Павелонь сёрмац Галатияв 3 - Од Соткс Новый Завет на мордовском-мокша языке 2016

Койть коряс тефне али кемамась?

¹ Галатиянь ёньфтома ломатть! Кие тяшкава сельмодедязь, нльне тинь араде аф кулхцондыкс видешити? Вдь тинь эсь сельмосонт няесть крёзти эськотьф Иисус Христость, мзярда кулхцондость монь азксозень Пара кулять колга!

² Мон ёран кизефтемс тинь фкянь колга: Шкаень Ваймопожфсь максфоль тейнть сянкса, мес тинь тиендеде койть коряс али сянкса, мес кулхцондость Пара кулять и кемаде?

³ Кали тинь тяшкава ёньфтомотада, мес ушедость Ваймопожфонь вийса, а тяни аделсесасть эсь вийсонт?

⁴ И сембось ся, мезе тинь кирдеде, ётась стакащемда? Аш кода тянди улемс!

⁵ Кода арьсетяда, Шкайсь кази тейнть Ваймопожф и тиенди ётксонт дивань тефт сяс, мес тинь тиенттяда койть кошардоманзон коряс? Афоли сяс, мес тинь кулесть Пара кулять и кемаде?

⁶ Вага, Авраамонь колга тяштьф Сёрматфксса: «Сон кемась Шкайти, и тянкса Шкайсь лувозе сонь видексшинь ломанькс».

⁷ Сяс содасть: Авраамонди идькс лувовихть сят, кит кемайхть.

⁸ Сёрматфкссь ни аноконди содазе: Шкайсь лувсыне сембе ломаньтналхнень видексшиса эряйкс синь кемамаснон инкса. Вдь Шкайсь аноконди азозе Авраамонди: «Тонь вельдет улихть бславафт сембе ломаньтналхне».

⁹ Лисенди, кемайхне бслававихть Авраамонь мархта, кона ульсь кемайкс.

¹⁰ А сембонь сятнень, кит нежетькшнихть койть коряс тиф тефнень лангс, учсыне сюдома. Вдь Сёрматфксса азф: «Сюдови эрь ломанць, кона аф пяшкодьсы семботь, мезе сёрматф коень книгаса».

¹¹ Койть вельде Шкайсь киньге аф лувсы видексшинь ломанькс, вдь тянь колга шарьхкодевиста корхтай Сёрматфкссь: «Видексшинь ломанць кармай эряма кемамать вельде».

¹² А койть юрса ащи аф кемамась, вдь эсонза азф: «Ся, кие пяшкодьсыне койть сембе кошардоманзон, кармай эряма синь вельдест».

¹³ Христос минь нолдамазь койть сюдоманц эзда. Сон минь вастозонк сявозе тя сюдомать Эсь лангозонза. Тя азф Сёрматфксса: «Сюдоф эрсь, кие повфтаф шуфтти».

¹⁴ Сембось тя ульсь сянкса: Христос Иисусонь вельде пачфтеволь лия ломаньтналхненди ся бславамась, кона надияфтфоль Авраамонди, и Шкайсь минь кемаманьконь вельде максолезе тейнек надияфтф Ваймопожфть.

Койсь аф машты полафтомс Шкайть надияфтоманц

¹⁵ Кемай ялгат, кепотьксонди мон сяван стакшинь тев. Кда уликс-паронь кадомать колга кошаркссь кемокстаф ломанень кядьса, эста тя кошаркссь киндинге ни аф полафтови и лия мезевок эзонза ни аф путови.

¹⁶ Ина Авраамонди и сонь юромонь поладыенцты Шкайсь макссь надияфтомат. Сёрматфксса азф аф «юромонь поладыензонды», а «поладыенцты», аф ламотненди, а фкяти. А тя фкясь – тя Христос.

¹⁷ Тянь вельде мон ёран азомс: койсь, кона эвондась ниле сятт колмогемонь кизода меле, аф машты полафтомс сотксть, конань Шкайсь инголи кемокстазе Авраамонь мархта, и аф машты нардамс Шкайть эзда максф надияфтомать.

¹⁸ Кда Шкайть эзда аноклаф уликс-парось макссеволь койть коряс, эста сон афоль максов надияфтомать коряс. Ина Авраамонди Шкайсь максозе Эсь уликс-паронц надияфтомать коряс.

Койсь няфтьсы пежеть и вяти Христости

¹⁹ Эста мезенди эряви койсь? Сон ладяфоль меле коень коламатнень сюнеда, и вийсонза ульсь ся пингс, мзярс ашезь са Авраамонь юромонь поладыец, конань колга максфоль надияфтомась. Койсь максфоль-ладяфоль ангелхнень вельде, а меле Моисей, Шкайть и ломаттнень ёткса тевонь якафтысь, максозе сонь евреень ломаньтналти.

²⁰ Виде, тевонь якафты аф эряви, мзярда ули аньцек фкя соткссонь тии, а Шкайсь ськамонза!

²¹ Лисенди, койсь ащи каршек Шкаень надияфтоматненди? Прокс аф! Кда максоволь кой, кона казель эряф, эста видексшись афкукс максоволь койть вельде.

²² Но Сёрматфкссь корхтай: сембе ломаттне пежеть кядялот. Лисенди, надияфтомась максови аньцек кемамать вельде Иисус Христости и аньцек сятненди, кит кемайхть.

²³ Кемамать самс койсь минь кирдемазь пякстафста и ваномазь ся пингс, мзярс ашезь панжев кемамась.

²⁴ Койсь ульсь тейнек касфтыкс-тонафтыкс Христость самс: аралеме видексшинь ломанькс кемамать вельде.

²⁵ Но тяни кемамась ни сась и минь лисеме касфтыть-тонафтыть азорксшинц алда.

Шкаень итть

²⁶ Тяфта, сембе тинь араде Шкаень идькс Христос Иисусонди кемамать вельде.

²⁷ Сембе тинь, Христосса кстиндафне, Христосса щаде, лиякс, араде Христость лаца.

²⁸ И аш тяни аф еврей, аф лия тналонь ломань; аф уре, аф воляшистонь; аф аля, аф ава, сяс мес сембе тинь сотоводе фкя-фкянь мархта и тиеводе кода фкя ломань Христос Иисусонь эса.

²⁹ А кда тинь Христосоннетяда, лисенди, тинь Авраамонь полатксонза и тейнть максови ся, мезть Шкайсь надияфтозе Авраамонди.