OMAPSALOME 83 - Ombibeli Iyapuki

Ovatondi keembinga adishe

Eimbilo, Epsalome laAsaf.

¹ Akutu Kalunga, ino likalela auke, Ove ino kala wa mwena u tye filu, akutu Kalunga!

² Tala, osheshi ovo tave ku tondo otava uyaana, novatondi voye otava yelulile omitwe davo pombada.

³ Oshiwana shoye otave shi diladilile ekengelelo, novanhu vopolwamba loye otave va dutile ehangakeno,

⁴ tava ti: “Ileni tu yeni, tu ke va hanauneni po, vo vaha ifanwe vali oshiwana, opo edina lOvaisraeli liha tumbulwe vali.”

⁵ Heeno, va kundafana, va itavelela shimwe, ove ku pangela omhangela yehangakeno,

⁶ eenhanda daEdom nOvaismael, Moab nOvahagri,

⁷ Gebal naAmmoni naAmalek, Ovafilisti pamwe nOvatirus.

⁸ NaAsiria yo okwa ama kuvo, ova ninga okwooko kwovana vaLot. Sela

⁹ Va ninga, ngaashi wa ningile Midian naSisera, nongaashi Jabin kokamulonga Kison,

¹⁰ ava va nyonauninwe po kuEndor, noimhu yavo ya ninga oushosho womepya.

¹¹ Oidale yavo i ninga ngaashi wa ningile Oreb naSeeb, novadalekele vavo aveshe ongaashi Seba naSalmunna,

¹² Ava tava ti: “Tu ka nangaleni po eenhele daKalunga.”

¹³ Kalunga kange, va ninga ngaashi omafo taa i shambadaulu, ngaashi oidudilo tai i omhepo.

¹⁴ Ngaashi omundilo ou tau xwike ofuka, ngaashi omutemo tau vave eemhunda.

¹⁵ Osho u va shikula neembadi doye, ndele to va halula noshikungulu shoye.

¹⁶ Oshipala shavo shi yadifa nohoni, opo va hovele okukonga edina loye, Omwene.

¹⁷ Nava fifwe ohoni, va tilifwe fiyo alushe, nava lengaifwe, vo va xule po.

¹⁸ Vo va kale, ve shi koneka, nokutya Oove ou to ifanwa Omwene, Ove auke u li po Okombadambada medu alishe.