Иоаннонди панчф няйфкс 19 - Од Соткс Новый Завет на мордовском-мокша языке 2016

Сюконямань мор видексшинь судонкса

¹ Тяда меле мон кулень кайги вайгяль, бта пяк лама ломань морась менельса: «Аллилуйя! Идемась, шнамась, пара лувкссь и вийсь минь Азороньконди,

² сяс мес видексшинь и афкуксонь Сонь судонза: Сон судендазе ся инь оцю усксеви авать, кона наксафнезе масторть эсь усксевомасонза. Шкайсь пантфтозе кядьстонза шумоть Эсь покодиензон верснон инкса».

³ И омбоцеда моразевсть: «Аллилуйя! Палы ошть качамоц кеподи пефтома пингс».

⁴ Эста комсь нилие атятне и ниле эряй ваймотне прасть и сюконясть Шкайти, кона озаф оцязоронь озама вастсонза, и мярьгсть: «Аминь! Аллилуйя!»

Верозть рьвяямань каванямань илац

⁵ Оцязоронь озама вастть ширде кайгозевсь вайгяль, кона корхтась: «Шкайть сембе покодиенза, шнасть Шкаеньконь, сембе, кит ванцазь Сонь мяленц, ёмланек-оцюнек!»

⁶ Сяльде мон кулень бта пяк лама ломанень вайгяль, кона ульсь кода лама ведень увф и кода вии атямонь торама, сон корхтась: «Аллилуйя! Азор Шкайсь, Сембонь Кирдись, кармась оцязорондама!

⁷ Эрь кенярттяма оцю кенярдемаса и шнасаськ Шкаеньконь, сяс мес сась Верозть рьвяямань илац, рьвянясь аноклась пря ни.

⁸ Шкайсь щазе сонь ару и пиндолды илянязонь щамса». Иляназонь щамсь – тя Шкаень ломаттнень видексшинь тевсна.

⁹ Ангелсь мярьгсь тейне: «Сёрматт: павазуфт сят, кит тертьфт Верозть рьвяямань илань каванямас». И нинге сон мярьгсь: «Нят Шкаень виде валхне».

¹⁰ Эста мон прань сонь пильгозонза тейнза сюконязь, но сон мярьгсь тейне: «Ватт, тяк тиенде тянь! Монга Шкаень покодиян, кодамат тон и тонь ялгатне, конат азондыхть Иисусонь колга. Шкайти сюконяк! И содак: Иисусонь колга азондомась – тя пророчендамань ваймопожф».

Акша алаша и ластяец

¹¹ Мон няень панжада менель и, вов, акша алаша и лангсонза ластя. Сонь лемоц Валонь Кирди и Виде, и Сон видеста судендай и тюри каршек ащихнень мархта.

¹² Сонь сельмонза кода палы тол, прясонза пяк лама оцязоронь каштазда. Сонь ульсь лемоц, кона сёрматфоль лангсонза, конань кивок, Эстедонза башка, аф содасы.

¹³ Сон срхкафоль верса валф щамса и Сонь лемоц: «Шкаень Вал».

¹⁴ Мельганза акша алашаса ардсть менелень ушмовийхне, конат щафольхть ару и акша иляназонь щамса.

¹⁵ Ластять кургстонза лиси оржа тор, конаса Сон эрьхтьсыне ломаньтналхнень, и Сон кармай ваномост синь кшнинь байдекса. Сон люпшнесы виноградонь люпштама лоткса Сембонь Кирди Шкайть кяжса лакай винанц.

¹⁶ Щамонц лангса, пукша видесонза, тяштьф лем: «Оцязорхнень Оцязорсна и азорхнень Азорсна».

¹⁷ Мон няень фкя ангел, кона ащесь вяре шить лангса и ювадсь сембе нармоттненди, конат лийсть вярдень менельге: «Сада, кочкавода Шкаень оцюдонга оцю каванямати!

¹⁸ Сада ярхцама кулоф оцязорхнень сивольдост, ушмовятихнень и ушматтнень сивольдост, алашатнень и ластятнень сивольдост – сембонь сивольдост: воляшистотнень и уретнень, оцюфнень и ёмлатнень!»

¹⁹ И мон няине кяжи жуватать и масторлангонь оцязорхнень, и синь ушмовийснон. Синь пуромфтольхть марс и срхкафнесть тюрема алаша лангса Ластять и Сонь ушмовиенц каршес.

²⁰ Кяжи жуватась кундафоль, а мархтонза аф афкуксонь пророкське, кона тиендсь кяжи жуватать инголе дивань тяштькст и васькафтозень сятнень, кит путфтозь эстейст кяжи жуватать тяштьфксонц и сюконякшнесть сонь ликонцты. Кяжи жуватась и аф афкуксонь пророксь живста ульсть ёрдафт юрнай палыкандоронь эрьхкти.

²¹ Лядыхне шавфтольхть Ластять торса, кона лиссь кургстонза. И сембе нармоттне топодемс ярхцасть синь сивольдост.