यूहन्ना 6 - ओङ राजपूतपाँच हजार मर्दा नु खुलावणे ( मत्ती 14:13–21 ; मरकुस 6:30–44 ; लूका 9:10–17 ) 1 यां बाता चे बाद ईशु गलील ची झील यानिकि तिबिरियास ची झील चे पार गेला। 2 हेक बङी भीड़ ओचे भांसु टुरती पली कांकि जको अचम्भे चे कामा चे चैन्ह ईशु करता बिमारा नु ठीक करने चे वास्ते भीड़ वानु ङेखती। 3 बल्ति ईशु पहाड़ा उपर चढ़ती ते चैला चे गोढु जती कर ब़ेसती रेहला। 4 ते यहूदिया चा फसह चा तेंहवार गोढु हुता। 5 जब ईशु ने हेक बङी भीड़ आपणे गोढु आते ङेखले, तां फिलिप्पुस नु केहले, “अम्ही यांचे खाणे चे वास्ते किठु रोटी मोल आणु?” 6 पर हा बात ईशु ने फिलिप्पुस नु परखणे वास्ते केहली, पर आप जाणता कि ओ खौद्द का करने आला छै। 7 फिलिप्पुस ने ओनु उत्तर ङिला, “ङोन साऔ चान्दी चे सिक्का चा रोटीया वी वांचे वास्ते पुरीया नी हुवे कि वांचे महु हर हेके नु थोड़ी-थोड़ी मिलती आओ।” 8 ओणे चैला महु शमौन पतरस चा भऊ अन्द्रियास ने ओनु केहले, 9 “इठे हेक छोर छै जाये कनु जव्वां चा पाँच रोटीया ते ङोन माछलीया छी, पर इतने लौका चे वास्ते वे का छी?” 10 ईशु ने केहले, “लौका नु ब़िसाणती ङिया।” वे जग़हा ब़ोहत खड़ हुते, वां लौका ची गिणती मां लगभग पाँच हजार मर्द हुते, ब़ेसती रेहले। 11 बल्ति ईशु ने वे रोटीया चलीया ते नरीकारा चा धन्यवाद करती कर ब़ेसणे आला नु बांटती ङिलीया। ते यूंही माछलीया महु जितनीया वे चाहते बांटती ङिलीया। 12 जिसे बेले सब खाती कर रज़ती गेले, तां ओणे चैला नु केहले, “बचलीया आलीया रोटीया नु भेले करती गिहा। कि कहीं भुकाले ना जाओ।” 13 तां वाणे भेले करलीया, ते जव्वां चा पाँच रोटीया कनु जको खाणे आला कनु बचलीया आलीया हुतीया, ब़ारहा टोकरे भरती कर चले। 14 बल्ति वे बन्दी ऐ अचम्भे चे कामा चे चैन्ह नु ङेखती कर किहुं लाग़ली, “पक्के ही ईं बन्दे भविष्यवक्ता छै जको संसारा मां आणा हुता ईं छै।” 15 ईशु ने ईं जाणती गेहले कि लौक ओनु दब़ाव लारे राजा बणावणे चाहवी, ऐवास्ते ओ उठु पहाड़ा उपर हेकला चाह्ला गेला। ईशु चे पाणीया पर टुरणे ( मत्ती 14:22–33 ; मरकुस 6:45–52 ) 16 जब आथण हुले, तां ओचे चैले झील चे किनारे गेले, 17 ते हेक ब़ेड़ी उपर चढ़ती कर झील चे पार कफरनहूम सनु जऊं लाग़ले। ओस समय उपर अन्धारे हुती गेलते, ते ईशु हालि तक वांचे गोढु कोनी आला हुता। 18 अन्धारी ची वजह कनु झीली मां लहरा उठु लाग़लीया। 19 जिसे बेले वे ब़ेड़ी चलाते-चलाते तीन चार मील चे लगभग निकलती गेले, तां वाणे ईशु नु झीली चे उपर टुरते ते ब़ेड़ी चे गोढु आते ङेखले, ते ङरती गेले। 