OMAPSALOME 40 - Ombibeli Iyapuki

Epandulo molwexupifo Eduliko li dule oiyambwa

Epsalme laDavid, la pewa enyakwa lolwiimbo.

¹ Onda li nda teelela, nokuteelela Omwene, nokwa vandamena kwaame nokwa uda onghuwo yange.

² Oye okwa shila nge mo melambo lenyonauno nomonhata yonhopo; okwa kaleka eemhadi dange kemanya, eenghatu dange okwe di pameka;

³ ndele okwa tula mokanya kange eimbilo lipe, ehambeleloimbilo lokufimaneka Kalunga ketu. Vahapu tave li mono, ndele tava tila ndele tave lineekele Omwene.

⁴ Omulumenhu omunelao ou, ta tula elineekelo laye mOmwene, noite liameke kovalinenepeki nokwaava tava pukile oipupulu.

⁵ Oilonga inene Ove wa longa, Omwene, Kalunga kange, noikumwifa yoye neemhangela kufye; kape na eshi tashi yelekwa naave; ngeno nda hala oku i udifa noku i vilikila, ndele yo ihapu, itai dulika okuvalwa.

⁶ Oitomenwayambo neendjayambo ito di hokwa, ndelenee omatwi ange wa fitulula; exwikiloyambo netimbayambo ito pula.

⁷ Onghee nee ame nda tya: “Tala, ohandi uya, momushangwa omo mwa shangwa, eshi handi longo.

⁸ Kalunga kange, okuwanifa ehalo loye, osho otashi nyakula nge, nomhango yoye oyo ya nyolelwa moule womwenyo wange.”

⁹ Eshi shouyuki onde shi udifa meongalo linene; tala, omilungu dange inandi di mwenifa; Omwene, Oove mwene u shi shii.

¹⁰ Kouyuki woye inandi holeka ko sha momutima wange, onda udifa pombada oudiinini nekwafo loye; onghenda noshili yoye inandi i mweneka meongalo linene.

¹¹ Onghee nee, Omwene, ndi shi shii, Ove ito anyene nge efilonghenda loye; onghenda noudiinini woye ohau amene nge alushe.

¹² Osheshi owii uhapu, uhe shii kuvalwa, owa kondekela nge, omanyono ange a kwata nge, ihandi dulu okumona ko; omuvalu wao ou dule eexwiki dokomutwe wange, nonyati yange oya pwa po.

¹³ Omwene, hala okuxupifa nge! Omwene, endelela, u kwafe nge!

¹⁴ Aveshe ava tava nangele omwenyo wange, ve u nyonaune po, nava fifwe ohoni, i va pembife oshipala; ava va halela nge omupya, nava shunifwe shanimanima, va lengaifwe.

¹⁵ Nave lixwinifwe kelengwa lavo, ava tava ulaula nge tava ti: “Shalongo, shalongo!”

¹⁶ Aveshe ava tave ku kongo, nava nyakukwe nokuhafela mwoove; aveshe ava tava djuulukwa exupifo loye, vo va tye alushe: “Omwene Oye omunene!”

¹⁷ Nande ondi li moupongo nomoluhepo: Omwene ota file nge oshisho. Oove omukwafi nomuxupifi wange, Kalunga kange, ino kala ko!