OMAPSALOME 61 - Ombibeli Iyapuki

Okwiindililwa kwohamba

Eimbilo laDavid, la pewa enyakwa lolwiimbo oku li shika mokaxumbafeta.

¹ Kalunga, uda okwiingida kwange, Ove didilika eilikano lange!

² Moulikule wange kexulilo ledu ohandi ku ifana, omutima wange eshi owa lololwa; twale nge kemanya lile, ame mwene nda nyengwa okulonda ko.

³ Osheshi Ove wa kala nale ehondamo lange, nohote yange ya pama koshipala shomutondi wange.

⁴ Itavele nge ndi kale alushe metwali loye, ndi hondame meameno lomavava oye. Sela

⁵ Osheshi, Kalunga, Ove wa uda omaudaneko ange, wa pa nge efyuululo laava tava tila edina loye.

⁶ Wedela ko ohamba omafiku komafiku, nomido dayo di ninge dihapu okepupi fiyo okepupi.

⁷ Epangelo layo li kale alushe koshipala shaKalunga; i pa ouwanghenda noudiinini, u ninge eameno layo.

⁸ Osho nda hala okwiimbila edina loye omahambelelo alushe fiyo alushe, ndi wanife omaudaneko ange efiku nefiku.