मरकुस 9 - ओङ राजपूत

¹ ईशु ने वानु केहले, “मैं तम्हानु सच्‍च किहे पला कि जको इठे भिले, वांचे महु कुई-कुई इसड़े छी, कि जब तक नरीकारा चे राज़ नु सामर्थ समेत आले हुले नी ङेखती गिहे, तब तक मौत चा स्वाद कङी वी नी चाखे।”

ईशु ची महिमा

² छियां ङिहां चे बाद ईशु ने पतरस ते याकूब ते यूहन्‍ना नु लारे गेहले, ते वानु हेकले मां कुई ऊंचे पहाड़ा उपर गेहती गेला। ओठे वांचे सामणे ईशु चा रुप बदलती गेला।

³ ते ओची ओढ़णी इसड़ी चमकु लाग़ली ते इठे तक चमक पली, कि धरती उपर कुई धोब़ी वी उसड़ी चिट्टी ना कर सग़ी।

⁴ ते वानु मूसा ते एलिय्याह ङिसले। वे ईशु लारे बाता करी पलते।

⁵ ऐचे उपर पतरस ने ईशु नु केहले, “हे रब्बी, अम्चे इठे रेहणे आच्छे छै, तां अम्ही तीन मण्डप बणाऊ, हेक दुधे वास्ते, हेक मूसा वास्ते, ते हेक एलिय्याह वास्ते।”

⁶ पतरस ना जाणता कि का किहे पला, ऐवास्ते कि वे ब़ोहत ङरती गेलते।

⁷ बल्ति हेक बदला ने वानु घेरती गेले, ते बदला महु हा अवाज आली, “हा माया प्यारा पूत छै, ऐची सुणा!”

⁸ तब वाणे चारो-तरफ ङेखले, ते ईशु नु छोड़ती आपणे लारे नेरे कानु कोनी ङेखले।

⁹ जब वे पहाड़ा कनु उतरी पलते तब ईशु ने वानु हा आज्ञा ङिली कि जब तक मैं इन्साना चा पूत मरला आला महु जीता ना हुती जाये, तब तक जको कोच्छ तम्ही ङेखले कानु ना केहजा।

¹⁰ वाणे ये बाते नु आपणे भीतर राखले। बल्ति वे सोच-विचार करी पलते ले कि “मरती कर जीते हुवणे चा मतलब का छै?”

¹¹ ते वाणे ओकनु पूछले, “शास्त्री कां किही कि एलिय्याह चे पेहले आणे जरुरी छै?”

¹² ओणे वानु उत्तर ङिला, “एलिय्याह सच्‍चमां पेहले आती कर सब कोच्छ सुधारी, पर मैं इन्सान चे पूता चे बारे मां ईं कां लिखले पले कि ओ ब़ोहत ङोख चवी, ते तोच्छ गिणला जई।

¹³ पर मैं तम्हानु किहे पला, कि एलिय्याह तां आती चुकला, ते जिसड़े ओचे बारे मां लिखले पले, वाणे जको कोच्छ चाह्‍ले ओचे लारे करले।”

ईशु ने छोरा महु दुष्टात्मा नु काढ़ले

¹⁴ जिसे बेले ओ चैला चे गोढु आला, तां ङेखले कि वांचे चारो-तरफ बङी भीड़ लाग़ली पली ते शास्त्री वांचे लारे बहस करी पले।

¹⁵ ओनु ङेखते ही सारे ब़ोहत ही अचम्भा करु लाग़ले, ओची तरफ द्रोड़ती कर ओनु नमस्कार करले।

¹⁶ बल्ति ओणे वाकनु पूछले, “तम्ही वांचे लारे किसी बाते उपर बहस करा पले?”

