OMAPSALOME 53 - Ombibeli Iyapuki

Ekemo molwenyonauko lounyuni

Ounongoimbilo waDavid; wa pewa enyakwa lolwiimbo, oku u imba mondaka yoluhodi.

¹ Elai tali popi momutima walo, tali ti: “Kape na Kalunga.” Oilonga yalo oififahoni, ya nyonauka; kape na nande umwe ou ta longo ouwa.

² Kalunga meulu ota vandamene poshi, ta tale oludalo lovanhu, a mone, ngeenge pe na omunandunge, ou ta kongo Kalunga.

³ Ndelenee aveshe ova kanduka mo, aveshe va kaula onyanga; inapa monika vali ou, ta longo sha yuka, nande oumwe.

⁴ Ovanawii vehe na eendunge nande mbela? Ava tava li po oshiwana shange ngaashi tava li oshifima, vo itava ifana nande Kalunga.

⁵ Opo tuu opo va tilifwa va kakama, nande kapa li oshitilifi; osheshi Kalunga okwa li a halakanifa omakipa ovakondekeli voye; ove we va xutula, osheshi Kalunga okwa li e va ekelashi.

⁶ Akutu, exupifo laIsrael ngeno li holoke muSion! Ngeenge Omwene ta alula oudjuu movanhu vaye, opo Jakob ota hafe, naIsrael ota nyakukwa.