मत्ती 13 - ओङ राजपूत

बीज राहवणे आले ची मिसाल

¹ ओही ङिओ ईशु घरा महु निकलती कर झील चे किनारे जती ब़ेहला।

² ते ओचे गोढु इसड़ी बङी भीड़ भेली हुली कि ओ हेक ब़ेड़ी उपर चढ़ती गेला ते सारी भीड़ भोंये उपर झील चे किनारे लारे भिली रेहली।

³ ते ओणे वानु मिसाला मां ब़ोहत सारीया बाता केहलीया, “हेक बीज राहवणे आला बीज राहवणे वास्ते निकड़ला।

⁴ राहते बेले कोच्छ मार्ग़ चे किनारे ढेले ते पखीयां ने आती कर वानु चुग़ती गेले।

⁵ कोच्छ बीज पत्थरीली भोंये उपर ढेले, जिठे वानु घणी माटी कोनी मिड़ली ते गहरी माटी ना मिलणे ची वजह वे जल्दी उग़ती आले।

⁶ ते जब सूरज निकड़ला तां ब़लती गेले, ते ज़हड़ ना पकड़ने ची वजह सूखती गेले।

⁷ कोच्छ बीज झाड़ीया मां ढेले ते झाड़ीया बङीया हुती कर वानु दब़ाती नाखले।

⁸ पर कोच्छ बीज आच्छी भोंये उपर ढेले, ते फल आणला, कुई साऔ गुणा, कुई साठ गुणा, ते कुई त्रीस गुणा।

⁹ जाये सुणने चे कान हो ऊं सुणती गिहो।”

मिसाल चा मकसद

¹⁰ चैला ने गोढु आती कर ईशु नु केहले, “तु लौका लारे मिसाला मां कां बाता करी ?”

¹¹ ओणे उत्तर ङिला, “तम्हानु तां स्वर्ग़ चे राज़ चे भेदा ची समझ ङिली गेली, पर वानु कोनी।

¹² कांकि जाये कनु छै, ओनु ङिले जई, ते ओचे कनु घणे सारे हुती जई। पर जाये कनु कोच्छ कोनी, ओचे कनु जको कोच्छ ओचे गोढु छै, ऊं वी गेहती गेले जई।

¹³ मैं वांचे लारे मिसाला मां ऐवास्ते बाता करे कि, “वे ङेखते हुले ना ङेखी, ते सुणते हुले ना सुणी।

¹⁴ “तां वांचे बारे मां यशायाह ची हा भविष्यवाणी पुरी हुली, “ ‘तम्ही काना लारे तां सुणा, पर समझा ना, ते आंखी लारे तां ङेखा, पर तम्हानु कहीं सूझी ना।

¹⁵ कांकि जा लौका चे मन मोटे हुती गेले, ते काना लारे ऊंचे सुणी ते आपणीया आंखीया बन्द करती गेलीया, कङी इसड़े ना हो कि वे आंखीया लारे ङेखी, ते काना लारे सुणी, ते मना लारे समझी ते फिरती जई मैं वांचा उद्धार करी।’

¹⁶ “पर धन्‍न छी तम्चीया आंखी, कि वे ङेखी, ते तम्चे कान कि वे सुणी।

¹⁷ कांकि मैं तम्हानु सच्‍च किहे पला कि ब़ोहत से भविष्यवक्‍ता ने ते धर्मीया ने चाह्‍ले कि जको बाता तम्ही ङेखा पले, ङेखो, पर कोनी ङेखलीया, ते जको बाता तम्ही सुणा पले, सुणो, पर कोनी सुणलीया।

बीज राहवणे ची मिसाल चा मतलब

¹⁸ “हमा तम्ही बीज राहवणे आले ची मिसाली चा मतलब सुणा।

¹⁹ जको कुई राज़ चा वचन सुणती कर ना समझी, ओचे मना मां जको कोच्छ राहले गेले हुते, ओनु ओ दुष्ट आती कर खोसती कर चाह्‍ला जाये, ईं ऊंही बीज छै, जको मार्ग़ चे किनारे राहले गेले हुते।

²⁰ ते जको पत्थरीली भोंये उपर राहले गेले, ये वे छी, जको वचना नु सुणती कर तुरन्त खुशी लारे मनती गिही।

²¹ पर आपणे भीतर ज़हड़ ना राखणे ची वजह कनु वे थोड़े ही ङिहां चे छी। ते जिसे बेले वचना ची वजह कनु वांचे उपर क्लेश जा परेशानी आवे, तां वे तुरन्त ठोकर खाती जई।

