प्रेरितां चे काम 8 - ओङ राजपूतशाऊल चा विश्वासीया उपर सताव 1 ओही ङिओ यरुशलेम ची कलीसिया उपर बङा सताव हुं लाग़ती गेला, ते प्रेरितां नु छोड़ती कर सारे चे सारे जणे यहूदिया ते सामरिया देशा मां खिंडती-पुंडती गेले। 2 ते नरीकारा चे भग़ता ने स्तिफनुस नु कब्री मां मेहले, ते ओचे वास्ते बङी मुकाण झड़ली। 3 पर शाऊल कलीसिया नु उज़ाड़े पलता, ते घरे-घरे घिरती कर मर्दा ते असतरीया नु घींसती-घींसती कर कैदखाने मां नाखती ङिता। सामरिया मां फिलिप्पुस चा उपदेश 4 पर जको लौक खिंडती-पुंडती गेलते, वे सुसमाचार सुणाते फिरले। 5 ते फिलिप्पुस सामरिया चे हेक शहरा मां जती कर लौका मां मसीह चा प्रचार करु लाग़ला। 6 जको बाता फिलिप्पुस ने केहलीया वानु लौका ने सुणती कर ते जको ओ चैन्ह ङिखाणता वानु ङेखती ङेखती कर, हेक चेत्त हुती कर मन लाले। 7 कांकि घणा महु अशुद्ध आत्मा बङी अवाजी लारे चीकतीया हुलीया निकलती गेलीया, ते ब़ोहत सारे लकवे चे बिमार ते लंगड़े वी ठीक करले गेले। 8 ते ओ शहरा चे लौका मां बङी खुशी आती गेली। शमौन जादूगर 9 ऐचे कनु पेहले ओ शहरा मां शमौन नांवा चा हेक शक्स हुता, जको जादू-टूणे करती सामरिया चे लौका नु हैरान करती ते आपणे आप नु कुई बङा मर्द बणाता। 10 ते सारे छोटे कनु लाती बङे तक इज्जत करती कर केहते, “वास्तव मां नरीकारा ची ताकत ऐ इन्साना मां छै।” 11 ओ घणे ङिहां कनु वानु आपणे जादूगरी चे कामा लारे हैरान करली भीलता, ऐवास्ते वे ओनु ब़ोहत मनते। 12 पर जिसे बेले फिलिप्पुस चे वचना उपर विश्वास करला जको नरीकारा चे राज़ ते ईशु मसीह चे नांवा चा सुसमाचार सुणाता तां लौक, का मर्द, का असतरी बपतिस्मा गिहुं लाग़ले। 13 बल्ति शमौन ने खौद्द वी विश्वास करला ते बपतिस्मा गेहती कर फिलिप्पुस चे लारे रिहुं लाग़ला ते चैन्ह ते बङे-बङे सामर्थ चे काम हुते ङेखती कर हैरान हुता। सामरिया नु पवित्र आत्मा मिड़ली 14 जिसे बेले प्रेरितां ने जको यरुशलेम मां हुते सुणले कि सामरी इलाके चे लौका ने नरीकारा चा वचन मनती गेला तां पतरस ते यूहन्ना नु वांचे गोढु भेज़ले। 15 तां वाणे जती कर वांचे वास्ते प्राथना करली कि वे पवित्र आत्मा गिहो। 16 कांकि पवित्र आत्मा हमा तक वांचे महु काये उपर कोनी उतरला हुता, वाणे तां सेर्फ प्रभु ईशु चे नांवा मां बपतिस्मा गेहला हुता। 17 तब पतरस ते यूहन्ना ने वांचे उपर हाथ मेहले ते वानु पवित्र आत्मा मिड़ली। 18 जिसे बेले शमौन ने ङेखले कि प्रेरितां चे हाथ मेहलणे लारे पवित्र आत्मा ङिला जाये, तां वांचे गोढु रुपये आणती कर केहले, 19 “हा ताकत मनु वी ङिया, कि जाये काये उपर हाथ मेहले, ऊं पवित्र आत्मा गिहो।” 20 पतरस ने ओनु केहले, “दुधे रुपये दुधे लारे नाश हो, कांकि तु नरीकारा चा दान रुपया लारे मोल गेहणे चा विचार करला। 21 ये बाते मां ना दुधा हेंस्सा छै, ना भईवाली, कांकि दुधे मन नरीकारा चे आग़ु सिधे कोनी। 22 ऐवास्ते आपणी ये बुराई कनु मन फिराती कर प्रभु कनु प्राथना कर, हो सग़े दुधे मना चा विचार माफ करला जाओ। 