Иоаннонди панчф няйфкс 20 - Од Соткс Новый Завет на мордовском-мокша языке 2016

Тёжянь кизонь оцязорксшись

¹ Мон няень менельста валги ангел, конань кядьсонзоль потмаксфтома томбать эзда панжемась и оцю цинзер.

² Ангелсь кундазе драконть – кунардонь куйть, кона лиякс лемневи идемэвозькс и Сатанакс, сотнезе сонь цинзерса тёжянь кизос и

³ ёрдазе потмаксфтома томбати. Томбать пякстазе панжемаса и лангозонза путсь тяштькс, тязалезень васькафне куйсь ломаньтналхнень, мзярс аф ётайхть тёжянь кизотне. Сяльде сонь эряви нолдамс аф лама пингс.

⁴ Мон няень оцязоронь озама вастт, конатнень лангс озасть сят, кинди максфоль азорксши судендамс. Тяфта жа мон няине сятнень ваймоснон, кинь пряснон керозь Иисусонь колга азондомать инкса и Шкаень валть инкса. Синь ашесть сюконякшне аф кяжи жуватати, аф сонь ликонцты, и ашезь путфта сонь тяштьфксонц аф конязост, аф кядезост. Синь вельмасть и азорондасть Христость мархта тёжянь киза.

⁵ А лядыкс кулофне ашесть мрда эряфти, мзярс аф аделавихть тёжянь кизотне. Тя васенце вельмамась.

⁶ Павазуфт и иняруфт сят, конатненди максови эряф васенце вельмамать пингста. Омбоце куломать аш азорксшиц синь лангсост, но синь улихть Шкаень и Христосонь озксвятикс и кармайхть оцязорондама Христость мархта тёжянь киза.

Сатанать машфтомац

⁷ А мзярда ётайхть тёжянь кизотне, Сатанась нолдави пякстама вастстонза и тага кармай васькафнемост масторть ниле пева ащи ломаньтналхнень, конатнень лемсна Гог и Магог. И сон кочкасыне синь тюремас. Синь эздост пяк лама, кода оцюведть трваса шуварда.

⁸ Синь вельхтязь марнек модать и перязь Шкаень ломаттнень ащема вастснон и Шкайть кельгома ошенц.

⁹ Эста менельста Шкайть эзда валгсь тол и нилезень синь.

¹⁰ А идемэвозсь, кона васькафнезень синь, ёрдафоль толонь и палыкандоронь эрьхкти, косольхть ни кяжи жуватась и аф афкуксонь пророксь. Кармайхть тоса синь маятафтомост шинек-венек и пефтома пингс.

Мекольце судсь

¹¹ Тяда меле мон няень оцюдонга оцю акша оцязоронь озама васта и Сянь, кие озадоль лангсонза. Сонь шамаликонц эзда ворьгодсть модась и менельсь, и синь прокс юмасть.

¹² Мон няине кулофнень, ёмлатнень и оцюфнень, конат ащесть Шкайть инголе. И няине кода панжезь книгатнень. Тяфта жа панжезь эряфонь книгатьке, и судендазь кулофнень синь тевснон коряс, кода сёрматфоль книгатнень эса.

¹³ Эста оцюведсь максозень кулофнень, конат ульсть эсонза, Куломась и Адсь максозь кулофнень, конат ульсть синь кядьсост, и эрть судендазь тиф тевонзон коряс.

¹⁴ Тяда меле Куломась и Адсь ёрдафтольхть толонь эрьхкти. Толонь эрьхксь – тя омбоце куломась.

¹⁵ Кинь лемоц ашель сёрматф эряфонь книгати, ся ёрдафоль толонь эрьхкти.