OMAPSALOME 127 - Ombibeli Iyapuki

Epunapalo otali monika ashike menangeko noupuna laKalunga

Eimbilo lomolweendo lokuya kouyapuki, laSalomo.

¹ Omwene, ngeenge haye omudikifi weumbo, ovadiki valo otava kendabala oshimha. Omwene ngeenge ita amene oshilando, omunangeli ota kelele oshimha.

² Okumeneka kweni ongula, nokuxunguluka moilonga oufikufiku, okwongaho, eshi tamu li eendja deni noshisho. Ovaholike vaye ohe di va pe mokukofa kwavo.

³ Heeno, ovana ovamati ovo oshali yOmwene, nokumona oludalo osho ondjabi iwa.

⁴ Ngaashi oikuti i li meke lofule, ovana ovamati osho tava kala mounyasha wavo.

⁵ Omulumenhu omunelao ou, e va yadi ndoo monywa yaye! Vo itava fifwa ohoni, ngeenge tava kundafana novayelani moluvanda.