Синь азондсазь тейнть семботь, мезе тяса эрси.

¹⁰ Аристарх, кона пякстаф монь мархтон, кучи тейнть пара вал, тяфта жа пара вал кучи Марковок, Варнавань радняц. Сонь кувалманза тейнть максфоль кошаркс: кда сай тейнть, васьфтесть сонь.

¹¹ Тяконь лаца пара вал кучи Иисус, конань лемнесазь Иустокс. Кемайхнень ёткста аньцек нят киськопень керфнень эзда. Синь покодихть мархтон Шкаень Оцязорксшити и кандыхть тейне кеняртькс и оцю лезкс.

¹² Кучи тейнть пара вал тинцень Епафрасонте. Сон Иисус Христость покодиец, кона эсь озондомасонза апак лотксек вяти тюрема тинь инксонт. Сонь мялец тяфтама: илядоледе тинь афсатыксфтомокс и педа-пес содалесть, мезе Шкайть мяленц коряс.

¹³ Мон няйса и кемокстаса: сон оцю виень путозь и апак лотксек покоди тинь инксонт и сятнень инкса, конат Лаодикиясот и Иерапольсот.

¹⁴ Лука, кельгома пчкафтысь, и тяфта жа Димас кучсазь тейнть эсь пара валснон.

¹⁵ Азода пара вал кемай ялганенди, конат Лаодикиясот, тяфта жа Нимфанонди и кемаень пуромксти, кона кочксеви сонь кудсонза.

¹⁶ Мзярда тя сёрмась ули лувф тинь ширесонт, эста мярьгода лувомс сонь Лаодикиянь кемаень пуромкссовок. А тинь лувость ся сёрмать, конань мон кучине Лаодикияв.

¹⁷ Архиппонди азость: «Ватт, педа-пес тик ся тевть, конань тейть максозе Азорсь».

¹⁸ Мон, Павелсь, эсь кядьсон сёрмадса тя пара валонь пачфтемать. Мяляфтода цинзерса пякстамазень колга. Шкаень пароказнесь улеза тинь сембонь мархтонт! Аминь.