OMAPSALOME 13 - Ombibeli Iyapuki

Elididimiko lomufininikwa

Epsalme laDavid, la pewa enyakwa lolwiimbo.

¹ Omwene, fiyo onaini to kala wa dimbwa nge shili? Fiyo onaini to holeke nge oshipala shoye?

² Fiyo onaini ndi nokuhumbata oisho momwenyo wange, noluhodi momutima wange efiku nefiku? Fiyo onaini omuyelani wange ta ka shishimana e dule nge?

³ Omwene, Kalunga kange, tale nge, ude nge! Pashukifa omesho ange, ndiha ka nangale meemhofi defyo!

⁴ Omushindani wange aha shiive okutya: “Ame onde mu finda”, novatondi vange vaha kalukile nge, ngeenge handi pundauka.

⁵ Ndelenee ame handi lineekele efilonghenda loye: omutima wange nau ka nyakukilwe ekwafo loye.

⁶ Ame ohandi imbile Omwene, osheshi Ye a ningila nge ouwa.