GENESIS 16 - Ombibeli Iyapuki

Hagar naIsmael

¹ Ndele Sarai, omwalikadi waAbram, ine mu dalela ounona. Ndele ye okwa li e na omupika Omuegipiti, edina laye Hagar.

² Ndele Sarai okwa lombwela Abram ta ti: “Ove ou shi shii, Omwene ina pa nge oludalo.” Inda komupika wange. Kashiimba ohandi ka mona oludalo muye. Ndele Abram okwa itavela Sarai.

³ Opo nee Sarai, omwalikadi waAbram, okwa kufa Hagar omupika waye Omuegipiti, Abram eshi a kala omido omulongo medu laKaanan, ndele te mu pe omulumenhu waye Abram, a ninge omwalikadi waye.

⁴ Ndele ye okwa nangala naHagar, ndele ta ningi oufimba. Ndele ye eshi a mona nokutya, ye omufimba, okwa dina Sarai, omwene waye.

⁵ Ndele Sarai okwa lombwela Abram: “Odino ei handi dinwa nayo nai ku alukile! Aame mwene nda yandja omupika wange mekolo loye, ndele paife eshi a dimbulukwa kutya ye omufimba, ota tale nge nodino. Omwene na tokole pokati ketu naave.”

⁶ Ndele Abram okwa nyamukula Sarai: “Omupika woye oku li mepangelo loye, mu ningila ngaashi tashi ku wapalele.” Opo nee Sarai e mu monifa oixuna, ndele ye okwa dja po onhapo puye.

⁷ Ndele omweengeli wOmwene okwe mu mona e li pofifiya yomofuka, pofifiya pondjila yokuSur,

⁸ ndele okwa pula: “Hagar, omupika waSarai, owa dja peni, noto i peni?” Ndele ye okwa nyamukula ta ti: “Ohandi i onhapo yomwene wange Sarai.”

⁹ Opo nee omweengeli wOmwene okwe mu lombwela: “Shuna kumwene woye, ove u lininipikile epangelo laye.”

¹⁰ Omweengeli wOmwene okwe mu lombwela natango ta ti: “Ame ohandi ka hapupalifa oludalo loye, olo tali ka nyengana okuvalwa molwouhapu walo.”

¹¹ Omweengeli wOmwene okwe mu lombwela yo ta ti: “Tala, ove oumufimba, ndele oto dala okaana okamati, ndele ou na oku ka luka Ismael, osheshi Omwene okwe ku uda moudjuu woye.

¹² Ndele ye ota ka ninga omulumenhu ngaashi ofino: eke laye otali ka tanganana kwaaveshe, nomake aaveshe otaa ka tanganana kuye! Ndele ota ka kala e na ouyelani kovamwaxe aveshe.”

¹³ Ndele ye okwa luka edina lOmwene, ou a popya naye: “Oove Kalunga u wete nge.” Osheshi ye okwa ti: “Ame onda mona ou a vilola, ou e wete nge?”

¹⁴ Onghee hano ye okwa luka omufima: “Beer-Lahai-Roi, u li pokati kaKades naBered.”

¹⁵ Ndele Hagar okwa dalela Abram omona omumati. Ndele Abram okwa luka omona ou a dalwa kuHagar, Ismael.

¹⁶ Ndele omido daAbram oda li omilongo hetatu nahamano, eshi Hagar e mu dalela Ismael.