ሳጻ 8 - ኦራ ጫ̈ቃ ማጻ̈ፋ

ታብዚ ማይታሚን ፊርቂ̇ንታ̇ዴ

¹ ዶራ̈ዲ ታብዚ ማይታሚን ፊርቃም̇ባራ ባጋ̇ ሳኣ̈ታ ማ̈ቃምፔ̈ን ኣፋ ሳ̈ዚን ጋርታ̇ ዎይ ባዚ ዚክ ጌይዴ፤

² ጾ̈ሳ̇̈ ቲ̈ን ኤቂዛን ታብዛ ኪ̈ታንቻን ቴ ቤቃ̇ዴ፤ ኢንታ̇ቦ ታብዛ ዛያ ኢሚ̇ንቲ̇ዴ።

³ ኢጻ̈ና ጩይሺ̇ዝ ዎርቃባር ኦ̈ንቲኖ ቄንዳላ ኤ̈ኖ ሜላ ኪ̈ታንቾ ዬ̈ሪ ካ̈ሻ̇ ቤሲ̇ን ላፍ ኤቂ̇ዴ፤ ዙፋና ቲ̈ን ዎ ዎርቃባር ኦ̈ኖ ካ̈ሻ ቤሲ̇ን ጋልዳ ጌ̈ሻ̇ ኣሳን ዎሲንባራ ዎልኣ ፔታ̇ን ሺሻ̇ምፔ̈ን ዎይሊን ኢጻ̈ና ኢ̈ብ ኢሚ̇ንቲ̇ዴ።

⁴ ኢጻ̈ኒን ጩይዢንዳ ጌ̈ሻ̈ ኣሳን ዎ̈ሲንባራ ዎልኣ ኪ̈ታንቻ ኩሽታፖ ጾ̈ሳ̇̈ ቲ̈ን ዬ̈ላ̇ዴ።

⁵ ዪኒ̇ፖ ዎሃ ኪ̈ታንቻ̈ዲ ኢጻ̈ና ጩይሻ̇ዝ ቄንዳሊን ኤ̈ሪ ካ̈ሻ̇ ቤሲ̇ን ጋልዳፖ ታማ ኤካ̇ር ኢዝባር ኩምሪ ቶ̈ራ ሳ̈ዳ ዡጊዲ̇ዴ፤ ኢናፖ ዳዳ ጊርቂዴ፤ ዜ̈ሊን ዜ̈ሊጚዴ፤ ሳ̈ዛር ኤንኢዴ።

ሞይዛን ፉጊንቲ̇ዴ

⁶ ታብዛ ሞይዛ ኤ̈ኖ ታብዛ ኪ̈ታንቻ̇ን ፌ ሞይዛን ፉጋ̇ንዳብ ጊ̈ጊንቲ̇ዴ።

⁷ ቲ̈ኖ ኪ̈ታንቻ̇̈ዲ ፌ ኤ̈ኖ ሞይዚን ፉጊ̇ዴ፤ ኢናፖ ሻች̇ኬ ሱ̈ኬ ቡሺንቲ̇ኖ ታማ ዬ̈ሪ ቶ̈ራ ሳ̈ዳ ቶጚቲዴ፤ ሳ̈ዚን ጋልዳፖ ሲሲን ሚጫ̇ዴ፤ ሚ ጋርታፓር ሲሳ̈ ሚጪ̇ዴ፤ ሳ̈ዶ ማ̈ታ ዎይ ሚጪ̇ዴ።

⁸ ናምኢ ኪ̈ታንቻዲ ፌ ሞይዚን ፉጊ̇ዴ፤ ኢናፖ ጴ̈ች ኢንዳ ማይጺዝ ባዚ ኤይቲ̇ሙታ̇ ባሃ̈ራ ጋርታ ቶጚንቲ̇ዴ፤ ባሃ̈ሪምቦ ሲሲንዳ ሱ̈ ማ̈ቃ̇ዴ።

⁹ ባሃ̈ራ ጋርታ ዶኢዛን ሼምፓ ዎ ኮቺንታን ጋርታ̇ፖ ሲሳን ዓይቂ̇ዴ፤ ማርካባን ጋርታፓሬ ሲሳን ሚጪ̇ ዪዴ።

^10-11 ዓይዚ ኪ̈ታንቻ̇̈ዲ ፌ ሞይዚን ፉጊ̇ዴ፤ ኢናፖ ዣባ̇ ታማፌ̈ን ኤይቲ̇ዝ ጴች ቤ̈ርሲ ኣፋፖ ኬዲ̇ዴ፤ ዪ ቤ̈ርሳ ኢ ሱ̈ምንዳ “ጫ̈ጛ” ጌይንቲ̈ሬ፤ ኢ ዋ̈ን ኣ̈ፊን ሲሲን ጋልዳኬ ዶቃ ዋ̈ን ጋልዳ ኬዲ̇ዴ። ዋ̈ምቦ ሲሲንዳ ጫ̈ጚዛ ማ̈ቃ̇ዴ፤ ዪን ዋ̈ን ጫ̈ጚዛኮታ̇ቦ ዎይሊን ኣሲ ዓይቂ̇ዴ።

¹² ኦይዲ ኪ̈ታንቻ̇̈ዲ ፌ ኤ̈ኖ ሞይዚን ፉጊ̇ዴ፤ ኣዋ̈ፊምቦ ሲሲን፤ ኣጋኒምቦ ሲሲንዲኬ ቤ̈ርሳንቦ ሲሲን ቡኪንታ̇ዴ፤ ዪ̈ኮታ̇ቦ ኢንታ̇ኮ ሲሳን ዎይ ሚ̇ዴ፤ ዪኒባራ ጋላስ ጋልዳፖ ሲሲን፥ ቃ̈ም ጋልዳፖ ሲሲንዳ ፎኢን ባዮ̇ ም ማ̈ቃ̇ዴ።

¹³ ኢናፖ ቴ ቤቃ̇ምባራ ፔቲ̇ ኣርጊን ኣፎ ሳ̈ዚምቤኬ ሳ̈ዶ̇ ሳ̈ዚምቦ̇ ጊዲ̇ንባራ ፋሪሙታ̇ዶ̈ሪ ጴች ጊርስባራ “ኣቲ̇ኖ ዓይዚ̇ ኪ̈ታንቻን ፌ ሞይዚን ጊርሲን ሲሳ̇ምባራ ሳ̈ዝ ጋልዳ ዶኢዝ ኣሳን ባዚ ኣዬ̇! ኢንታ ባዚ ኣዬ̇! ኢንታ ባዚ ኣዬ̇!” ጋ̈ር ዉይሳዚን ቴ ሲስካ̇ዴ።