JONA 2 - Ombibeli Iyapuki

Jona medimo loshi Eilikano laye nemangululo

¹ Ndele Jona okwa ilikana Omwene Kalunga kaye medimo loshi, ndele ta ti:

² “Moudjuu wange onda kuwa kOmwene, ndele Ye a uda nge. Moshovafi onda kuwa onghuwo, Ove owa uda ondaka yange.

³ Ove wa ekela nge mokule mwi koshi yefuta opo omatondokelo omeva a dingilila nge, okwiilauka kwomakufikufi oye aeshe a tuvikila nge.

⁴ Opo nee ame nda tya: Ame onda tewa po koshipala shoye. Nande ongaha ohandi ka tala vali otembeli yoye iyapuki.

⁵ Omeva okwa dingilila nge fiyo okomwenyo wange, oule owe lidingilila nge, omanenge okwa tangaela nge komutwe wange.

⁶ Ame onda ninginina mo fiyo okomikangha deemhunda. Oidilifo yedu ya patela nge mo fiyo alushe. Ndelenee Ove wa shila mo omwenyo mekololo, Omwene, Kalunga kange.

⁷ Omwenyo wange eshi we liumbilila mwaame, onda dimbulukwa Omwene neilikano lange la fika kwoove, motembeli yoye iyapuki.

⁸ Ovo tava fimaneke oikalunga yongaho, otava ekeleshi ou te va filonghenda.

⁹ Ndelenee ame nda hala oku ku yambela nondaka yepandulo. Eshi nde shi udanekela, ohandi ke shi wanifa. Exupifo oli li mOmwene.”

¹⁰ Opo Omwene okwa lombwela oshi oyo, i kungile Jona koukukutu.