20 पर ईशु ने वानु केहले, “मैं छै, ङरा ना!” 21 तां वे ओनु ब़ेड़ी उपर चढ़ावणे वास्ते तियार हुले, ते तुरन्त वा ब़ेड़ी वे जग़हा उपर जती पुज़ली जिठे वे जई पलते। लौका चे ईशु नु सोधणे 22 ङुजे ङिओ वे भीड़ ने जको झीली चे पार भिली हुती ईं ङेखले कि इठे हेको ब़ेड़ी हुती, ते ईशु आपणे चैला चे लारे वे ब़ेड़ी मां कोनी गेला हुता, ते ओचे चैले हेकले ही रवाना हुले हुते। 23 तिबिरियास शहरा चा कोच्छ ब़ेड़ीया वे जग़हा उपर आती कर रुकलीया, जिठे प्रभु ने धन्यवाद करती कर वानु रोटी खाणे वास्ते ङिलीया हुतीया। 24 ते जिसे बेले भीड़ी ने ङेखले कि ना तां ईशु छै ते ना ओचे चैले, बल्ति वा भीड़ ब़ेड़ीया मां ब़ेसती कर ईशु नु सोधते हुले कफरनहूम नु पुज़ली। ईशु जीवन ची रोटी 25 ते जिसे बेले भीड़ ईशु नु झील चे पेले पासु मिड़ली, ते ओनु केहले, “हे गुरु जी, तु इठे किसे बेले आला?” 26 ईशु ने वानु केहले, “मैं तम्हानु सच्च-सच्च किहे पला, तम्ही मनु ऐवास्ते कोनी सोधा पलते, कि अचम्भे चे कामा चे चैन्ह ङेखले, पर ऐवास्ते सोधा पलते कि तम्ही रज़ती कर रोटीया खालीया। 27 ओ खाणे वास्ते मेहनत ना करा जको सड़ती जाये, बल्कि ओ खाणे वास्ते जत्तन करा जको सदा वास्ते बणला रिही ते अनन्त जीवन ङिही, ते जानु मैं इन्सान चा पूत ङिही। कांकि ब़ा नरीकारा ने आपणी छाप माये उपर लाली।” 28 बन्दा ने ईशु कनु पूछले, “नरीकार जिसा कामा नु चाहवे, वानु करने वास्ते अम्ही का करु?” 29 ईशु ने वानु केहले, “नरीकार जको चाहवे, ऊं काम ईं छै, कि ओचे उपर विश्वास करा जानु नरीकारा ने भेज़ले।” 30 बन्दा ने ईशु कनु पूछले, “तु किसे अचम्भे चे चैन्ह ङिखाणी कि अम्ही ङेखती कर विश्वास करु? ते तु किसे काम ङिखाणी? 31 अम्चे ङाङा-ब़ा ने बरब्यान मां मना खाला, जिसड़े पवित्रशास्त्रा मां लिखले पले, ‘ओणे वानु खाणे वास्ते स्वर्ग़ा कनु रोटी ङिली हुती।’ ” 32 ईशु ने वानु केहले, “मैं तम्हानु सच्च-सच्च किहे पला, कि मूसा ने तम्हानु स्वर्ग़ा कनु रोटी कोनी ङिलती, पर माया ब़ा तम्हानु स्वर्ग़ा कनु सच्ची रोटी ङिये वे। 33 कांकि ब़ा नरीकारा ची रोटी वा छै जको स्वर्ग़ा कनु उतरती संसारा नु जीवन ङिये।” 34 बन्दा ने ओनु केहले, “हे गुरु जी, अम्हानु हा रोटी सदा ङिले रिहे।” 35 बल्ति ईशु ने वानु केहले, “मैं ही जीवन ची रोटी छै। जको माये गोढु आवे ऊं कङी भुक्के नी रिही, ते जको माये उपर विश्वास राखी ऊं कङी तरसेले आले नी रिही। 