HESEKIEL 2 - Ombibeli Iyapuki

Hesekiel ta ifanwa a ninge omuxunganeki

¹ Ndele Ye okwa lombwela nge: “Kaana komunhu, fikama neemhadi doye, opo handi ku popifa.”

² Ndele Omhepo ye uya mwaame fimbo ta lombwele nge, ndele tai kaleke nge ofika neemhadi dange. Ndele nde mu uda, ta popifa nge.

³ Opo nee Ye ta ti kwaame: “Kaana komunhu, Ame ohandi ku tumu kovana vaIsrael, kovapaani va efa nge, ve nondubo naame. Vo nooxe ova efa nge fiyo onena eli.

⁴ Ndele ohandi ku tumu kovana ve noipala idjuu nomitima dikukutu, ndele u noku va lombwela nokutya: Omwene, Omwene ta ti ngaha.

⁵ Ndelenee vo ngeenge tava pwilikine ile itava pwilikine, osheshi vo epata ihali dulika, otava ka shiiva nokutya omuxunganeki a li mokati kavo.

⁶ Ndele ove, kaana komunhu, ino va tila noino tila eendjovo davo, nande eeshosholo nomakiya e li pwoove, nou li mokati keendje. Ino tila eendjovo davo noino haluka oipala yavo, osheshi vo epata ihali dulika.

⁷ Ndelenee ove u noku va udifila eendjovo dange, ngeenge tava udu ile itava udu ko, osheshi ovo ovatangalali.

⁸ Ndelenee pwilikina, kaana komunhu, eshi handi ku lombwele. Ino kala omutangalali ngaashi epata olo ihali dulika li li. Akameka okanya koye, u lye eshi handi shi ku pe.”

⁹ Opo nda mona, tala, eke la ulika nge, ndele tala, mulo mwa li omushangwatonywa.

¹⁰ Ndele Ye okwe u nyanununa koshipala shange. Ndele o wa li wa shangwa meni nokombada. Nomuwo mwa shangelwa omaimbilokemo, nomahekumuno nomalilaano.