Иоаннонди панчф няйфкс 21 - Од Соткс Новый Завет на мордовском-мокша языке 2016

Од менельсь и од масторсь

¹ Мон няине од менельть и од масторть. Вдь васенце менельсь и васенце масторсь юмасть сембе пингс, оцюведське ашель ни.

² И мон, Иоанн, няине иняру ошть, од Иерусалимть. Сон валгсь менельста Шкайть эзда. Ошсь щафоль-каряфоль кода рьвяня, конань мазоптозь рьвяяйти.

³ Мон кулень менельста кайги вайгяль, кона корхтась: «Ванода, Шкайть эряма вастоц ломаттнень ёткса. Сон кармай эряма синь мархтост. И синь арайхть Тейнза ломаньтналкс, и Сонць Шкайсь ули мархтост и кармай улема тейст Шкайкс.

⁴ Сон нардасы синь сельмостост эрь сельмоведнять: аф ули ни кулома, аф ули оду ризф, аф авардемат, аф сярятьф, сяс мес ингольденнесь сембось тусь».

⁵ Эста мярьгсь Ся, кона озадоль оцязоронь озама вастса: «Вов, Мон семботь тиса одкс». И поладозе: «Сёрматк, сяс мес ня валхне видет и синь лангозост ули кода надиямс».

⁶ Сон тага мярьгсь тейне: «Ня валхне пяшкодсть! Мон Альфась и Омегась, Ушеткссь и Песь. Сянь, кинь сась симомац, Мон питнефтома симдьса эряфонь максы лихтибряста.

⁷ Семботь тянь Мон максса сяськити, и улян тейнза Шкайкс, сон – Тейне идькс.

⁸ А пелихнень, кемамать эзда потайхнень, сембе туткоткснень, ломанень шавихнень, усксевихнень, колдувайхнень, аф афкуксонь шкайхненди сюконяйхнень и сембе васькафнихнень вастсна эрьхкса, кона палы толса и палыкандорса. Тя омбоце куломась».

Од Иерусалимсь

⁹ Меле сась фкясь сисем ангелхнень эзда, конатнень кядьсольхть мекольце сисем кальдяфнень мархта сисем кядьготне. Сон мярьгсь тейне: «Сак сей, мон няфтьса тейть рьвянять, Верозть сай пингонь рьванц».

¹⁰ Мон повонь Шкаень Ваймопожфть кядялу и ангелсь кеподемань оцюдонга оцю, сери панда пряс и няфтезе тейне Иерусалим иняру ошть, кона валгсь менельста, Шкайть эзда.

¹¹ Тя ошсь вандолдсь Шкаень иневалдса, и тя вандолфсь ульсь питни кевнянь пиндолдома лаца, кристаллкс ащи яшмань кондяма.

¹² Ошть персезе оцю, сери перяфкс, и эсонза ульсть кемгафтува ортат, и кемгафтува ортатнень видеса ащесть кемгафтува ангелхт. Ортатнень лангс тяштьфтольхть Израилень кемгафтува юропнень лемсна, эрь ортаса фкя лем.

¹³ Шинь стяма ширде ульсть колма ортат, кельме ширде – колма, лямбе ширде – колма, шинь валгома ширденьге – колма.

¹⁴ Ошть перяфксоц ащесь кемгафтува кевонь юр лангса, и сятнень лангса – Верозть кемгафтува апостолонзон лемсна, фкя лем эрь кевть лангса.

¹⁵ Монь мархтон корхтай ангелть кядьса ульсь ункстамань зрнянь байдек, конаса сон срхкась ункстамс ошть, ошть ортанзон и перяфксонц.

¹⁶ Ошсь ульсь квадрат лаца, келенек-кувалмонек фкя лацоль. Ангелсь ункстазе байдекса ошть, лиссь кемгафтува тёжянь стадион, и сонь келец, серец и кувалмоц фкатольхть.

¹⁷ Ошень перяфкстьке ункстазе: лиссь сяда нильгемонь нилие кенерьбакарь ломанень ункстамаса, тяка ункстамаса ункснесь ангелське.

¹⁸ Ошть перяфксоц ульсь яшма кевонь, а сонць ошсь тифоль сяшкава ару зрняста, кода ару клянцек.

¹⁹ Ошень перяфксть кевонь юронза мазопфтольхть эрь кодама питни кевняса. Васенце кевсь ульсь яшма, омбоцесь – сапфир, колмоцесь – халцедон, нилецесь – изумруд,

²⁰ ветецесь – сардоникс, котоцесь – сердолик, сисемцесь – хризолит, кафксоцесь – берилл, вейхксоцесь – топаз, кемонцесь – хризопраз, кефкиецесь – гиацинт и кемгафтувоцесь – аметист.

²¹ А кемгафтува ортатне – тя кемгафтува жемчукт: эрь ортась тиф фкя жемчугста. Ошень ульцясь – ару зрня, кода клянцек, конань пачка няят.

²² А вага Шкаень кудть ашине няе ошса, сяс мес Сембонь Кирди Азор Шкайсь сонь Шкаень кудоц, и Верозсь.

²³ Ошти ашесть эряв аф шинь, аф ковонь валдсь, сяс мес сонь валдоптозе Шкайть иневалдоц, и сонь валдоптомац – Верозсь.

²⁴ Ошть валдсонза кармайхть эряма идеф ломаньтналхне, и масторлангонь оцязорхне кандсазь тяза эсь козяшиснон и оцюшиснон.

²⁵ Ошень ортатне улихть панжадот шиньберьф, синь мзярдонга аф кармайхть пяксневома, вдь тоса ве аф кармай улема.

²⁶ Тя ошти кандови ломаньтналхнень козяшисна и оцюшисна.

²⁷ И аф сувави тоза мезевок аф ару, аф сувави тоза кивок туткоткс и васькафнемань тевонь тии. Сувайхть аньцек сят, конатнень лемсна сёрматфт Верозть эряфонь книгазонза.