OMAPSALOME 85 - Ombibeli Iyapuki

Oshiwana shOmwene tashi liindilile onghenda ipe nepuniko lipe

Epsalome lOvakora, la pewa enyakwa lolwiimbo.

¹ Omwene, oshilongo shoye, nale we shi hokwa, noupika waJakob okwa li we u pandukulula.

² Ove owa kufa po owii woshiwana shoye, nomatimba avo owe a dima po. Sela

³ Onya yoye aishe owe i lotifile, nowa polifile ehandu loye la xwama.

⁴ Kalunga kexupifo letu, tu pamekulula, noku tu umanena kwoye, ku pungulula po.

⁵ Wa hala mbela oku tu kwatela onghone fiyofiyo, nokufikifa ehandu loye koludalo noludalo?

⁶ Ino hala oku tu tula omwenyo vali, oshiwana shoye, tu shiive oku ku hafela?

⁷ Omwene, tu monifa ouwanghenda woye, Ove u tu pe exupifo loye.

⁸ Ame nda hala okupwilikina, Kalunga Omwene eshi ta popi. Ota unganekele oshiwana shaye novadiinini vaye ombili; vo ngeno vehe lishune vali moulai.

⁹ Heeno, exupifo laye ola kala popepi naava have mu tila, opo oshinge shaye shi kale moshilongo shetu,

¹⁰ ouwanghenda noudiinini, oyo i shakenafane, ouyuki nombili, yo i fipafane komilungu.

¹¹ Oudiinini, opo otau ka twiyuka medu, nomeulu ouyuki tau taalele poshi.

¹² Osho vali Omwene ote ke tu pa ouwa, nedu letu tali tu menifile oshishipo.

¹³ Ouyuki opo otau ke mu tetekelela, nelao tali shikula eenghatu daye.