23 कांकि मैं ङेखे पला कि तु गैरत ते अधर्म मां ब़झला पला।” 24 शमौन ने उत्तर ङिला, “तम्ही माये वास्ते प्रभु कनु प्राथना करा कि जको बाता तम्ही केहलीया, वांचे महु कुई माये उपर ना आती पड़ो।” 25 बल्ति पतरस ते यूहन्ना ग़वाही ङिती कर ते प्रभु चा वचन सुणाती कर उठु सामरिया चे ब़ोहत सारे गांवा मां सुसमाचार सुणाते हुले यरुशलेम मां वापिस गेले। फिलिप्पुस ते कूश देश चा मंत्री 26 बल्ति प्रभु चे हेक स्वर्ग़दूता ने फिलिप्पुस नु केहले, “ऊठती कर दक्षिण सनु ओ मार्ग़ा उपर जा जको यरुशलेम कनु गाज़ा नु जाये।” हा रेगस्तानी मार्ग़ छै। 27 ओ ऊठती कर टुरती पला, ते बल्ति कूश देशा चा हेक नामी शक्स आवे पलता, जको कूशिया ची राणी कन्दाके चा मंत्री ते खजांची हुता, ते अराधना करती यरुशलेम कनु वापिस जाये पलता। 28 ते ओ आपणे रथा उपर ब़ेहला आला हुता, ते यशायाह भविष्यवक्ता ची किताब पढ़ता हुला वापिस जाये पलता। 29 बल्ति पवित्र आत्मा ने फिलिप्पुस नु केहले, “गोढु जती कर ऐ रथा लारे हुती जा।” 30 बल्ति फिलिप्पुस, मंत्री चे रथा सनु द्रोड़ला ते यशायाह भविष्यवक्ता ची किताब पढ़ते हुले सुणले। ते पूछले, “तु जको पढ़ी पला का ओनु समझी वी पला?” 31 ओणे केहले, “जब तक मनु कुई ना समझाओ तां मैं किवें समझी?” ते ओणे फिलिप्पुस कनु बिनती करली, कि चढ़ती कर ओचे गोढु ब़ेसो। 32 पवित्रशास्त्र चा जको पाठ ओ पढ़े पलता, ओ यूं हुता, “ओ भेङे आलीकर रुसणे वास्ते पुचाला गेला, ते जिंवे मेमणे आपणी ऊन कतरने आले चे सामणे चोप-चाप रिहे, यूंही करती कर ओणे वी आपणे मुँह कोनी खोड़ले। 33 ओची नरमाई मां ओचा न्यां हो नी सग़ला। ते ओचे समय चे वंशा चा वर्णन कूण करी? कांकि धरती कनु ओची जीन्दगी खत्तम करती ङिली गेली।” 34 ऐचे उपर मंत्री ने फिलिप्पुस कनु पूछले, “मैं दुधे कनु बिनती करे पला ईं बावेड़ कि भविष्यवक्ता ईं काये बारे मां किहे पला? खौद्द चे बारे जा कुई ङुजे चे बारे मां?” 35 बल्ति फिलिप्पुस ने आपणे मुँह खोड़ले, ते हाई पवित्रशास्त्रा चे भाग़ नु शुरु करती ओनु ईशु चा सुसमाचार सुणाला। 36 मार्ग़ा मां चलते-चलते वे कुई पाणीया ची जग़हा मां पुज़ले बल्ति मंत्री ने केहले, “ङेख, इठे पाणी वी छै। हमा मनु बपतिस्मा गेहणे मां का रुकावट छै?” 37 फिलिप्पुस ने केहले, “अगर तु सारे मन लारे विश्वास करी तां बपतिस्मा गे सग़ी।” ओणे उत्तर ङिला, “मैं विश्वास करे कि ईशु मसीह नरीकारा चा पूत छै।” 38 बल्ति ओणे रथ रोकणे ची आज्ञा ङिली, ते फिलिप्पुस ते मंत्री ङोनी पाणीया मां उतरती गेले, ते फिलिप्पुस ने ओनु बपतिस्मा ङिला। 39 जिसे बेले वे पाणीया कनु निकलती कर उपर आले, तां प्रभु चा आत्मा फिलिप्पुस नु चती चाह्ला गेला, ते मंत्री ने ओनु दुबारा कोनी ङेखले, ते ओ मगन हुता हुला आपणे मार्ग़ा मां चाह्ला गेला। 40 पर फिलिप्पुस अश्दोद शहरा मां आती निकड़ला, ते जब तक कैसरिया मां नी पुज़ला, तब तक शहर-शहर सुसमाचार सुणाता गेला। |
CC BY-NC-ND 4.0