36 मैं तम्हानु पेहले ही बावड़ती चुकला, कि तम्ही मनु ङेखती गेले बल्ति वी तम्ही माये उपर विश्वास ना करा। 37 हर हेक बन्दे जको नरीकारा ने मनु सोंपले वे माये गोढु आवे, जको माये गोढु आवे मैं वानु कङी वी नी काढ़ी। 38 कांकि मैं स्वर्ग़ा कनु आपणी मर्जी चे अनुसार काम करने चे वास्ते कोनी आला बल्कि नरीकारा ची मर्जी पुरी करु आला, जेह्णे मनु भेज़ले। 39 माये भेज़णे आले ची हाओ मर्जी छै, ओणे जको कहीं मनु सोंपले वांचे महु मैं कनु गार ना करे, ते अन्त चे समय उपर वा सारा नु जीते करती ङिही। 40 कांकि हाओ माये ब़ा नरीकारा ची मर्जी छै हर हेक बन्दे जको पूता नु ङेखे ते विश्वास करी ते ओनु अनन्त जीवन मिली, ते अन्त चा ङिहां मां मैं ओनु जीते करती ङिही।” 41 ये बाते उपर यहूदी ओचे उपर कुड़कुड़ाऊ लाग़ती गेले, कांकि ईशु ने केहले हुते, “वा रोटी मैं छै जको स्वर्ग़ा कनु उतरली।” 42 वाणे केहले, “का हाओ यूसुफ चा पूत ईशु कोनी? जाये आई-ब़ा नु अम्ही ना जाणु? बल्ति हा किवें केह सग़े कि, ‘मैं स्वर्ग़ा कनु उतरला?’ ” 43 ईशु ने वानु केहले, “आपस मां कुड़कुड़ाणे बन्द करा। 44 माये गोढु तब तक कुई ना आ सग़ी जब तक मनु भेज़णे आला माया ब़ा नरीकार ओनु माये गोढु गेहती ना आवी। बल्ति मैं ओनु अन्त चे समय उपर जीते करती ङिही। 45 भविष्यवक्ता चीया किताबा मां ईं लिखले पले, ‘वे सारे नरीकारा ची ओर कनु सिखाले आले हुवे।’ हर हेक ऊं बन्दे जको ब़ा नरीकारा ची सुणे ते ओकनु सीखे ऊं माये गोढु आवी। 46 वास्तव मां ब़ा नरीकारा नु किह्णी वी कोनी ङेखले, सेर्फ मैं ही ब़ा नरीकारा नु ङेखले, जेह्णे मनु भेज़ले। 47 “मैं सच्च किहे पला, कि जको माये उपर विश्वास करी, अनन्त जीवन वांचा छै। 48 मैं ही जीवन ची रोटी छै। 49 तम्चे ङाङा-ब़ा ने बरब्याना मां मना खाला, तां वी वे मरती गेले। 50 हा वा रोटी छै जको स्वर्ग़ा कनु उतरली ताकि इन्सान विचे महु खाओ ते ना मरो। 51 मैं ही वा जीती रोटी छै जको स्वर्ग़ा कनु उतरली। अगर ये रोटी नु कुई खाये ते ऊं सदा जीते रिही। ते वा रोटी जानु मैं ङिही माये शरीर छै, ऐची वजह कनु संसार जीता रिही।” 52 बल्ति यहूदी आपस मां ईं केहती कर बहस-बाजी करु लाग़ली, “हा आपणे शरीर अम्हानु खाणे वास्ते किवें ङे सग़े?” 53 ये बाते उपर ईशु ने वानु केहले, “मैं तम्हानु सच्च किहे पला, जब तक मैं इन्साना चे पूता चे शरीरा नु नी खावा ते माये लुहीं नी पीया, तब तक तम्चे मां जीवन नी हुवी। 