Павелонь сёрмац Филиппав 2 - Од Соткс Новый Завет на мордовском-мокша языке 2016

Уледа Христость лаца

¹ Тяфта, сяс мес Христосса кемокставихть тинь ваймонте, сяс мес Сонь кельгомац канды тейнть седиень петема, сяс мес тинь ули Ваймопожфонц мархта корхтаманте-ладяманте, ули фкя-фкянди кельгозь ужяльдеманте и фкя-фкянь сярятьфонь маряманте,

² пяшкодесть монь кенярдемазень: улеза ётксонт фкя мяль, сотовода фкя-фкянь мархта фкя кельгомаса, ладяда фкя-фкянь мархта и мяленте-арьсеманте улест фкат.

³ Мезевок тяда тиенде эсь прянь кельгоманкса али стакащемда прянь няфтеманкса. Катк эрсь сятявста лувсы омбоцеть эстедонза оцюкс.

⁴ Катк эрсь эздонт арьси аф аньцек эсь колганза, а тяфта жа лиятнень колганга.

⁵ Катк тинь мяленте-арьсеманте улихть Христос Иисусть мялензон-арьсеманзон лаца:

⁶ Сон фалу Шкай, и Сон сембе ширде кода Шкай, но ашезе кирде Эсь прянц Шкайть мархта фкаксшиса,

⁷ меколанкт, Сон шамдозе Эсь прянц. Сон арась уре лаца и шачсь ломанькс, и эрясь кода ломань ломаттнень ёткса.

⁸ Сон нинге сядонга ёмлалгофтозе прянц, улемок кулхцондыкс куломозонза, мянь крёз лангса куломозонза.

⁹ Тянкса Шкайсь кеподезе Сонь сембодонга вяри и максозе Тейнза инь оцю лемть сембе лепнень коряс.

¹⁰ Сяс Иисусть лемонц шнаманкса комафтсазь плманжаснон сембе, кит менельсот, модать лангсот и модать потмосот,

¹¹ и эрь кяльсь, Шкай Алять шнаманкса, азсы: «Иисус Христос – Азорсь».

Катк тинь эряфонте валдоптыхть кода тяштть

¹² Кельгома ялгат, мзярда мон улень тинь ётксонт, тинь фалу уледе кулхцондыкс. А тяни, мзярда мон ашан мархтонт, уледа сядонга кулхцондыкс. Сяс пелезь-трнатозь тиесть семботь эсь идемантень инкса.

¹³ Вдь тинь эсонт оцю вийса покоди Сонць Шкайсь, кона вятьсыне тинь мялентень и тевонтень: топафтовольхть Сонь пара арьсеманза тинь эряфсонт.

¹⁴ Семботь тиендесть аф кропцязь и шава кизефксонь аф макссезь.

¹⁵ Эста тинь ульхтяда аф муворукс и арукс, Шкаень афсатыксфтома идькс, конат эряйхть тяниень пингонь гастяф и виде киста шарфтф ломаттнень ёткса. Тинь валдопттада синь ётксост кода менелень тяштть,

¹⁶ мзярда тиенттяда эряфонь максы валть коряс. Эста, Христость сама шистонза, мон шнафтса прязень тинь мархтонт: аф стак мон ласьконь, аф стак покодень.

¹⁷ Но кда тейне сави максомс эсь прязень озксказнекс тинь озксказнентень мархта, конань тинь кандсасть Шкайти эсь кемамантень вельде, эстонга карман кеняртькшнема и кеняртькшнема тинь сембонь мархтонт.

¹⁸ Тянди тиньге кеняртькшнеда, кеняртькшнеда марса монь мархтон!

Тимофей и Епафродит

¹⁹ Мон, надиямок Иисус Азорть лангс, курок кучса тейнть Тимофеень. Мрдамстонза сон азондсы тейне кода молихть тинь тевонте, и эста монга кенярдян.

²⁰ Вдь монь аш лия тяфтама лацон арьси ялгазе, кона тяшкава виде ваймот пичедель инксонт,

²¹ сяс мес сембе вешендихть аньцек эстейст пара, а аф сянь, мезе Иисус Христость мяленц коряс.

²² Тинь тинць содасасть сянь, кода Тимофей тевса няфтезе эсь прянц валонь кирдикс: сон лезнекшнесь тейне Пара кулянь пачфнемаса, кода цёрась алянцты.

²³ Тяфта, мон надиян кучемс сонь, кодак содаса, мезе кармай улема мархтон.

²⁴ Мон Азорса пяк кеман: курок монцьке саян тейнть.

²⁵ Но тяни мон лувса эрявиксоск меки кучемс тейнть Епафродит кемай ялгазень, кона мархтон покоди фкя тевса и мархтон вяти тюрема Пара кулянь тевть инкса. Тя тинь кучсесть сонь тейне лездоманди, мзярда тя эрявкшнесь тейне.

²⁶ Сонь пяк оцю мялец няемс тинь сембонь и аф мушенды эстейнза васта, сяс мес тейнть пачкодсь куля сонь сярядеманц колга.

²⁷ Тя виде, сон сярядсь и ульсь кулома лангса, но Шкайсь кельгозь ужяльдезе сонь, и аф аньцек сонь, но и моньге. Шкайть ашель мялец касфтомс монь ризфозень.

²⁸ Сяс мон куроконе кучса тейнть Епафродитонь. Вдь мзярда тинь тага васеттяда мархтонза, тинь пяк кенярттяда и эста монь седистон валги ризфсь.

²⁹ Сяс васьфтесть сонь оцю кеняртькс мархта и Азорть кельгомаса. Тяфтама ломаттнень кирдесть пара лувксса.

³⁰ Сяс мес Сон Христости покодемать инкса ульсь кулома лангса и эсь эряфонц аф ужяльдезь тиезе тейне сянь, мезе тинь ашеде машта тиемс.