OMAPSALOME 92 - Ombibeli Iyapuki

Ehambeleloimbilo lokufimaneka Kalunga

Epsalome, eimbilo mefiku leshabata.

¹ Osha wapala unene okupandula Omwene, nokwiimbila edina loye ehambelelo, Ove ou wOkombadambada;

² okuhepaulula ouwanghenda woye ongula inene, nokutonga oudiinini woye oufiku;

³ mokushika okauta nonyalilo, nokushika okaxumbafeta.

⁴ Osheshi Omwene, Ove wa hafifa nge mokulonga kwoye; ohandi nyakukilwa oilonga yomake oye.

⁵ Omwene, oilonga yoye oinene, i fike peni! Omadiladilo oye omale unene neenghono.

⁶ Omunhu ehe neendunge ite shi shiiva, nelai itali shi koneke.

⁷ Ovadinikalunga eshi tava twiyuka ngaashi omwiidi, novaningi vowii aveshe ngeenge tava hape ngaashi omiti, otashi ningwa, vo va yaumuke ko fiyo alushe.

⁸ Ndelenee Omwene, Oove omunene omutumbalekwa fiyo alushe!

⁹ Heeno, oshili, ovatondi voye, Omwene, ovakondjifi voye shili otava nyonauka po; ovaningi vowii aveshe otava halakanifwa.

¹⁰ Ndelenee oluvinga lange oto li tumbifa pombada ngaashi olomhanda, owa vaeka nge nomaadi mapelela;

¹¹ Omesho ange okwa mona okufindika kwovatondi vange, nomatwi ange e udite ehafo molwoshiponga shovanawii ava tava fikamene nge.

¹² Omukoshoki ota kulifwa, a fa omuti womulunga, ota mene ta i pokule, ngaashi omuti womusederi wokuLibanon.

¹³ Ova twikwa meumbo lOmwene, otava tutuma momukunghulo wondjuwo yaKalunga ketu,

¹⁴ vo nande nava kulupe, otava imike natango oiimati, omiti ditalala da twiyauka omafo,

¹⁵ vo va kale tava udifa, nokutya Kalunga Oye omuyuki, emanya lange, muye kamu na nande oushima.