OMAPSALOME 98 - Ombibeli Iyapuki

Omuxupifi wOvaisraeli nOmutokoli wounyuni

Epsalome.

¹ Imbileni Omwene eimbilo lipe, osheshi Ye okwa longa oikumwifalonga! Olulyo laye nokwooko kwaye kuyapuki, oyo ye mu longela efindano.

² Omwene okwa shiivifa exupifo laye, moipafi yoiwana yovapaani omo a holola ouyuki waye.

³ Eumbo laIsrael okwe li dimbulukila ouwanghenda waye noudiinini; fiyo okeexulo adishe dounyuni oda mona oshilonga shaKalunga shexupifo.

⁴ Edu alishe, kuwilila Omwene, hoveleni okunyakukwa, nye mu shike ouxumbafeta.

⁵ Shikileni Omwene ouxumbafeta, va shikeni nokwiimba pombadambada.

⁶ Omanghuma neendaka deembeda nye, tanheleni koshipala shOhamba Omwene.

⁷ Efuta nali popome, naashi tashi ilauka mo, nongonga yedu, naava va tungila mo.

⁸ Omilonga nadi pandule nomake, neemhunda adishe kumwe nadi nyakukwe

⁹ koshipala shOmwene, osheshi Ye ote uya okutokola edu. Ongonga yedu ote ke i tokola mouyuki, noiwana yoilongo ngaashi ye shi yukila.