²² जको झाड़ीया मां राहले गेले, ईं ऊंही बीज छै, जको वचना नु सुणे, पर ऐ संसारा ची चिन्ता ते धन चा धोक्‍का वचना नु दब़ाती नाखे, ते ऊं फल ना आणी।

²³ जको आच्छी भोंये मां राहले गेले, ये वे छी, जको वचना नु सुणती कर समझे, ते फल आणे, कुई साओ गुणा, कुई साठ गुणा, ते कुई त्रीस गुणा।”

जंगली बीजा ची मिसाल

²⁴ ईशु ने वानु हेक ङुजी मिसाल ङिली, “स्वर्ग़ा चा राज़ ओ बन्दे चे आलीकर छै जेह्णे आपणे खेता मां आच्छे बीज राहले।

²⁵ जिसे बेले बन्दी नूहली ही पलती ली ते ओचा दुश्मन आती कर कणकी चे बीजा मां जंगली बीज राहली कर चाह्‍ला गेला।

²⁶ जिसे बेले कणकी ची सीटी लाग़ली ते जंगली खड़ा ची ब़ूटी वी ङिसली।

²⁷ ऐचे उपर घरा चे दासा ने आती कर मालिका नु केहले, ‘ओ स्वामी, का तु आपणे खेता मां आच्छे बीज कोनी राहले हुते? बल्ति जंगली खड़ा ची ब़ूटी ओचे मां किठु आली?’

²⁸ ते ओणे वानु केहले, ‘ईं कुई दुश्मना चे काम छै’। दासा ने ओनु केहले, ‘दुधी का इच्छा छै, कि अम्ही जती कर वानु भेली करती गिहुं?’

²⁹ ओणे केहले, ‘ना इसड़े ना हो कि जंगली ब़ूटा नु भेले करते समय उपर तम्ही कणकी चे ब़ूटा नु वी पटती नाखा।

³⁰ फसल बाढणे चे समय तक ङुंहु नु हेकी लारे बध्धु ङिया, ते बाढणे चे समय उपर मैं बाढणे आला नु किही कि पेहले तां जंगली खड़ा चे ब़ूटा नु चुणती कर ब़ालणे वास्ते वांचे ग़ंढे ब़ांहती गेहजा, ते कणकी नु माये पिएड़ा मां भेले करती नाखा।’ ”

राई चे ङाणा ची मिसाल

³¹ ईशु ने वानु हेक नेरी मिसाल ङिली, “स्वर्ग़ चा राज़ राई चे हेक ङाणे आलीकर छै, जानु कुई बन्दे ने चती कर आपणे खेता मां राहती ङिले।

³² ऊं सारे बीजा महु छोटे तां हुवे पर जिसे बेले बङे हुती जाये, तब सब साग़-पात कनु बङे हुवे, ते इसड़े ब़ूटे हुती जाये कि आसमाना ची पखीयें आती कर ओचे लड़ीया उपर बसेरा करी।”

खमीरा ची मिसाल

³³ ईशु ने वानु हेक नेरी मिसाल सुणाली, “स्वर्ग़ा चा राज़ खमीरा आलीकर छै जानु कुई असतरी ने चती कर तीन पंसेरी आट्टे मां मिलाती ङिला ते हुते-हुते सारे आट्टे खमीर हुती गेले।”

मिसाल चा इस्तेमाल

³⁴ ये सारीया बाता ईशु ने मिसाला मां लौका नु केहलीया, ते बिना मिसाला चे ओ वानु कहीं ना केहता।

³⁵ कि जको वचन भविष्यवक्‍ता चे जरिये केहला गेलता, ओ पूरा हो, “मैं मिसाल केहणे वास्ते आपणे मुँह खोली ते वा बाता नु जको सृष्टि ची शुरुआत कनु लुकलीया पलतीया वानु किही।”

जंगली खड़ा ची मिसाल

³⁶ बल्ति ओ भीड़ी नु छोड़ती कर घरे आला, ते ओचे चैला ने ओचे गोढु आती कर केहले, “खेता चे जंगली खड़ा ची मिसाल अम्हानु समझाती ङे।”

³⁷ ईशु ने वानु उत्तर ङिला, “आच्छे ङाणा नु राहवणे आला मैं इन्साना चा पूत छै।

³⁸ खेत संसार छै, आच्छे ङाणे राज़ ची ऊलाद्ध छै, ते जंगली ङाणे दुष्ट ची ऊलाद्ध छै।

³⁹ जिसे दुश्मना ने ओनु राहले ओ शैतान छै, फसल बाढणे ऐ जग़त चा अन्त छै, ते फसल बाढणे आले स्वर्ग़दूत छी।

