OMAPSALOME 14 - Ombibeli Iyapuki

Kape na ouyuki movanhu

Epsalme laDavid, la pewa enyakwa lolwiimbo.

¹ Elai otali ti momutima walo: “Kape na Kalunga;” oilonga yalo oififahoni, ya nyonauka: kape na nande umwe auke, ou ta longo ouwa.

² Omwene meulu ota vandamene poshi, ta tale ovana vovanhu, a mone ngeenge ope na tuu ou omunandunge, ou ta kongo Kalunga.

³ Ndelenee aveshe va pumha mo, aveshe va vayapala; kape na ou ta longo ouwa, nande umwe.

⁴ Ovahenouyuki ava aveshe kave neendunge nande mboli, ava hava li ovanhu vange ngaashi hava li omungome? Vo ihava ifana kOmwene.

⁵ Opo va kwatwa kehalukotilifo, osheshi Kalunga a ama koludi lovayuki.

⁶ Onye omwa fifa ohoni omhangela yomufininikwa, ndelenee Omwene Oye eameno laye.

⁷ Akutu, exupifo laIsrael ngeno li holoke muSion! Ngeenge Omwene ta alula oudjuu movanhu vaye, opo Jakob ota hafe naIsrael ota nyakukwa.