OMAPSALOME 9 - Ombibeli Iyapuki

Olupandu kuKalunga molwexupifo

Epsalme laDavid, la pewa enyakwa lolwiimbo, mongovela yeimbilo eli: ‘Fila omona’.

¹ Onda hala okuhambelela Kalunga nomutima wange aushe, nda hala okuhepaulula oikumwifalonga yoye aishe.

² Nda hala okuhafela nokunyakukilwa mwoove, nda hala okwiimbila etumbalo ledina loye, Ove ou wOkombadambada.

³ Osheshi ovatondi vange ova shunifwa lwanima, va pundaulwa nova nyonaunwa po koshipala shoye.

⁴ Ove u li po wa yukifila nge, nowa popila nge, u li kolukalwapangelo loye, Oove omutokoli omuyuki.

⁵ Ove wa aneka ovapaani nowa nyonauna po ovahenakalunga, nomadina avo we a dima po alushe fiyo alushe.

⁶ Ovatondi ova nyonwa po, va shatwa po fiyo alushe; noilando yavo Ove we i ngumauna po sheke; okudimbulukiwa kwavo kwa xula po.

⁷ Ndelenee Omwene ota pangele fiyo alushe; Oye a dika olukalwapangelo laye a tokole.

⁸ Oye mwene ta ka tokola omunghulo wedu mouyuki, ota pangele oiwana pauyuki.

⁹ Osho hano Omwene Oye emanyahote kovafininikwa, emanyahote mefimbo loudjuu.

¹⁰ Ava va shiiva edina loye, otave ku lineekele, Omwene, Ove ito efa ava tave ku kongo.

¹¹ Imbileni Omwene, ou ta kala muSion, udifileni mokati koiwana oinenelonga yaye.

¹² Osheshi ou omunanghonehonde, he va dimbulukwa, nonghuwo yomapongo ihe i dimbwa.

¹³ Omwene, file nge onghenda, tala oudjuu wange nda hepekwa nao kovatondi vange, Ou ho kufa nge moivelo yefyo,

¹⁴ oilonga yefimano loye alishe opo ndi shiive oku i hepaulula, ndi shiive okunyakukilwa exupifo loye moivelo yokakadona kaSion.

¹⁵ Ovapaani ova wila mekelo, eli va fele nomelulo lomwiyo eli va telele, ove liyula voovene keemhadi davo.

¹⁶ Omwene okwe lishiivifa, nehandutokolo laye okwe li mana, omulunde e likwatifa koilonga yomake aye mwene. Sela

¹⁷ Ovakolokoshi ve nokuwila moshovafi, novapaani aveshe ava va dimbwa Kalunga.

¹⁸ Osheshi ohepele iha dimbuwa fiyo alushe, neelaelo lomapongo ihali tutuka fiyo alushe.

¹⁹ Omwene, tukuluka! Ino efa ovanhu va lundakane, ovapaani nava tokolwe koshipala shoye.

²⁰ Omwene, va halukifa; novapaani nave lishiive ovo ovanhu. Sela