OMAPSALOME 23 - Ombibeli Iyapuki

Omwene omufita wange

Epsalme laDavid.

¹ Omwene Oye omufita wange, ihandi pumbwa sha.

² Oye ta lifa nge momatunda omwiidi mutalala, nota twala nge komeva ndi ka tulumukwe.

³ Ota hekeleke omwenyo wange; ota endifa nge mondjila ya yuka molwedina laye.

⁴ Nande ondi ende molufilu lomudile wefyo, itandi tila owii, osheshi Ove u li pwaame; odibo yoye nonhaili yoye, oyo ehekeleko lange.

⁵ Ove to yalele nge oshililo monhanaisho yovatondi vange; oto vaeke omutwe wange nomaadi, neholo lange li yadi ndoo.

⁶ Heeno, ouwa nefilonghenda, oyo otai shikula nge omafiku ange aeshe, ndele ohandi kala mo fiyo alushe meumbo lOmwene.