Матфей 26 - Од Соткс Новый Завет на мордовском-мокша языке 2016

Евреень озксвятихне арьсихть, кода шавомс Иисусонь

¹ Мзярда Иисус аделазе тя сембе корхтаманц, мярьгсь тонафниензонды:

² «Тинь содасасть: кафта шида меле Очижись. Эста Ломанень Цёрать мисазь и эськодьсазь крёз лангс».

³ Ся пингть озксвятиень оцюнятне, койти тонафтыхне и ломаньтналонь оцюнятне пуромсть Каиафа озксвятиень оцюнять кудозонза

⁴ и арьсесть эсь ётковаст, кода салава кундамс Иисусонь и шавомс Сонь.

⁵ «Аньцек аф Очижинь шиня, – корхтасть синь, – афольхть кеподе ломаттне».

Иисусть танцти шине вайса вадемац

⁶ Мзярда Иисус ульсь Вифанияса Симононь пяле, кона инголи сярядсь наксафты урмаса,

⁷ нажядсь Тейнза ава алебастрань сяканя мархта, конац пяшксель пяк питни и танцти шине вайда. Авась кайсезе вайть Иисусонь пряванза, мзярда Сон ярхцась.

⁸ Тянь няемста тонафнихе кяжиясть и эсь ётковаст корхтасть: «Мезенди тяфтама карьхцнень тиендемс?

⁹ Тя вайсь пяк питниста миволь, а ярмакне максовольхть ашуфненди».

¹⁰ Иисус кулезе тянь и мярьгсь тейст: «Мезенди кольфнесасть авать мяленц? Сон пара тев тись Тейне.

¹¹ Ашуфне фалу кармайхть мархтонт, а Мон улян мархтонт аф фалу.

¹² Валомок Монь тя вайса, сон аноклазе ронгозень калмамас.

¹³ Видеста корхтан тейнть: сембе масторть келеса, коса азондсазь тя Пара кулять, тоса аватьке лятфтасазь и сянь, мезе сон тись».

Иуда срхкась мимс Иисусонь

¹⁴ Эста кемгафтува тонафнихнень эзда фкясь, конань лемоцоль Иуда Искариот, тусь озксвятиень оцюнятненди

¹⁵ и корхтай: «Мезе макстада тейне, кда мон миса тейнть Иисусонь?» Синь надияфтсть тейнза тянкса максомс сиянь колмогемонь ярмак.

¹⁶ И ся пингста сявомок Иуда кармась вешендема ётка, мзярда мимс Иисусонь.

Очижинь илядень ярхцамась

¹⁷ Аф шапама кшинь илать васенце шистонза Иисусонди нажядсть тонафниенза и кизефнесазь: «Коза мярьгат анокламс Тейть очижинь ярхцамать?»

¹⁸ Иисус мярьгсь: «Арда ошу тяфтама-тяфтама ломанти и мярьгода тейнза: "Тонафтыеньке корхтай: Монь пингозе сась. Тонь ширесот Мон ётафтса очижить Эсь тонафнинень мархта"».

¹⁹ Тонафнихне тисть стане, кода мярьгсь Иисус, и анокласть очижинь ярхцама.

²⁰ Мзярда сась илядьсь, Иисус озась шрать ваксс тонафниензон мархта.

²¹ Ярхцамста Иисус мярьгсь: «Видеста корхтан тейнть: ёткстонт фкясь мисамань Монь».

²² Тонафнихне прасть оцю ризфс и ушедсть фкя-фкянь мельге кизефнема: «Азор, тя аф монан?»

²³ Иисус каршезост мярьгсь: «Монь мисамань ся ломанць, кона навасы кшинц мархтон марса фкя шавас.

²⁴ Ломанень Цёрась моли стане, кода сёрматф колганза, но вай кодань кальдяв ули ся ломанти, кона мисы Ломанень Цёрать! Ся ломанти сяда пара улель афи шачендомс».

²⁵ Эста Иуда, конац ёразе Сонь мимс, кизефнесы: «Тонафты, тя аф монан?» Иисус каршезонза мярьгсь: «Тон тянь азыть».

²⁶ Мзярда синь ярхцасть, Иисус сявозе кшить, бславазе, синдезе и, явондозь тонафниензонды, мярьгсь: «Сявость и ярхцада, тя Монь ронгозе».

