गलातियां 5 - ओङ राजपूतआजाद बणले रिहा 1 मसीह ने आजादी वास्ते अम्हानु आजाद करले, तां ऐचे मां आपणे विश्वास नु पक्के राखा ते बल्ति नियम विधान चे जूले चे रुप मां गुलामी चा वजन ना चवा। 2 सुणा मैं पौलुस तम्हानु किहे कि अगर तम्ही विश्वास करने चे बाद खतना करवावा ते तम्हानु मसीह कनु कुई फायदा नी हुवी। 3 फेर वी मैं हर खतना कराणे आले नु चितावनी ङिये कि ओनु सारे मूसा चे व्यवस्था मनणे पड़े। 4 तम्ही जको वी व्यवस्था लारे धर्मी जुड़ने चाहवा मसीह कनु अलग़ हुती जावा, ते नरीकारा चा अनुग्रह कनु दूर हटती जावा। 5 पर अम्ही विश्वास चे वजह नरीकारा चे सामणे निर्दोष बणने ची आस राखु। पवित्र आत्मा ची सहायता लारे अम्ही ऐची बाट ङेखु भिले। 6 मसीह ईशु मां ना खतना ते ना बिना खतना कुई कामा चा छै, पर सेर्फ विश्वास, जको प्रेम चे जरिये असर नाखे। 7 तम्ही तां आच्छी तरह हेक मसीह जीन्दगी जीवा पलते हमा इसड़ा का हुती गेला जको तम्हानु सच्चाई उपर चलणे वास्ते रोके पला? 8 इसड़ी सीख जको तम्हानु नरीकारा ची सच्चाई कनु दूर करे पली, वा तम्हानु हकारने आले नरीकारा ची तरफा कनु कोनी। 9 ध्यान राखा, “थोड़ा जा खमीर सारे उसणले आले आट्टे नु खमीर करती नाखे।” 10 मैं प्रभु उपर तम्चे बारे मां भरोसा राखे, तम्चे मां कुई नेरा विचार नी हुवी, पर जको तम्हानु घब़राती ङिये, ऊं कुई कां ना हो नरीकार ओनु सही सजा ङिही। 11 पर हे भऊ ब़ेहणी, अगर मैं हमा तक खतने चा प्रचार करी हा, तां कां हमा तक सताला जाये? अगर इसड़े हुवीया तां मसीह चे क्रूसा ची वजह कनु आली सारी रुकावटा खत्तम हुती जईया। 12 मैं चाहवे वे जको तम्हानु भटकावणे चाहवी, खतना कराणे चे लारे आपणे आप नु ना मर्द बणाती गिहो! 13 हे माये भऊ, तम्ही आजाद हुवणे वास्ते हकारले गेले छिवा, पर इसड़े ना कि ये आजादी नु शरीरा चे कामा चे वास्ते मौका बणावा, बल्कि प्रेमा लारे हेके ङुजे चे दास बणा। 14 कांकि मूसा ची सारी व्यवस्था चा निचोड़ ये बाते मां छै, “तम्ही आपणे पड़ोसीया लारे आपणे आलीकर प्रेम करा।” 15 पर अगर तम्ही आपस मां हेके ङुजे नु बाढा ते फाड़ती कर खावा, ते ङेखा! तम्ही आपस मां हेके ङुजे चा नाश करती नाखा। बन्दा चा सुभाव ते पवित्र आत्मा 16 पर मैं किहे पला, तम्ही पवित्र आत्मा चे अनुसार चला, तां तम्ही शरीरा ची बुरी लालसा उपर काबु कर सग़ा। 17 कांकि पाप चा शरीर ची बुरी लालसा पवित्र आत्मा चे विरोध मां, ते पवित्र आत्मा शरीरा ची बुरी लालसा चे विरोध मां इच्छा करे ये हेके ङुजे चे विरोधी छी, कांकि जको तम्ही करना चाहवा ऊं ना कर सग़ा। 18 अगर तम्ही पवित्र आत्मा चे चलाले आले उपर चला तां तम्ही मूसा व्यवस्था चे अधीन कोनी रेहले। 19 शरीरा चे काम तां उजागर छै, हराम काम, गन्दे काम, लोचपण, 20 मूर्तिपूजा, जादू टोणा, बैर, झग़ड़ा, ईर्ष्या, गुस्सा, विरोध, फूट, 21 जलन, नशा खोरी, असतरीगमन, ते यांचे जिसड़ी नेरी-नेरी कामे वी छिती, यांचे बारे मां मैं तम्हानु पेहले केहती ङिये कि इसड़े-इसड़े काम करने आले नरीकारा चे राज़ चे वारिस ना हो सग़ी 22 पर आत्मा चा फल प्रेम, आनन्द, शान्ति, धीरज, कृपा, भलाई, विश्वास चे लायक, 23 नरमाई ते संयम छी, इसड़े-इसड़े कामा चे विरोध मां कुई वी व्यवस्था कोनी। 24 ते जको मसीह ईशु चे छै, वाणे आपणे पापी शरीरा चा बुरा सुभाव ते बुरी लालसा ते अभिलाषा समेत क्रूसा उपर चढ़ाती ङिले 25 अगर अम्ही आत्मा चे लारे जीते छिऊं, तां आत्मा चे अनुसार चलु वी। 26 ना ही अम्ही घमण्डी, ना तां हेके ङुजे नु चिड़ावा, ना हेके ङुजे लारे गैरत करा। |
CC BY-NC-ND 4.0