OMAPSALOME 110 - Ombibeli Iyapuki

Kristus Omupristeli nOhamba

Epsalome laDavid.

¹ Omwene okwa tya kOmwene wange, ta ti: “Kala omutumba kolulyo lange, fiyo handi ningi ovatondi voye oshilyatelo shokeemhadi doye.”

² Odibopangelo yeenghono doye, Omwene ote i aneke, e li muSion; pangela mokati kovatondi voye.

³ Oshiwana shoye oshe lilongekidila nehalo liwa unene, mefiku lehomono loye: momidjalowapeko diyapuki ovanyasha voye tava iluka ngaashi omume mekolo leluwa.

⁴ Omwene okwa ana, ndele ite shi lundulula: “Oove omupristeli fiyo alushe opanghedi yaMelkisedek.”

⁵ Omwene oku li kolulyo loye, mefiku lehandu laye ota nyanyaula eehamba;

⁶ ota yandje etokolo mokati koiwana yoilongo, oimhu otai napakana apeshe, ota ka finda eehamba doilongo aishe.

⁷ Metondokelo lomeva opondjila ota nu mo; eshi notashi mu lyaalalifa omutwe waye pombada.