OMAPSALOME 57 - Ombibeli Iyapuki

Eilikano neimbilopandulo moudjuu

Eimbilo laDavid, la pewa enyakwa lolwiimbo oku li imba mongovela yeimbilo eli: ‘Ino nyonauna po’, lefimbo eshi a shuukile Saul, ndee ta hondama mekololo lomhunda.

¹ Kalunga, file nge onghenda, file nge onghenda, osheshi kwoove omwenyo wange otau kongo ekwafo, ndele momudidimbe womavava oye onda hala okukonga eameno fiyo ehanauno la pita po.

² Ohandi ifana Kalunga ou wOkombadambada Kalunga ou ta fikifa oshinima shange.

³ Oye ta tumine nge ekwafo, tali di keulu, ota lengaifa ou e uditile nge onya. Sela Kalunga ota tumu ouwanghenda noshili yaye.

⁴ Omwenyo wange otau nangala mokati keenghoshi nomokati kovatondi ve yadi outondwe, nomokati kaava ve nomayoo a fa omaonga noikuti, nomalaka avo a fa omikonda da twa.

⁵ Kalunga, litumba kombada yomaulu, efimano loye kombada yedu alishe.

⁶ Eemhadi dange ove di tela eendjadja, ova polimanifa omwenyo wange. Ekelo, ove li fa komesho yange, ndele voovene tava wile mo. Sela

⁷ Omutima wange u nouladi, Kalunga, omutima wange ou nouladi; onda hala okwiimba nokushika.

⁸ Penduka, omwenyo wange! Pendukeni okaxumbafeta nonyalilo! Onda hala okupendula etendo leluwa.

⁹ Omwene, onda hala oku ku tanga mokati koiwana, onda hala ndi ku imbile mokati kovapaani.

¹⁰ Osheshi ouwanghenda woye tau lundu eulu, noudiinini woye otau fiki fiyo okoilemo.

¹¹ Kalunga, litumba kombada yomaulu, nefimano loye kombada yedu alishe.