Павелонь сёрмац Филиппав 3 - Од Соткс Новый Завет на мордовском-мокша языке 2016

Сембода питнись – тя Христость содамац

¹ Нинге, кемай ялгане, кеняртькшнеда Азорса! Тейне аф стака тяконь колга тага весть тяштемс, а тинь тянь вельде ульхтяда аралафт лама зиянда.

² Ванфтода пря пинеда, ся васькафни тонафтыда, конат тиендихть кальдяв тефт и киськопень керфтомать вельде керсесазь-гаснесазь алятнень ронгснон!

³ Вдь афкуксонь керфне – тя минь, сяс мес минь сюконятама-покоттяма Шкайти Иняру Ваймопожфса, шнафттама пря Христос Иисусса и аф надиятама ломанень обуцятнень лангс.

⁴ А вага мон маштолень надиямс ломанень обуцятненьге лангс. Кда кие арьси, бта сонь улихть туфталонза надиямс ломанень обуцятнень лангс, азса, монь тяфтама туфталдон сяда лама.

⁵ Мон керфан кафксоце шиня, шачемас коре Израилень ломанян, Вениаминонь юромста, верс коря – ару евреян. Мон улемок фарисейкс, эрянь аньцяйняньбес койть тонафтоманц коряс,

⁶ мон оцю мяльса ёрань покодемс Шкайти и сяс улень кемаень пуромксонь панцикс, койть видексшинц коряс улень афсатыксфтомокс.

⁷ Мон семботь тянь лувондыне пяк питникс, но тяни Христость инкса лувса прокс шавокс, и мянь зиянкс.

⁸ Мон афкукс семботь лувса шавокс, сяс мес Христос Иисус Азорозень содаманц мон лувса сембодонга питникс. Сонь инксонза мон юмафтыне семботь – и тянь семботь мон лувса прокс аф эрявиксокс, сяс мес мялезе сатомс Христость.

⁹ Монь мялезе улемс марнек Христость эса и аф эсь видексшизень мархта, кона койть эзда, аф, а ся видексшить мархта, кона максови тейнек Христости кемамать вельде и конань Шкайсь макссы сятненди, кит кемайхть Тейнза.

¹⁰ Монь мялезе содамс Христость и ся вийть, кона вельмафтозе Сонь кулофнень эзда; и мялезе явомс мархтонза маятаманзон и арамс лацонза Сонь куломасонза.

¹¹ Эста кармай улема надиямазе: кода-бди монга сатса кулофнень эзда вельмамать.

Пефтома эряфонь сатомась

¹² Тяфта корхтан аф сяс, бта мон ни сатыне тянь семботь али арань афсатыксфтомокс. Но мон сембе вийсон ласькан, ёран сатомс сянь, мезенкса Христос Иисусовок сатомань монь.

¹³ Кемай ялгат, мон аф арьсян стане, бта мон ни сатыне семботь, мезе аноклась тейне Христоссь. Мон, юкснемок сянь, мезе илядсь фталу, эряскодан сянди, мезе инголе.

¹⁴ Мон сембе вийсон ласькан ся вастти, коса аделави монь ласькомазе и коса тейне максови казне. Тя казнесь – менелень эряф, конанди тердемазь Шкайсь Христос Иисусть вельде.

¹⁵ Сяс тейнек, кемамаса кенерьф ломаттненди, эряви тянь лаца арьсемс. А кда мезьса лиякс арьсетяда, сяньге панчсы тейнть Шкайсь.

¹⁶ Сяс мезенди минь пачкодеме кемамасонк, сянь коряс сяда товга карматама эряма.

¹⁷ Кемай ялгат, тиендеда сембе монь лацон и ванода сятнень лангс, кит тиендихть кепотькс коре, кона ули минь эсонк.

¹⁸ Вдь ламотне, конатнень колга мон сидеста корхнень тейнть, а тяни нльне сельмоведь мархта корхтан, эряйхть-ащихть Христость крёзонц каршек.

¹⁹ Синь песна – адса, синь шкайсна – пексна, синь прянь шнамасна – визьксшиса и синь арьсихть аньцек тя масторлангонь тефнень колга.

²⁰ А минь эряма вастоньке – менельса, тоста минь учсаськ Идить, Иисус Христос Азорть.

²¹ Сон Эсь вийсонза полафтсыне минь кулы и лафча ронгоньконь, и синь арайхть Сонь иневалдонь ронгонц лаца. Тя вийть вельде Сон машты путомс семботь Эсь кядялонза.