OMAPSALOME 52 - Ombibeli Iyapuki

Ehekeleko lomulundilwa

Ounongoimbilo wa imbwa kuDavid eshi Doeg, Omuedom e uya ndee ta lombwele Saul nokutya, ‘David okwe uya mongulu yaAhimelek’; wa pewa enyakwa lolwiimbo.

¹ Omulinenepeki ove, oshike to litangele oupote woye? Efilonghenda laKalunga, otali kala po fiyo alushe.

² Elaka loye otali dutu oixuna, la fa oshikululifo sha upikwa, mukotokeli ove!

³ Ove u hole owii, u ku dulile ouwa, noipupulu, i ku dulile oshili. Sela

⁴ Eendjovo dombudi, odo adike u hole, ove elaka li nekoto!

⁵ Hano osho yo Kalunga ote ku hanauna po fiyo alushe, ote ku nakula mo note ku vakula mo moshitulwa shoye, ndele te ku duda mo moshilongo shovanamwenyo nomidi doye. Sela

⁶ Ovayuki, otave shi mono notashi va halula ndele tave shi mu yolele:

⁷ “Tala, omulumenhu ou, oye tuu, ine lineekela Kalunga, a ninge engholo laye, ndelenee okwe lineekela emona laye linene nokwe litungila koupuna waye.”

⁸ Ndele ame ondi li mongulu yaKalunga, nda fa olumono litalala; nde lineekela efilonghenda laKalunga fiyo alushe.

⁹ Alushe onda hala ndi ku tangele, eshi we shi ninga; nomoipafi yovayuki voye onda hala okuteelela edina loye, osheshi olo oliwa.