Еврейхненди сёрмась 6 - Од Соткс Новый Завет на мордовском-мокша языке 2016

¹ Сяс, эрьда кадсаськ Христость колга васенце содамошитнень и ётатама сяда тов – крхкаста шарьхкодемати. И меки аф мртцетяма ушетксти, тяфтама тефненди, кода кулоф тевонь кадомась, Шкайти кемамась,

² тонафтомати кстиндамать колга и эрь кодама штаматнень колга, бславамать пингста кядень путомать колга, кулофнень эзда вельмамать и пефтома пингонь судть колга.

³ И тяньге тисаськ, кда максы Шкайсь.

⁴ Аш кода меки путомс виде ки лангс сятнень, кит прокс тусть-потасть Христости кемамать эзда. Вдь синь весть ни ульсть валдошисонза, варчсезь менелень казнеть таньфонц и тейст минь мархтонк марса максфоль Иняру Ваймопожфсь.

⁵ И синь эсь лангсост варчсезь Шкаень валть паронц и сай пингонь эряфть виенц,

⁶ но тяда меле кадозь кемамать. Тяфтапнень аш кода ни вятемс каендамати, сяс мес синь синць одукс эськодьсазь крёз лангс Шкаень Цёрать и сембонь инголе тиендьсазь Сонь пеедема вастокс.

⁷ Модась, кона ламоксть валондови-симдеви пизем ведьса, и кона канды лама сёра сятненди, кинди сон аноклави, ули бславаф Шкайть эзда.

⁸ А модась, кона канды аньцек сордише и кумбарав лопат, лувови аф эрявиксокс. Сон мала Шкаень сюдомати, конань пец – толса плхтамась.

⁹ Кельгома ялгат, хуш минь и корхтатама тяфта, сякокс кематама: тинь сяда лац ащетяда и мольхтяда идемань киге.

¹⁰ Вдь Шкайть аш аф видексшиц и сяс Тейнза аф юкстави тинь покодеманте и кельгоманте, конань тинь няфтесть Тейнза, мзярда лезнеде и нинге лезттада иняруфненди.

¹¹ Минь пяк оцю мяленьке: катк эрсь эздонт няфти тяфтама жа оцю седиень путома петь самс, мзярс аф пяшкоди тинь надияманте.

¹² И тяда ара нолакс, меколанкт, тиендеда сятнень лаца, конатненди кемамать и куватьс кирдемшкать вельде максови ся, мезе Шкайсь надияфтсь.

Мезе Шкайсь надияфтсь, ся пяшкоди

¹³ Мзярда Шкайсь макссь надияфтомань вал Авраамонди, Сон варась Эсь лемсонза, сяс мес ашель Сондедонза кивок сяда оцю, кинь лемса Сон маштоль варамс.

¹⁴ Сон мярьгсь: «Афкукс, Мон козяста бславате тонь и максан тейть лама идь-унок».

¹⁵ И тяфта, Авраам учсь куватьс, сатфтозе кирдемшканц и тейнза максфоль надияфтфсь.

¹⁶ Ломаттне фалу варайхть мезьса-бди сяда оцюса эсь корязост. Варамась тейст – кода тевонь кемокстама, и варамась путы пе эрь кодама пялькстомати.

¹⁷ Шкайсь ёрась няфтемс Эсь мялень аф полафнеманц сятненди, кинди ульсь максф надияфтома. Сяс Сон кемокстазе Эсь надияфтоманц варамаса.

¹⁸ Сяс тяни минь улихть ня кафттне, конат аф полафтыхть и конатнень эса Шкайсь коданга и мзярдонга аф васькафты: тя Шкаень варамась и надияфтомась. Синь кемокстасамазь минь, сятнень, кит музь инголе ащи надиямаса кяшема вастть.

¹⁹ Тя надиямась минь ваймоньконди, кода кемоста кирди и вии якорь, кона сатни иняру кошть потмонцты, мянь котфонь перяфксонц фталу.

²⁰ Васенцекс тоза минь инксонк сувась кинь няфтись – Иисус. Сонь арась пефтома пингонь Озксвятиень Оцюнякс Мелхиседеконь лаца.