²⁷ Сяльде сявозе кядьготь, азсь сюконяма Шкайти, венептезе тонафниензонды и мярьгсь: «Симода эздонза сембе,

²⁸ тя Монь верозе, од сотксонь вер, кона валови сембе ломаттнень пежеснон нолдаманкса.

²⁹ Корхтан тейнть, тячиень шиста сявомок Мон аф симан виноградонь винада ся шить самс, мзярда Мон тинь мархтонт симан од винада Алязень Оцязорксшисонза».

³⁰ Шкайти шнама моронь морамда меле синь тусть Вайшуфта пандть лангс.

Иисус инголькиге азонды Пёторонь потаманц колга

³¹ Эста Иисус корхтай тейст: «Тя веня тинь сембе Монь эздон потатада, вдь азф Сёрматфксса: "Шавса учань ваныть и учатне срадыхть".

³² Но вельмамдон меле Мон тиндедонт инголи молян Галилеяв».

³³ Пётр корхтай каршезонза: «Кда мянь сембе Тонь эздот потайхть, мон тянь мзярдовок аф тиса».

³⁴ «Видеста корхтан тейть, – мярьгсь тейнза Иисус, – тя веня атёкшсь аф кенери моразевомс, кода тон колмоксть потат Монь эздон».

³⁵ Пётр тага корхтай Тейнза: «Кда тейне саволь мархтот куломс, эстовок афолень пота эздот». Тяфта корхтасть сембе лия тонафниензовок.

Иисус озонды Гефсиманиянь переса

³⁶ Сяльде Иисус сась тонафниензон мархта ся вастти, кона лемневи Гефсимания, и корхтай тейст: «Ащеда тяса, мзярс Мон молян озондан тоса».

³⁷ Сон сявозень мархтонза Пёторонь и Зеведеень кафцьке цёранзон. Иисус прась ризфс и тошнас.

³⁸ Сон корхтай тейст: «Куломшка ризнай ваймозе. Ащеда тяса мархтон и тяда уда».

³⁹ Иисус аердсь аф ламода шири, прась модать лангс и ушедсь озондома: «Аляй! Кда ули кода, ётафтк маятамань кядьготь Монь вакскан. Аньцек улеза аф Монь, а Тонь мяльцень коряс».

⁴⁰ Иисус мрдась тонафниензонды и сатозень синь удозь. Корхтай Пёторонди: «Вов, тинь Монь мархтон фкя частовок ашеде кирдев апак удок?

⁴¹ Тяда уда, озондода: варчсемстонт афоледе пра пежес. Ваймось анок паронь тиемс, а ронгсь лафча».

⁴² И омбоцеда Иисус аердсь озондома: «Аляй! Кда аф ётафтови вакскан тя маятамань кядьгось, и Тейне эряви сонь симомс, эста катк ули Тонь мяльцень коряс».

⁴³ Мрдамстонза Сон тага сатозень синь удозь, сяс мес сельмосна коневсть.

⁴⁴ Иисус тага аердсь шири и кармась колмоцеда озондома сяка валса.

⁴⁵ Сяльде мрдась Эсь тонафниензонды и корхтай тейст: «Тинь нинге удотада и ваймосетяда? Вага, сась пингсь, мзярда Ломанень Цёрась максови пежуфнень кядьс.

⁴⁶ Стяда, аряда! Вага, Монь миизе маладсь».

Иисусонь кундамац

⁴⁷ И мзярда Иисус нинге корхтась, сась Иуда, кемгафтува тонафниензон эзда фкясь. Сонь мархтонза сась тор и пяль мархта лама ломань, конатнень кучезь озксвятиень оцюнятне и ломаньтналонь оцюнятне.

⁴⁸ Иуда инголькиге ладязе мархтост, кода тейст содамс Иисусонь: «Кинь паласа, ся Сон, Сонь сявость».

⁴⁹ Иуда эстокиге нажядсь Иисусонди и мярьгсь: «Шумбрат, Тонафты!» И палазе Сонь.

⁵⁰ Иисус корхтай тейнза: «Ялгай, мезенди тон сать?» Эста лиятневок нажядсть Иисусонди, фатязь Сонь, и сявозь пякстамс.

⁵¹ И тяса, Иисусонь мархта ащихнень эзда фкясь таргась тор, яфодсь озксвятиень оцюнять покодиенц лангс и керозе пиленц.

⁵² Эста Иисус мярьгсь тейнза: «Путк торцень вастозонза, сяс мес эрсь, кие кеподи тор, ся эздонза и кулы,

⁵³ али арьсят: Тейне афоль вешев Алязень кядьста лезкс? Сон эстокиге кучель Тейне кемгафтува легионда лама ангел!

