OMAPSALOME 26 - Ombibeli Iyapuki

Omutewatewi epwanga te liameke kOmwene

Epsalme laDavid.

¹ Omwene, ningile nge eshi sha yuka, osheshi mokweenda kwange nda enda moukoshoki, onda kala nde lineekela Omwene, inandi tengauka.

² Omwene, yeleke nge, u konakone nge, shipulula eefiyo dange nomutima wange;

³ osheshi ounamutimanghenda woye ou li komesho yange, nohandi ende moshili yoye.

⁴ Ame ihandi kala omutumba pamwe neembudi, noinandi endafana naava ve na koshi.

⁵ Ohandi tondo oshiongalele shovanawii, noihandi kala omutumba pwaava vehe na Kalunga.

⁶ Omake ange ohandi a kosho ehe na mbudi, nonda hala okudingilila oaltari yoye, Omwene,

⁷ ame ndi pandule nondaka inene, nondi udife oinenelonga yoye aishe.

⁸ Omwene, ame ondi hole onhele yongulu yoye, naapa tapa kala onhele yoshinge shoye.

⁹ Ino nakula po omwenyo wange pamwe novalunde, nomwenyo wange mumwe novatilishi vohonde,

¹⁰ ava ve nomake a nyata oukolokoshi, nolulyo lavo oli yadi ombubo.

¹¹ Ndelenee ame ohandi ende mouyuki wange, mangulule nge nokufila nge onghenda.

¹² Eemhadi dange tadi kala ofika pedu la lalakana; ohandi ka hambelela Omwene moiongalele yeongalo.