⁴⁰ तां जिसे बेले जंगली खड़ भेले करले जई ते बाढले जई, ते इसड़े ही जग़त चे अन्त मां हुवी।

⁴¹ मैं इन्साना चा पूत आपणे स्वर्ग़दूता नु भेज़ी, ते वे ओचे राज़ महु सारे पापीया नु, ते जको बन्दा कनु पाप करवावी वानु भेले करे।

⁴² ते वानु जाखते ची भट्टी मां नाखती ङिये जिठे रोवणे ते ङांत पीसणे हुवी।

⁴³ ओ समय धर्मी आपणे ब़ा चे राज़ मां सूरजा आलीकर चमके। जाये सुणने चे कान हो ऊं सुणती गिहो।

लुकले आले खजाने ची मिसाल

⁴⁴ “स्वर्ग़ा चा राज़ खेता मां लुकले आले धन आलीकर छै, कुई बन्दे ने ओनु सोहले ते बल्ति लुकाती नाखले, ते खुशी लारे जती कर आपणे सारा कोच्छ बेचती नाखले ते ओ खेत मोल गेहती गेला।

अनमोल मोतीयां ची मिसाल

⁴⁵ “बल्ति स्वर्ग़ा चा राज़ हेक व्यपारीया चे आलीकर छै, जको आच्छे मोतीयां ची खोज मां हुता।

⁴⁶ जिसे बेले हेक कीमती मोत्ती मिड़ला ते ओणे जती कर आपणे सारे कोच्छ बेचती नाखले ते ओनु मोल गेहती गेले।

जाल ची मिसाल

⁴⁷ “बल्ति स्वर्ग़ा चा राज़ ओ बङे जाला चे आलीकर छै जको समुन्दरा मां नाखती ङिला जाये, ते हर-प्रकार चीया माछलीया नु समेटती आवे।

⁴⁸ ते जिसे बेले जाल भरीती जाये, ते मछुवारे ओनु किनारे उपर छिकती आवी ते ब़ेसती कर आच्छीया-आच्छीया माछलीया नु ठांवा मां भेलिया करी, ते निक्‍कमीया-निक्‍कमीया नु भुकाती नाखी।

⁴⁹ ऐ जग़त चे अन्त मां इसड़े ही हुवी। स्वर्ग़दूत आती कर दुष्टा नु धर्मीया कनु अलग़ करे।

⁵⁰ ते वानु जाखते ची भट्टी मां नाखती ङिये जिठे रोवणे ते ङांत पीसणे हुवी।”

पुराणी ते नवीं शिक्षा चा मतलब

⁵¹ ईशु ने आपणे चैला नु केहले, “का तम्ही ये सारीया बाता समझलीया?” वाणे केहले, “हव्वे।”

⁵² ईशु ने वानु केहले, “ऐवास्ते हर हेक शास्त्री जको स्वर्ग़ा चे राज़ ची शिक्षा पाती चुकला, ओ घरा आलीकर छै, जको आपणे भीतरु नवींया ते पुराणीया चीजा नु काढ़ी।”

नासरत मां ईशु चा कद्दर कोनी करला

⁵³ जिसे बेले ईशु ये सारीया मिसाला केहती चुकला, तां उठु चाह्‍ला गेला।

⁵⁴ ते आपणे शहरा मां आती कर वांचे प्राथनाघरा मां वानु इसड़ा उपदेश ङिऊं लाग़ला, कि वे अचम्भित हुती कर किहुं लाग़ले, “ऐनू हा ज्ञान ते सामर्थ चे काम किठु मिड़ले?

⁵⁵ का हा दरखाणा चा पूत कोनी? ते का ऐची आई चे नां मरियम कोनी ते ऐचे भावां चे नांवे याकूब, यूसुफ, शमौन ते यहूदा कोनी?

⁵⁶ ते का ऐचीया ब़ेहणी अम्चे बीच मां ना रिही? बल्ति ऐनू हा सब ज्ञान किठु मिड़ला?”

⁵⁷ यूं करती वाणे ओचे बारे मां ठोकर खाली। पर ईशु ने वानु केहले, “भविष्यवक्‍ता चे आपणे देश ते आपणे घरा नु छोड़ती नेरे किठी निरादर ना हुवी।”

⁵⁸ ते ओणे ओठे वांचे अविश्‍वास ची वजह ब़ोहत से सामर्थ चे काम कोनी करले।