¹⁷ भीड़ी महु हेके बन्दे ने ओनु उत्तर ङिला, “हे गुरु, मैं आपणे पूता नु, जाये गूंगी आत्मा समाली पली, दुधे गोढु आणले हुते।

¹⁸ जिठे-किठी वा ओनु पकड़ती गिहे, उठी ढाती ङिये, ते ऊं मुँहा महु झग़ बाहती पड़े, ते ङांत पीसे, ते सूकते जाये। मैं दुधे चैला कनु बिनती करली कि वे विनु काढ़ती ङियो, पर वे काढ़ ना सग़ले।”

¹⁹ ईं सुणती कर ईशु ने उत्तर ङिला ते वानु केहले, “हे अविश्‍वासी लौक, मैं कब तक तम्चे लारे रिही? ते कब तक तम्ची सेहता रिही ? ओनु माये गोढु गेहती आवा।”

²⁰ बल्ति वे ओ छोरा नु ओचे गोढु गेहती आले ते जिसे बेले दुष्टात्मा ने ईशु नु ङेखले बल्ति ओणे ओही बेले छोरा नु मरोड़ती नाखले। ऊं भोंये उपर चक्‍कर खाती ढेती पले। ओचे मुँहा महु झग़ निकलु पड़ती गेला ते लिटु लाग़ले।

²¹ बल्ति ईशु ने ओचे ब़ा कनु पूछले, “ईं इसड़े कितने ङिहां कनु छै?” ओचे ब़ा ने केहले, “ईं बचपना कनु इसड़े छै।

²² विणे ऐनू मारणे वास्ते कई बेले जाखते मां ते कई बेले पाणीया मां ढाले। पर अगर तु कोच्छ कर सग़ी, तां अम्चे उपर तरस खाती कर अम्चे उपर ऐहसान कर।”

²³ ईशु ने ओनु केहले, “अगर तु कर सग़ी? हा का बात छै। विश्‍वास करने आला वास्ते सब कोच्छ हो सग़े छै।”

²⁴ छोरा चे ब़ा ने तुरुन्त गिड़गिड़ाती कर केहले, “हे प्रभु, मैं विश्‍वास करे पला, माये अविश्‍वास चा उपा कर।”

²⁵ जिसे बेले ईशु ने ङेखले कि लौक द्रोड़ती कर भीड़ लावी पले, तां ओणे अशुद्ध आत्मा नु ईं केहती कर दड़काले, “हे गूंगी ते बहरी आत्मा, मैं तनु आज्ञा ङिये पला, ऐचे महु निकलती आ, ते ऐचे मां दुबारा कङी घिरयो ना पली।”

²⁶ बल्ति वा चीकती कर ते ओनु ब़ोहत मरोड़ती कर, ते निकलती आली, ते ब़ाल मरले समान हुती गेले, इठे तक कि ब़ोहत लौक किहुं लाग़ले कि ऊं मरती गेले।

²⁷ पर ईशु ने ओचा हाथ पकड़ती कर ओनु उठाणले ते ऊं खड़े हुती गेले।

²⁸ जिसे बेले ईशु घरे आला, तां ओचे चैला ने हेकले मां ओकनु पूछले, “अम्ही विनु कां कोनी काढ़ सग़ले?”

²⁹ ऐचे उपर ईशु ने वानु केहले, “इसड़े भूत प्राथना चे बिना ना निकल सग़ी।”

आपणी मौत चे बारे मां ईशु ने दुबारा केहले

³⁰ बल्ति वाणे वा जग़हा छोड़ती ते वे गलील महु हुती कर जई पलते, ईशु ईं ना चाहवेला कि लौका नु ये बाते चा पता लाग़ो वे किठे छी,

³¹ कांकि ओ आपणे चैला नु शिक्षा ङिये पलता, ओणे वानु केहले, “मैं इन्साना चा पूत, बन्दा चे हाथा मां पकड़वाला जई, ते वे ओनु मारती नाखे। ते ओ मरणे चे तीन ङिहां चे बाद जीता हुती जई।”

³² पर हा बात वांची समझी मां कोनी आली, ते वे ओकनु पूछणे कनु ङरते।

सारा महु बङे कूण छै?

³³ बल्ति वे कफरनहूम मां आले ते घरे आती कर ओणे वाकनु पूछले, “मार्ग़ा मां तम्ही किसी बाते ची बहस करा पलते?”

