Еврейхненди сёрмась 7 - Од Соткс Новый Завет на мордовском-мокша языке 2016

Мелхиседек озксвятись

¹ Мелхиседек, Салим ошень оцязорсь и Инь Вярдень Шкайть озксвятиец, васьфтезе и бславазе Авраамонь, мзярда ся мольсь тюремвастста, оцязорхнень сяськомдост меле.

² И Авраам максозе тейнза кемонце пяльксть тюремвастста сембе сявфть эзда. Васендакиге, Мелхиседек лемть смузец «видексшинь оцязор». Тяда башка, Мелхиседек ульсь Салимонь оцязоркс, лиякс, «сетьмошинь оцязоркс».

³ Сёрматфксса мезевок апак аст сонь тядянц али алянц колга, али сонь шачемань юромонц колга. Сонь эряфонц аш ушетксоц, аш пец. Сон Шкаень Цёрать лаца; сон иляткшни озксвятикс пефтома пингс.

⁴ Ваность, конашкава оцю ся, конанди мянь Авраам, Израилень ломаньтналть ушедыец, максозе кемонце пяльксть сембодонга цебярть эзда, кона ульсь сявф оцязорхнень сяськомдост меле.

⁵ Левиень цёранзонды, конатненди макссеви озксвятемань тевсь, койсь мярьги кочксемс кемонце пяльксть ломаньтналть кядьста, лиякс мярьгомс, эсь брадонзон кядьста, хуш синьге Авраамонь иденза.

⁶ Но Мелхиседек, улемок аф Левиень юромста, сявозе кемонце пяльксть Авраамонь кядьста и бславазе сонь эста, мзярда тейнза ни максфтольхть надияфтоматне.

⁷ Апак корхтак содави, ёмлась бславави сяда оцюса.

⁸ Тяса кемонце пяльксть сявсазь ломаттне, конат кулыхть, а тоса кемонце пяльксть сявозе ся, кона эряй пефтома, и тянь кемокстасы Сёрматфкссь.

⁹ Лисенди, мянь Левийге, конанди макссесазь кемонце пяльксть, Авраамонь вельде пандозе кемонце пяльксть Мелхиседеконди.

¹⁰ Вдь Левий ульсь нинге Авраамонь, юромонь ушедыть потмоса, мзярда Мелхиседек васедсь Авраамонь мархта.

¹¹ Кда левиень озксвятемась, конань вельде максф койсь, вятель афсатыксфтомашити, эста мезенди эрявсь лия озксвяти, конань озксвятемац Мелхиседеконь лаца, а аф Аарононь лаца?

¹² Кда полафты озксвятемась, эста полафты койське.

¹³ Ся, конань колга тяфта корхтави, лиссь лия юромста, конаса кивок ашезь покоде озксвятикс алтарть инголе.

¹⁴ Содаф, минь Азороньке ульсь Иудань юромста. Но тя юромть кувалма Моисей мезевок ашезь аза, мзярда корхтась озксвятемань тевть колга.

Озксвятиень оцюня Мелхиседеконь лаца

¹⁵ Тя сембось тиеви нинге сяда шарькодевиксокс, мзярда эвондай лия Озксвяти, кона Мелхиседеконь лаца.

¹⁶ Сон арась озксвятикс пефтома эряфть виенц коряс, а аф койть кошардомвалонц коряс, кона ваны шачемань юромть лангс.

¹⁷ Вага кода Сёрматфкссь кемокстай Сонь колганза: «Тон улят озксвятикс пефтома пингс Мелхиседеконь лаца».

¹⁸ Ингольдень кошардомвалть полафтозь, сяс мес сон ульсь лафча и ашезь канне кодамовок лезкс.

¹⁹ Вдь Моисеень коец мезтьке ашезе тие афсатыксфтомокс. Сонь вастозонза тейнек максови сяда цебярь надияма, конань вельде минь малаткшнетяма Шкайти.

²⁰ Иисусонь озксвятемац кемокстафоль Шкайть варамань валсонза.

²¹ Ингольдень пинкнень озксвятикс арсесть варамань валфтома. А Иисус арась озксвятикс варамань вал вельде, сяс мес Тейнза азфоль: «Азорсь варась и аф полафтсы мяленц: "Тон улят озксвятикс пефтома пингс Мелхиседеконь лаца"».

²² Тяфта, варамась няфти, конашкава сяда пара ся соткссь, конанди Иисус тиевсь кемокстайкс.

²³ Ингольдень озксвятида ульсь лама, сяс мес куломась ашезь макссе тейст лядомс озксвятемань покодемасост,

²⁴ а Иисус эряй пефтома пингс, и Сонь озксвятеманцты аф ули пе.

²⁵ Сяс Сонь ули виец фалу идемс сятнень, кит вельденза сашендыхть Шкайти. Вдь Иисус эряй пефтома пингс и озонды синь инксост.

²⁶ Самай тяфтама Озксвятиень оцюня тейнек и эрявсь: иняру, аф мувору и ару. Сонь явфтозь пежуфнень эзда и кеподезь менельда вяри.

²⁷ Тейнза аф эряви, кода лия озксвятиень оцюнятненди, эрь шиня каннемс озксказнет инголи эсь пежензон инкса, а сяльде ломаньтналть пежензон инкса. Сяс мес Сон максозе Эсь прянц озксказнекс, весть и сембе пинкненди.

²⁸ Койть коряс озксвятиень оцюнякс путневихть лафча ломатть, а варамань валть коряс, кона максфоль койть мельге, озксвятиень оцюнякс ульсь путф пефтома пингс афсатыксфтома Шкаень Цёрась.