⁵⁴ Но эста афольхть пяшкоде Сёрматфксонь валхне, конат корхтайхть: тянди улема».

⁵⁵ Меле Иисус мярьгсь ломаттненди: «Тинь саде Монь сявомс торса и пяльса, кода нельги-шави ломанень мельге! Мон эрь шиня озафолень мархтонт Шкаень кудса и тонафтонь, и тинь ашемасть сявонде.

⁵⁶ Но сембось тя лиссь пророкнень сёрматфснон пяшкодеманкса». Эста сембе тонафнихне кадозь Иисусть и ворьгодсть.

Иисус Оцю пуромксть инголе

⁵⁷ Иисусонь фатяенза вятезь Сонь Каиафа озксвятиень оцюняти. Тоза пуромсть ни койти тонафтыхне и ломаньтналонь оцюнятне.

⁵⁸ Пётр мольсь ичкозьге Иисусонь мельге озксвятиень оцюнять пирьфонцты пачкодемс. Сувась, озась Шкаень кудть ванфтыензон ёткс и кармась учсема, мезьса тя сембось аделави.

⁵⁹ Озксвятиень оцюнятне, ломаньтналонь оцюнятне и сембе Оцю пуромкссь вешендсть васькафни няфтемат Иисусонь каршес. Тяфта улель туфталсна максомс Сонь куломас.

⁶⁰ Аньцек кодамовок туфтал ашесть мушенда, хуш васькафни няида-кулида ульсь пяк лама. Мекпяли лиссть кафта ломатть

⁶¹ и мярьгсть: «Тя Ломанць корхнесь: "Тейне срафтови Шкаень кудсь и колма шиста меки тиеви"».

⁶² Эста озксвятиень оцюнясь стясь и кизефтезе Иисусонь: «Мес мезевок аф корхтат? Тейть аш мезе азомс синь няфнемаснон каршес?»

⁶³ Но Иисус ащесь апак каштортт. Тага озксвятиень оцюнясь пшкядсь Тейнза: «Мярьган Тейть: эряй Шкайть лемса варазь азк тейнек – Тон Христоссят, Шкайть Цёрацат?»

⁶⁴ Иисус каршезонза корхтай: «Тон тянь азыть. И нинге тейнть мярьган: курок тинь няйсасть Ломанень Цёрать, кона ащи озада Виить види кядь ширесонза и кона сай менелень коволхнень лангса».

⁶⁵ Эста озксвятиень оцюнясь сязезе щамонц и мярьгсь: «Сон сялдсы Шкайть! Кодама нинге няихть-кулихть тейнек эрявихть? Тинь тинць тяни кулесть, кода Сон сялдсы Шкайть!

⁶⁶ Мезе мярьктяда?» Синь корхтайхть каршезонза: «Сон мувору и Тейнза кулома!»

⁶⁷ Сяльде синь кармасть сельгондема шамазонза и эрьхнемонза. Кой-конат пикссезь шама ланга

⁶⁸ и корхтасть: «Христос, пророчендак тейнек, кие Тонь эрьхтензе!»

Пётр потай Иисусонь эзда

⁶⁹ Пётр озафоль озксвятиень оцюнять кудонц пирьфса. И нажядсь тейнза покоди ава и мярьгсь: «Тонга улеть Галилеянь Иисусть мархта».

⁷⁰ А Пётр сембонь ингольде сёпсь: «Мон аф шарьхкодьса, мезень колга тон корхтат».

⁷¹ Ортава лисемста лия покоди ава няезе сонь и мярьгсь тоса ащихненди: «Тявок ульсь Назаретонь Иисусть мархта».

⁷² Пётр тага сёпсь и мярьгсь: «Варан, мон Сонь аф содаса».

⁷³ Аф лама пингта меле Пёторонди нажядсть тоса ащихне и мярьгсть тейнза: «Видекс тон эздост фкясят, тя шарьхкодеви корхтамаценьге коряс».

⁷⁴ Эста Пётр кармась варама Шкайть лемонц кунцезь: «Мон аф содаса Тя Ломанть». Тяса моразевсь атёкшсь,

⁷⁵ и Пётр лятфтазень Иисусонь валонзон: «Атёкшсь аф кенери моразевомс, кода тон колмоксть потат Монь эздон». Сон лиссь и ризфта пяшксе седиса аварьгодсь.