OMUUDIFI 11 - Ombibeli Iyapuki

Fimbo tu nomhito, natu ninge ouwa

¹ Ekela omungome woye kombada yomeva, osheshi ngeenge pa piti omafiku mahapu ove to ke u mona.

² Oshitukulwa shi yandjela vaheyali, heeno, vahetatu yo, osheshi inamu shiiva omupya washike tau ka kala kombada yedu.

³ Oilemo ngeenge i yadi odula, yo otai i lokele edu. Ndele omuti ngeenge tau wile kOumbuwanhu ile kOumbangalanhu, kombinga tuu oyo omuti tau wile ko, oko tau nangala.

⁴ Ou ha tale omhepo, ita ka kuna nande; ndele ou ha tale oilemo, ita ka teya nande.

⁵ Ngaashi ino shiiva ondjila yomhepo ile nhumbi omakipa taa kulu mo medimo lomufimba, nosho ino shiiva oilonga aishe yaKalunga.

⁶ Ombuto yoye i kuna ongula, ndele ino tulumukifa eke loye komatango. Osheshi ku shi shii, ilipipo tai ka mena, oyo ile inya, ile ngeenge aishe ivali tai ka kala ya wapala.

⁷ Natango: ouyelele omuwa ndele tashi wapalele omesho okumona etango.

⁸ Osheshi omunhu nande a kale e nomwenyo omido dihapu, ye e nokuhafa mudo adishe nokudimbulukwa omafiku omulaulu, osheshi oo otaa ka kala mahapu. Ashishe osho tashi ke uya, oshongahoelela.

⁹ Omunyasha ove, kala wa nyakukwa mounyasha woye, nomutima woye nau ku hafife momafiku omounyasha woye. Ndele enda neendjila domwenyo woye, ndelenee kala u shi shii nokutya, Kalunga ote ku tokolifa molwaashishe eshi.

¹⁰ Ndele taataa mo oluhodi momwenyo woye, ndele kandula po omauyehame molutu loye, osheshi ehafo nounyasha yo oyongahoelela.