Матфей 11 - Од Соткс Новый Завет на мордовском-мокша языке 2016

Иоанн Кстиндайть кизефксоц Иисусти

¹ Мзярда Иисус аделазе тонафтоманц кемгафтува тонафниензонды, Сон тусь тонафтома и Пара кулять кандома сяда тов лия ошева.

² Иоанн пякстамгудса кулезе Христость тевонзон колга и кучезень эсь тонафниензон кизефтемонза Сонь:

³ «Тон Ся, кинди сама, али учемс тейнек киньге лиянь?»

⁴ Иисус мярьгсь каршезост: «Арда, азондость Иоаннонди, мезе кульхтяда и няйхтяда:

⁵ сокорхне няихть и шаморхне якайхть, наксафты урмаса сярядихне аруякшнихть и пяряфне кулихть, кулофнень вельмафнесазь и ашуфненди пачфневи Пара кулясь.

⁶ Павазу ся, кие аф юмафтсы Тейне кемамать».

Иисус азонды Иоанн Кстиндайть колга

⁷ Мзярда Иоаннонь тонафниенза тусть, Иисус кармась корхтама ломаттненди Иоаннонь колга: «Мезень ванома тинь якаде шавмодав? Нюдить, конань шерьфтьсы вармась?

⁸ Ина мезень ванома якаде тинь? Арьседе няемс козя щамса щаф ломань? Козя щамса якайхне – оцязоронь кудсот.

⁹ Ина мезень ванома якаде тинь? Пророконь? Виде, Мон азса тейнть, сон пророкта оцю.

¹⁰ Сон ся, конань колга сёрматф: "Тонь инголет Мон кучса кулянь кандыезень, и сон анокласы Тейть кить".

¹¹ Видеста корхтан тейнть: сембе шачфнень ёткса ашель Иоанн Кстиндайда оцю ломань, но сембода ёмлась Менелень Оцязорксшиса сондедонза оцю.

¹² Иоанн Кстиндайть пингста сявомок тячиень шить самс Менелень Оцязорксшить лангс врьгяткшнихть, и врьгятихне сявсазь сонь.

¹³ Вдь сембе пророкне и койсь Иоаннда инголи пророчендасть Менелень Оцязорксшить колга,

¹⁴ и Иоанн, кда мяленте кемамс – тя Илиясь, конанди эрявсь самс.

¹⁵ Кинь улихть пиленза, ся катк кульсы!

¹⁶ Кинь лангс шарыхть тя пингонь ломаттне, Монь койсон? Синь кода шабат, конат озафт мишендема-рамсема вастова и фкя-фкянди пешкоткшнихть:

¹⁷ "Минь мораме тейнть нюдиса, и тинь ашеде кшти, минь мораме тейнть явсемань морхт, и тинь ашеде аварде".

¹⁸ Сась Иоанн, сон аф ярхцай, аф сими винада, и ломаттне корхтайхть: "Эсонза кяжи ваймопожф".

¹⁹ Сась Ломанень Цёрась, ярхцай и сими, синь корхтайхть колганза: "Ванода, вов тетькись и симилась, каяфксонь кочкайхнень и лия пежуфнень ялгасна". Но Шкаень смузьшить видешиц няфтеви тевса».

Иисус апрякасыне Галилеянь ошнень Шкайти аф шарфтоманкса

²⁰ Сяда меле Иисус кармась апрякамост ся ошнень, конатнень эса Сон тись сембода лама вии тевда, но конат сякокс ашесть шарфта Шкайти.

²¹ «Кальдяв тейть, Хоразин ош! Кальдяв тейть, Вифсаида ош! Кда ся вии тефне, конат няфтьфтольхть тинь ётксонт, улельхть няфтьфт Тирса и Сидонца, ся ошэряйхне ризнамань щамса и кулуса почетфста кунаркиге ни шарфтольхть эсь пежеснон эзда.

²² Сяс корхтан тейнть: Тирти и Сидонти судонь шиня ули сяда тёждя тинь корязонт.

²³ И тон, Капернаум, арьсят, менели кепоттядязь? Аф, тон аду улят ёрдаф. Кда Содомса улельхть тифт ся вии тефне, конат тифтольхть тонь ширесот, эста сон ванфтоволь тячиень шис.

²⁴ Корхтан тейнть: Содом масторти судонь шиня ули сяда тёждя тонь корязт».

Шкайсь панжеви ломаттненди Цёрать вельде

²⁵ Меле Иисус мярьгсь: «Аляй, менельть и масторть Азороц! Шнате Тонь сянкса, мес Тон кяшить тянь смузюфнень и шарьхкодихнень эзда и панжить тянь ёмла иттненди.

²⁶ Виде, Аляй, вдь тяфтама ульсь Тонь пара мяльце.

²⁷ Алязе семботь максозе Монь кядялон. Кивок аф содасы Цёрать Аляда башка, и кивок аф содасы Алять Цёрада башка и сяда башка, кинди Цёрась ёрасы панжемс Сонь».

Иисус максы ваймама

²⁸ «Сада Тейне сембе, конат сизефт покамать и стака сталмонь кандомать эзда, и Мон ваймафттядязь тинь.

²⁹ Щафтость Монь ашкозень эсь лангозонт и тонадода эздон, сяс мес Мон сятяван и ляпе седиян. Тяфта мутада ваймонтенди ваймама васта.

³⁰ Вдь Монь ашкозе аф стака и канксозе тёждя».