OMAPSALOME 141 - Ombibeli Iyapuki

Eindilo okwaamenwa kowii

Epsalome laDavid.

¹ Omwene, ohandi kuu onghuwo kwoove, i tondoka! Uda ondaka yange, eshi handi ku ifana.

² Eindilo lange nali talwe kwoove, olo etwimino, neyelulo lomaoko ange, olo eyambo longuloshi.

³ Omwene, kokanya kange paka ko omukeleli, nomunangeli koshivelo shomilungu dange!

⁴ Anda ko omutima wange, uha ame kowii, ame ndiha longe oilonga youmbudi pamwe naava ve i hole; inandi hala nokuli okumakela kounyenye wavo.

⁵ Omuyuki na denge nge, osho ohole, ye na pukulule nge, osho omuvaeko womomutwe, omutwe wange, eshi itau shi anye nande, osheshi natango eindilo lange tali kondjifa oumbudi wavo.

⁶ Ovatokoli vomuvo, ngeenge va undwilwa momakololo omamanya, opo otaku udika eendjovo dange, nokutya odiwa.

⁷ Ngaashi umwe ta limi edu ndele te li hende, osho omakipa etu taa nyanekwa mokanya koshovafi.

⁸ Osheshi Omwene, Kalunga kange, kwoove omesho ange oko a yukilila, kwoove oko handi ka ningina; omwenyo wange ino u tilashi.

⁹ Shiye nge komwiyo, ou va tela nge, nokomalulo ovaninginai.

¹⁰ Ovadinikalunga nave likwate nomalulo avo vene, fimbo ame handi piti po.