OMAPSALOME 6 - Ombibeli Iyapuki

Onghuwo yomulidilululi

Epsalme laDavid; la pewa enyakwa lolwiimbo, oku li shika mokaxumbafeta, mondaka yombaafa.

¹ Omwene, ino hanyena nge wa handuka, Ove uha denge nge wa keshuka!

² Omwene, file nge onghenda, osheshi onda ngona; pameke nge, osheshi omakipa ange a halukifwa,

³ nomwenyo wange wa tililila, Woo! Omwene, fiyo onaini hano?

⁴ Omwene, aluka, u mangulule omwenyo wange! Xupife nge molwefilonghenda loye!

⁵ Osheshi mokufya ito dimbulukiwa vali komunhu. Moshovafi omu na tuu ou, te ku imbile ehambelelo?

⁶ Onda loloka molwomanyemato ange aeshe; keshe oufiku ohandi tutike omutala wange, nomulele wange ohandi u talaleke nomahodi ange.

⁷ Omesho ange okwa twiyala koluhodi nokwa kulupifwa molwovayelani vange aveshe.

⁸ Ovalongi vowii amushe nye, djeni po pwaame amushe! Osheshi Omwene okwa uda ekwenauko lange;

⁹ Omwene okwa uda eindilo lange, neilikano lange Omwene ohe li tambula.

¹⁰ Ovatondi vange aveshe otava ka lengaifwa ndele tava kanghwa; otava shunifwa diva lwanima va fya ohoni.