LEVITIKUS 3 - Ombibeli Iyapuki

Epanduloyambo

¹ “Ndele eyambo laye ngeenge epanduloyambo, e nokweeta koshipala shOmwene oshinamwenyo shihe noshipo, ngeenge te shi eta meengobe, ongobe yomhedi ile ondema.

² Ndele ye e nokutenheka eke laye komutwe weyambo laye noku i tomena poshivelo shetwali leongalo. Novapristeli, ovamati vaAron, ve nokutila ohonde keembinga adishe doaltari.

³ Opo nee ye e nokweetela Omwene omundiloyambo wepanduloyambo: omakaadi aa e li kombada yomandjadja nomakaadi aeshe aa e li momandjadja,

⁴ neefiyo adishe mbali nomakaadi okudo needi nokapuununwa kexuli ove u noku i kufa pamwe neefiyo.

⁵ Novana ovamati vaAron ve noku i xwika po koaltari kexwikiloyambo olo li li koikuni kombada yomundilo eshi osho omundiloyambo wedimba liwa kOmwene.

⁶ “Ndele eyambo laye ngeenge odi ile oshikombo, ye te shi etele Omwene epanduloyambo, ye e noku shi eta shihe noshipo, odi ondume ile onghadi.

⁷ Ye ngeenge ta eta odi onghadi eyambo, ye e noku i eta koshipala shOmwene

⁸ nokutenheka eke laye komutwe weyambo laye ndele te i dipaa komesho yetwali leongalo. Novana ovamati vaAron ve nokutila ohonde keembinga adishe doaltari.

⁹ Opo nee ye e nokweetela Omwene omakaadi epanduloyambo: omakaadi aeshe, nomushila e noku u teta pekalo, nosho yo omakaadi aa e li kombada yomandjadja nomakaadi aeshe aa e li momandjadja,

¹⁰ neefiyo adishe mbali nomakaadi ado nokaxulixuli kexuli e noku i kufa pamwe neefiyo.

¹¹ Nomupristeli e noku i xwikila po koaltari ngaashi omundiloyambo kOmwene.

¹² “Ndele eyambo laye ngeenge oshikombo, ye e noku shi eta koshipala shOmwene

¹³ nokutenheka eke laye komutwe washo noku shi dipaela komesho yetwali leongalo. Novana vaAron ve nokutila ohonde keembinga adishe doaltari.

¹⁴ Opo nee ye e nokweetela Omwene eyambo lomuyo loinhimbu imwe omundiloyambo: omakaadi aa e li kombada yomandjadja nomakaadi aa e li momandjadja,

¹⁵ neefiyo adishe mbali nomakaadi ado nonokaxulixuli e noku i kufa pamwe neefiyo.

¹⁶ Nomupristeli e noku i xwikila po koaltari ngaashi eendja domundiloyambo, edimba liwa. Omakaadi aeshe oo Omwene.

¹⁷ Oyo onghedimhango yaalushe komapupi nomapupi meenhele deni adishe: ‘Inamu lya nande omakaadi nohonde.’ ”