1 तीमुथियुस 2 - ओङ राजपूतअराधना लारे जुड़ली आली आज्ञा 1 हमा मैं सारा कनु पेहले हा उपदेश ङिये पला कि बिनती, ते प्राथना, ते निवेदन, ते धन्यवाद सारा बन्दा चे वास्ते करला जाओ। 2 राजा ते हाकिमा चे वास्ते प्राथना करा, ताकि अम्ही चैन ते शान्ति समेत पुरी भग़ती ते गहराई चे लारे जी सग़ु। 3 ईं अम्चे उद्धारकर्ता नरीकारा नु आच्छे लाग़े ते भावे वी। 4 नरीकार ईं चाहवे, कि सारे बन्दा चा उद्धार हो, ते वे सच्चाई नु भली भान्ती जाणती गिहो। 5 कांकि नरीकार हेक ही छै, ते नरीकार ते बन्दा चे बीच मां हेको ही बिचोलीया छै, यानिकि ईशु मसीह जको इन्सान वी छै। 6 जेह्णे आपणे आप नु सारा बन्दा चे छुटकारे ची कीमत मां ङिती ङिले, ताकि ओची ग़वाही ठीक समय उपर ङिली जाओ। 7 मैं सच्च किहे पला, कूड़ कोनी मारे पला, कि मैं ऐह मकसद लारे प्रचारक ते प्रेरित ते नेरीया जातिया चे वास्ते विश्वास ते सच्चाई चा उपदेशक ठहराला गेला। 8 सो मैं चाहवे, कि हर जग़हा मर्द बिना गुस्से ते बहस-बाजी चे पवित्र हाथा नु चती कर प्राथना करले करो। 9 यूंही असतरीया कनु वी चाहवे कि सिधे सादे पेहरावे लारे आपणे आप नु सजाओ, ते ना कि माल गूंथणे, ते सोने, ते मोतीयां, ते बेशकीमती ओढ़णा लारे सजाओ, 10 पर भले कामा चे लारे, कांकि नरीकारा ची भग़ती ग्रहण करने आलीया असतरीया नु ईं वाजिब वी छै। 11 असतरीया नु चोप-चाप करती कर पुरे बसा मां हुती सिखणे चाही छै। 12 ते मैं हा इजाजत ना ङी, कि असतरीया उपदेश करो, ते मर्दा उपर आज्ञा चलाओ, पर चोप-चाप रिहो। 13 कांकि आदम पेहले, ओचे बाद हवा बणाली गेली। 14 ते आदम बहकाला कोनी गेला, पर असतरी बहकावे मां आती कर पापी हुली। 15 तां वी ब़ाले जणने चे जरिये उद्धार पावी, अगर वे तसल्ली लारे विश्वास, प्रेम, ते पवित्रता मां टिकली रिहो। |
CC BY-NC-ND 4.0