54 जको माये शरीरा नु खाते रिही ते माये लुहीं पीते रिही अनन्त जीवन ओचा छै, अन्त चे समय पे मैं ओनु बल्ति जीते करी। 55 कांकि माया शरीर वास्तव मां खाणे ची चीज छै, ते माये लुहीं वास्तव मां पीणे ची चीज छै। 56 जको माये शरीरा नु खाते रिही ते माये लुहींया नु पीते रिही ऊं माये मां बणले रिही, ते मैं ओचे मां बणला रिही। 57 बिल्कुल यूंही जिंवे जीते ब़ा ने मनु भेज़ले ते मैं ब़ा नरीकारा ची वजह कनु ही जीता छै, यूंही जको माये शरीरा नु खाते रिही ऊं माई वजह कनु जीते रिही। 58 हा वा रोटी छै जको स्वर्ग़ा कनु उतरली। हा ओ मना कोनी जको तम्चे ङाङा-ब़ा ने खाला हुता ते बादा मां वे मरती गेलते। पर जको ये रोटी नु खाते रिही, ऊं सदा वास्ते जीते रिही।” 59 ईशु ने ये बाता कफरनहूम शहरा चे प्राथनाघरा मां उपदेश ङिते बेले केहलीया। हमेशा ची जीन्दगी चे वचन 60 ईशु चे ब़ोहत चैला ने ये बाता सुणती कर केहले, “हा कठोर बात छै, यिनु कूण सोण सग़े?” 61 ईशु नु आप पता लाग़ती गेला कि ओचे चैला नु कुई बाते ची शकेत छै। ऐवास्ते ओ वानु किहुं लाग़ला, “का तम्ही ये शिक्षा कनु परेशान छिवा? 62 अगर तम्ही मैं इन्साना चे पूता नु उपर जते ङेखा, जिठे मैं पेहले रेहता, ते तम्ही का करा? 63 नरीकारा ची आत्मा छै जको जीवन ङिये, शरीरा चे कामा लारे कुई फायदा कोनी। वचन जको मैं तम्हानु केहले, वे आत्मिक जीवन ङी। 64 पर तम्चे महु कोच्छ इसड़े वी छी जको विश्वास ना करी।” ईशु शुरु कनु ही जाणता कि वे कूण छी जको विश्वास ना करी ते ओ कूण छै जको ओनु धोक्का ङिही। 65 ईशु ने केहले, “ऐवास्ते मैं तम्हानु केहले हुते कि माये गोढु तब तक कुई ना आ सग़ी जब तक ब़ा नरीकार ओनु माये गोढु भेज़णे ची इजाजत ना ङिती ङी।” पतरस चा विश्वास 66 ऐह वजह कनु ईशु चे ब़ोहत सारे चैले वापिस चाह्ले गेले। ते बल्ति कङी वी ओचे भांसु कोनी टुरले। 67 बल्ति ईशु ने आपणे ब़ारहा चैला नु केहले, “का तम्ही वी जाणे चाहवा?” 68 शमौन पतरस ने उत्तर ङिला, “हे प्रभु, अम्ही काये गोढु जऊं? वे वचन तां दुधे कनु छी जको अनन्त जीवन ङिही। 69 ते अम्ही विश्वास करला ते जाणती गेले कि नरीकारा चा पवित्र जन तु ही छी।” 70 ईशु ने केहले, “का मैं तम्हानु ब़ारहा जणा नु कोनी चुणले? बल्ति वी तम्चे महु हेक शैतान छै।” 71 ईं ओणे शमौन इस्करियोती चा पूत यहूदा चे बारे मां केहले हुते, कांकि ओही ब़ारहा चैला महु हेक हुता, जको ईशु चे विरोध मां हुती कर धोक्के लारे पकड़ावणे पे हुता। |
CC BY-NC-ND 4.0