Еврейхненди сёрмась 9 - Од Соткс Новый Завет на мордовском-мокша языке 2016

Ташта сотксть ладяфксоц озксвятемать колга

¹ И сяс, васенце сотксть ульсь ладяфксоц озксвятемать колга, и ульсь масторлангонь иняру вастоц.

² Тя вастокс ульсь иняру кошсь. Сонь ингольдень пялькссонза ащесть валдоптомань кирдемась, шрась и Шкайть инголи путф кшись. Тя пялькссь лемневсь «иняру».

³ А потмонь пяльксонц, кона ульсь омбоце котфонь перяфксть фтала, лемнезь «иняруда-иняру».

⁴ Сонь потмосонза ащесь ладанонь плхтаманди зрнянь алтарь и сотксонь арзя, кона сембе ширде вельхтяфоль зрняса. Тя арзяса кирдевсть манна мархта зрнянь кядьгось, Аарононь байдекоц, кона нолдась лопат, и кевонь седяфне, конатнень лангса сёрматфтольхть Шкайть кошардомвалонза.

⁵ Арзять лангса ащесть херувипт-ангелхт, конат ульсть Шкаень иневалдонь няфтикс. Синь эсь пацяснон келептезь пежень нолдама вастть вельхксса. Сембонь тянь колга тяни корхтамс сяда крхкаста аф эряви.

⁶ Мзярда сембось тифоль тянь лаца, ингольдень пяльксти эрь шиня сувсесть озксвятихне озондомань-покодемань ётафтома.

⁷ А иняру кошть потмонь пяльксозонза весть кизоти сувси аньцек озксвятиень оцюнясь и фалу вер мархта. Тя верть сон каннесы эсь инксонза и ломаньтналть пежензон инкса, конатнень синь тиезь аф содамошиснон сюнеда.

⁸ Тяфта Иняру Ваймопожфсь няфнесы: мзярс ащи иняру кошть ингольдень пяльксоц, иняруда-иняру пяльксти аш кода сувамс.

⁹ Тя сембось кода тяштькс, кона няфти тяниень пингть лангс: канневихть казнет и озксказнет, аньцек синь вельдест аф тиеви арукс и афсатыксфтомокс кандыть ваймовайгялец.

¹⁰ Вдь ня обуцятне кода ярхцамаське, симомаське, и эрь кодама штамаське – аньцек ронгонь кошардомат, конатнень вийсна кирди полафтомань пингть самс.

Од сотксонь озксказнесь

¹¹ Но вага сась Христоссь Озксвятиень оцюнякс, и Сонь вельденза тейнек максови сембе Шкаень парось. Сон ётась сяда оцю и сяда афсатыксфтома иняру кошень пачк, кона тиф аф ломанень кядьса, лиякс мярьгомс, тя аф масторлангонь тев.

¹² Сон сувась иняруда-иняру пяльксти аф сяватнень и вазнятнень верснон вельде, а Эсь веронц вельде. Сон весть и сембе пинкненди кандозе ломаттненди идемать пефтома пингс.

¹³ Вдь кда сяватнень и букатнень версна и плхтаф ведражень кулусь, конат валондовихть аф аруфнень лангс, максы тейст лангонь аруши койть топафтоманкса,

¹⁴ эста конашкава сяда аруяфты Христость вероц! Пефтома пингонь Иняру Ваймопожфть вельде Сон кандозе Эсь прянц афсатыксфтома озксказнекс Шкайти. Сонь вероц аруяфтсыне ваймовайгяленьконь кулоф тефнень эзда и тисамазь минь маштовиксокс эряй Шкайть покодемасонза.

¹⁵ Сяс Христос тевонь якафтысь од сотксса, вдь Сонь куломац ульсь питнень пандомакс коень коламатнень инкса, конатне ульсть тифт васенце сотксть пингста. Тяфта тертьфненди максовихть пефтома бславаматне, конатнень надияфтозень Шкайсь.

¹⁶ Вдь соткссь тя кода уликс-паронь кадомать колга кошаркс, кона фалу вешенди кошарксонь кадыть куломанц колга кемокстама.

¹⁷ Кда уликс-паронь кадысь нинге шиса, эста уликс-паронь кадомать колга кошаркссь нинге ашезь сува вийс. Сяс мес тяфтама кошаркссь сувай вийс аньцек снярда, мзярда кулы сонь кадыец.

¹⁸ Вага мес и васенце соткссь сувась вийс вер вельде.

¹⁹ Мзярда Моисей марнек ломаньтналть инголе азозень койть сембе кошардомвалонзон, сон сявозе вазнятнень и сяватнень верснон, шовордазе ведь мархта и якстерь понаса сюлмаф иссопонь тарадть вельде валозе кода коень книгать, тяфта марнек ломаньтналтьке;

²⁰ и мярьгсь: «Тя версь кемокстасы сотксть, конань коряс Шкайсь мярьгсь эрямс».

²¹ Тяка лаца сон валозе верса и иняру кошть и семботь сянь, мезе нолявсь тевс озксвятемста.

²² Афкукс, койть коряс пцтай сембось аруяфтови верть вельде, и кда аш веронь валома, аш пежень нолдамавок.

²³ Вага тяфта эряви аруяфтомс сятнень, конат шарыхть менеленнетнень лангс. А синьцень жа, менеленнетнень, эряви аруяфтомс сяда цебярь озксказне вельде.

²⁴ Сяс Христоссь ашезь сува кядьса тиф иняру вастти, конац аньцек шары афкуксоннеть лангс, но Сон сувась менельти и тяни араф минь инксонк Шкайть шамаликонц инголе.

²⁵ И Сон ламонь-крдаксть аф каннесы Эсь прянц озксказненди, кода тиенди озксвятиень оцюнясь, конац эрь кизоня сувси иняру вастти аф эсь веронц мархта, а жувататнень верснон мархта.

²⁶ Улендяряль Христоссь синь лацост, эста Тейнза саволь ламоксть маятамс, масторть тиемста сявомок. Меколанкт, тяниень пинкнень песта Сон весть сась тя масторлангти, и максомок Эсь прянц озксказнекс, машфтозе пежеть.

²⁷ И кода эрь ломанти весть сави куломс, а сяльде арамс Шкаень судть инголи,

²⁸ тяфта Христосовок весть максозе Эсь прянц озксказнекс ламоц ломаттнень пежеснон сявоманкса. Омбоцеда Сон сай аф пежеть инкса, а сай идемост сятнень, конат учихть Эсонза.