³⁴ पर वे चोप रेहले। कांकि मार्ग़ा मां वाणे आपस मां हा बहस करली हुती कि अम्चे महु बङे कूण छै।

³⁵ बल्ति ओणे ब़ेसती कर ब़ारहा प्रेरितां नु हकारले ते वानु केहले, “अगर कुई बङे हुवणे चाहवे, तां सबकनु छोटा ते सब चा सेवक बणो।”

³⁶ ते ओणे हेक ब़ाला नु गेहती कर वांचे बीच मां खड़े करले, ते ओनु गोङी मां चती कर, वानु केहले,

³⁷ “जको कुई माये नांवा लारे इसड़े ब़ाला महु कुई हेक नु वी स्वीकार करे, ओ मनु स्वीकार करे, ते जको कुई मनु स्वीकार करे, ओ मनु ना, बल्कि माये भेज़णे आले नु स्वीकार करे।”

जको अम्चा विरोधी कोनी, ओ अम्चे पक्षा मां छै

³⁸ तब यूहन्‍ना ने ईशु नु केहले, “हे गुरु, अम्ही हेके बन्दे नु दुधे नांवा लारे दुष्टात्मा नु काढ़ते ङेखले ते अम्ही ओनु मना करले, कांकि ओ अम्चे भांसु ना हुती पड़ी।”

³⁹ ईशु ने केहले, “ओनु मना ना करा, कांकि इसड़े कुई कोनी जको माये नांवा लारे सामर्थ चे काम करो, ते जल्दी लारे मनु बुरे केह सग़े।

⁴⁰ कांकि जको अम्चे विरोध मां कोनी, वे अम्चे तरफ छै।

⁴¹ जको कुई हेक मुंगर पाणी पिलावे ऐवास्ते कि तम्ही मसीह चे छिवा मैं तम्हानु सच्‍च किहे पला, ओ किसी रीति लारे आपणा प्रतिफल नी गुंवी।

पाप ची वजह ना बणा

⁴² “जको कुई यां छोटा महु जको माये उपर विश्‍वास करी, कानु ठोकर खुलाओ तां ओचे वास्ते ईं भले छै कि हेक बङी घर्टी चा पोड़ ओचे गले मां लटकाला जईया ते ओ समुन्दरा मां नाखती ङिला जईया।

⁴³ अगर दुधा हाथ तनु ठोकर खुलाओ तां ओनु बाढती नाख। टुन्डा हुती कर जीवन मां जाणे दुधे वास्ते ऐचे कनु भले छै कि ङोन हाथ रेहते हुले नर्का चे जाखते मां नाखला जई जको कङी ब़िझणे चे कोनी।

⁴⁴ जिठे वांचा कीड़ा ना मरी ते जाखते ना ब़िझी।

⁴⁵ अगर दुधा पग़्ग़ तनु ठोकर खुलाओ तां ओनु बाढती नाख। लंगड़ा हुती कर जीवन मां जाणे दुधे वास्ते ऐचे कनु भले छै कि ङोन पग़्ग़ रेहते हुले नर्का मां नाखला जई।

⁴⁶ जिठे वांचा कीड़ा ना मरी ते जाखते ना ब़िझी।

⁴⁷ अगर दुधी आंख तनु ठोकर खुलाओ तां विनु काढ़ती नाख। काणा हुती कर नरीकारा चे राज़ मां जाणे दुधे वास्ते ऐचे कनु भले छै कि ङोन आंखी रेहते हुले तु नर्का मां नाखला जई।

⁴⁸ नर्का चे कीड़े कङी ना मरी, ते जाखते कङी ना ब़िझी।

⁴⁹ “कांकि हर हेक जन जाखते लारे नमकीन करले जई।

⁵⁰ “लूण आच्छे छै, पर अगर लूणा चा स्वाद बिगड़ती जाये तां बल्ति किसी चीजे लारे नमकीन करले जई? “आपणे मां लूण राखा ते हेके ङुजे लारे प्यारा लारे रिहा।”