OMAPSALOME 5 - Ombibeli Iyapuki

Eilikano longula

Epsalme laDavid; la pewa onghulungu yomalwiimbo oku li shika nonyalilo.

¹ Omwene, endekela okutwi kwoye keendjovo dange. Koneka okuhefa kwange.

² Akutu, Ohamba yange naKalunga kange, uda elilo lange lopombada, osheshi kwoove oko handi eta eindilo lange.

³ Omwene, ongula inene to ka uda ondaka yange; ongula inene ohandi ku lilongekidile efiyawilo nohandi liameke kwoove.

⁴ Osheshi Ove ku fi Kalunga ha hokwa oulunde. Omunawii ke nokukala pwoove.

⁵ Ovalitumbaleki itava ka dula komesho yoye; ovanyoni aveshe oho va tondo.

⁶ Ovapopi voipupulu oto va nyonauna po; ovalumenhu ovadipai novanekonda oho va tondo.

⁷ Ndelenee ame molwefilonghenda loye onda pewa omhito yokuuya meumbo loye, ndi liwitike poshi, nda taalela kotembeli yoye iyapuki moku ku tila.

⁸ Omwene, endife nge pauyuki woye molwovatondi vange; palele nge ondjila yoye komesho yange.

⁹ Osheshi momakanya avo kamu na okulineekelwa, meni lavo otava dutu enyonauko; ominino davo odo eembila da yeuluka; nomalaka avo oku na omufenhu.

¹⁰ Kalunga, va tokolela owii. Eemhangela davo nadi va pilukile. Va undula po molwouhapu womanyonauno avo; osheshi vo ove ku lundalalela.

¹¹ Opo nee aveshe ava ve ku lineekela, nave ku hafele; alushe nava kuwilile, molwaashi to va amene, notave ku tanhele ava ve hole edina loye.

¹² Osheshi omuyuki Ove to mu nangeke noupuna, Omwene, to mu dingilile nohokwe yoye ngaashi oshikelelifo.